SİYASƏT


Londonda fəaliyyət göstərən LINKS analitik institutunun rəhbəri BAMF-da olub

Bakı, 3 iyul, AZƏRTAC

Londonda fəaliyyət göstərən LINKS Analitik İnstitutu - Dağlıq Qarabağ münaqişəsinin sülh yolu ilə həlli üçün Avropa Tərəfdaşlığı Konsorsiumuna daxil olan təşkilatın rəhbəri Dennis Sammut Azərbaycana səfəri zamanı Beynəlxalq Avrasiya Mətbuat Fondunda (BAMF) olub. Bu barədə AZƏRTAC-a BAMF-dan məlumat verilib.

Fondun prezidenti Umud Mirzəyevlə görüş zamanı Dennis Sammut bildirib ki, 1997-ci ildə yaradıldığı vaxtdan bu günədək LINKS analitik institutu münaqişələrin qarşısının alınması, sülhün təşviqi kimi ideyalar, eləcə də mina təhlükəsizliyi sahəsində məlumatların toplanması və qiymətləndirilməsi üzərində işləyir. O, BAMF-ın müxtəlif istiqamətlərdə fəaliyyəti, yerli və beynəlxalq təşkilatlarla əməkdaşlıqda uğurla həyata keçirilən bir sıra humanitar layihələrin, vətəndaş cəmiyyətinin inkişafına yönəlmiş proqramları barədə məlumatının olduğunu qeyd edib. Bildirib ki, bunların hamısı Fond və LINKS arasında əməkdaşlığın qurulması və dünyanın fərqli bölgələrində müxtəlif sülh prosesləri üzərində işlərin daha da inkişaf etdirilməsi üçün yaxşı bir əsas yaradır.

Umud Mirzəyev Fondun xüsusilə də sülh proseslərinə aid humanitar layihələrdə əməkdaşlığa və birgə fəaliyyətə hazır olduğunu bildirib. Qonağa Ermənistan-Azərbaycan, Dağlıq Qarabağ münaqişəsi barədə məlumat verən sədr deyib: “Bu gün mənim evim qonşu Ermənistanın işğalı altındadır. Mənim bütün ailəm 30 il davam edən münaqişədən əziyyət çəkib. Fond yarandığı vaxtdan biz münaqişənin sülh yolu ilə həlli ideyasını fəal şəkildə təşviq edir və həmişə Dağlıq Qarabağ münaqişəsinin reallıqları və Azərbaycanın işğal olunmuş ərazilərinin tezliklə azad edilməsi haqqında açıq danışmağın lazım olduğunu ifadə edirik. Susqunluq və fəaliyyətsizlik münaqişədə gərginliyin artmasına gətirib çıxara bilər”.

LINKS-in Azərbaycanda və Ermənistanda mina təhlükəsizliyinin qiymətləndirilməsi sahəsində fəaliyyəti barədə danışan qonaq bu istiqamətdə BAMF-ın təcrübəsini də vurğulayıb.

Umud Mirzəyev qeyd edib ki, vətəndaş cəmiyyəti təşkilatı olaraq BAMF minadan təmizləmə sahəsində regionda və dünyada ən fəal və aparıcı təşkilatlardan biri olan Ərazilərin Minalardan Təmizlənməsi üzrə Milli Agentliklə (ANAMA) fəal şəkildə əməkdaşlıq edir. 1998-ci ildə Birləşmiş Millətlər Təşkilatının Minadan Təmizlənmə üzrə Xidməti və Humanitar Minadan Təmizlənmə üzrə Cenevrə Beynəlxalq Mərkəzi ilə əməkdaşlıq nəticəsində BAMF minaların mənfi təsiri haqqında ətraflı hesabat dərc edib.

Tərəflər uzunmüddətli səmərəli əməkdaşlığın qurulması və gələcək humanitar fəaliyyətlərdə birgə iştirak barədə razılığa gəliblər.

Qeyd edək ki, LINKS 1997-ci ildə Londonda müstəqil, kommersiya olmayan mərkəz kimi münaqişələrin qarşısının alınması, qlobal təhlükəsizliyin təmin olunması və beynəlxalq əlaqələrin qurulması məqsədilə yaradılıb. Təşkilat 15 ildən çoxdur ki, münaqişələrin sülh yolu ilə həlli və əsasən innovativ, yenilikçi layihələr çərçivəsində işləyən keçid iqtisadiyyatına malik ölkələrdə demokratiyanın inkişafına dəstək olaraq geniş tədbirlər həyata keçirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.