İDMAN


“Liverpul” komandası “Bournemouth”u böyük hesabla məğlub edib

Matçda het-trik edən Məhəmməd Salah cari mövsümdə vurduğu qolların sayını 10-a çatdırıb

Bakı, 8 dekabr, AZƏRTAC

Dekabrın 8-də “Bournemouth”- “Liverpul” oyunu ilə İngiltərə Premyer Liqasının 16-cı turuna start verilib.

AZƏRTAC xəbər verir ki, matçın əvvəlindən üstünlüyü ələ alan qonaqlar 25-ci dəqiqədə hesabı açıblar. Misirli Məhəmməd Salah adını tabloya yazdırıb - 0:1. Görüşün ilk hissəsi bu hesabla başa çatıb.

Fasilədən dərhal sonra “Liverpul” hesab arasındaki fərqi artırıb. Müdafiəçilərin səhvindən istifadə edən Məhəmməd Salah dublunu rəsmiləşdirib – 0:2.

Qarşılaşmanın 68-ci dəqiqəsində Endri Robertsonun cinah ötürməsindən sonra top “Bournemouth”un müdafiəçisi Stiv Kuka toxunaraq istiqamətini dəyişdiyindən qapıçı üçün əlçatmaz olub – 0:3.

Lakin bu da oyunda sonuncu qol olmayıb. Matçın 77-ci dəqiqəsində Məhəmməd Salah özünün üçüncü, komandasının isə dördüncü qolunu ev sahiblərinin qapısından keçirib. Misirli hücumçu bu oyunda het-trik etməklə cari mövsümdə vurduğu qolların sayını 10-a çatdırıb.

Beləliklə, səfərdə 4:0 hesablı qələbə qazanan “Liverpul” xallarının sayını 42-yə çatdırıb. Premyer Liqanın hazırkı lideri, aktivində 41 xal olan “Mançester Siti” bu axşam səfərdə “Çelsi”yə məğlub olarsa “Liverpul” turnir cədvəlində ilk sıraya yüksələcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.