Bakı, 3 iyun, AZƏRTAC

ABŞ-ın Los-Anceles şəhərində Azərbaycanın və Türkiyənin Baş konsulluqlarının birgə təşkilatçılığı ilə iftar mərasimi keçirilib. Azərbaycanın Los-Ancelesdəki Baş Konsulluğundan AZƏRTAC-a bildiriblər ki, mərasimdə ABŞ Dövlət Departamentinin rəsmiləri, müxtəlif ölkələrin diplomatları, müsəlman, xristian, yəhudi, bəhai, zərdüşt və digər dini icmaların rəhbərləri, həmçinin Azərbaycan, türk, yəhudi, Pakistan, İran və digər icmaların nümayəndələri, jurnalistlər daxil olmaqla, 170-ə yaxın qonaq iştirak edib. İftar mərasimi Qurani-Kərimdən ayələrin oxunması ilə başlayıb.

Azərbaycanın Los-Ancelesdəki baş konsulu və Los-Anceles Konsulluq Korpusunun duayeni Nəsimi Ağayev çıxışında müasir dövrdə dünyada geniş yayılmış ksenofobiya və irqçiliyə qarşı səmərəli mübarizə aparmaq, qarşılıqlı anlaşma və harmoniyaya nail olmaq üçün müxtəlif dini və etnik icmalar arasında sıx əlaqələrin, dialoq və əməkdaşlığın vacibliyini vurğulayıb. Bu baxımdan, Azərbaycanın uğurlu modelini nümunə gətirərək, tolerantlığın ölkəmizdə çox möhkəm təməl sütunlarının, zəngin ənənələrinin mövcud olduğunu qeyd edib. Baş konsul Azərbaycanda müsəlmanlar, xristianlar və yəhudilər də daxil olmaqla, dini və etnik kimliyindən asılı olmayaraq, hər kəsin bərabər hüquqlara malik olduğunu, dinc və qarşılıqlı anlaşma şəraitində birgə yaşadığını diqqətə çatdırıb. Azərbaycan-Türkiyə dostluğundan danışan N.Ağayev bu münasibətlərin nəinki strateji əməkdaşlıq, həm də uzun bir tarixə malik möhkəm qardaşlıq münasibətləri olduğunu qeyd edib.

Türkiyənin Los-Ancelesdəki baş konsulu Can Oğuz Türkiyədə iftar ənənələrindən bəhs edərək bu müqəddəs ayın, eyni zamanda, bir-birimizi daha yaxşı anlamağa sövq etdiyini deyib. Baş konsul, həmçinin dünyada insanların birliyinə, harmoniya və sülh şəraitində birgəyaşayışına təhlükə törədən şər qüvvələrə qarşı birgə mübarizənin vacibliyini qeyd edib. Azərbaycan-Türkiyə münasibətlərindən danışan C.Oğuz iki ölkənin bir millət-iki dövlət olduğunu, xalqlarımızın mədəniyyət və dil baxımından bir-birinə çox yaxın olduğunu vurğulayıb. O, hər iki ölkədə müxtəlif mədəniyyətlərə və dinlərə mənsub insanların yaşadığını deyərək, müxtəliflik və multikulturalizmin Azərbaycan və Türkiyə üçün əsas dəyərlərdən biri olduğunu bildirib.

Sonra çıxış edən dünyanın ən nüfuzlu yəhudi təşkilatlarından olan, Los-Ancelesdə fəaliyyət göstərən Simon Vizental Mərkəzinin həmtəsisçisi və sədr müavini ravvin Abraham Kuper, Los-Anceles Dinlərarası Şurasının sədri, Kaliforniyanın ən nüfuzlu xristian din xadimlərindən olan Yepiskop Xuan Karlos Mendez, Beynəlxalq Mövlanə Fondunun nümayəndəsi İsmail Fenter və Los-Anceles şəhərinin İnsan Resursları üzrə müvəkkili Amna Qazi dinlərarası dialoqun vacibliyini qeyd edərək, Los-Ancelesdə Azərbaycan və Türkiyənin müxtəlif dinləri və icmaları iftar süfrəsi ətrafında bir araya yiğmasının təqdirəlayiq olduğunu vurğulayıblar.

Sonda iftar süfrəsinə dəvət edilən qonaqlara Azərbaycan və Türkiyə mətbəxinin təamları təqdim olunub.