İDMAN
Luis Hamilton Bakıda finişə ikinci çatmasından pərişan olub
Bakı, 29 aprel, AZƏRTAC
“Mercedes” komandasının pilotu Luis Hamilton Bakıda finişə ikinci çatmasından pərişan olub. Yürüş axşamı pilot uik-endin yekunlarından və növbəti mərhələlərdə mübarizədən danışıb.
-Komanda sizinlə Bottasa öz aranızda mübarizə aparmaq imkanı yaratdı. Valtteri əvvəlki tərəfdaşlarınızdan nə ilə fərqlənir? Sizin münasibətlərinizin pressinq şəraitində pisləşəcəyi ehtimalı varmı?
-Mən mövsümün gedişində nələr olacağını deyə bilmərəm, bizim dəyişib-dəyişməyəcəyimizi də demək çətindir. Əvvəllər pilotların komanda qarşısında öhdəlikləri yox idi, bizdə isə bunlar mövcuddur və Valtteri ilə onlara əməl edirik.
-Siz söylədiniz ki, sükanda sürət dəyişdirmələri virtual rejimdəki təhlükəsizlik avtomobilində köməyiniz olub. Sizə məhz nə lazım idi?
-Mən bu mövzuda danışa bilmərəm, çünki bunlar texniki məqamlardır və komanda onların yayılmasına icazə vermir. Lakin bu, yalnız proseduraya aiddir, ciddi bir şey deyil.
-Finişə ikinci çatdıqdan sonra nə düşünürsünüz?
- Bir tərəfdən, komanda üçün sevinirəm və hamı ilə fəxr edirəm. Mövsümün bütün yürüşlərinə gələrkən hansı yeri tutacağımızı bilmirik. Biz çox çalışmışıq və hər uik-enddə maksimum nəticələr əldə etməyə səy göstərmişik. Bütün bu yürüşlər bizim üçün əla keçib. Hesab edirəm ki, bizim komanda 100 faiz hamıdan yaxşı işləyir. “Ferrari”dən fərqimiz də məhz budur. Onların bu uik-enddə əla maşınları vardı. Məşqlərdə və təsnifatlarda möhtəşəm temp nümayiş etdirdilər, lakin yürüş zamanı onlarda şinlər və sürətlə bağlı problemlər yarandı.
Mən finişə ikinci çatmağı xoşlamıram. Bu uik-endə baxışım belədir: bizim maşınımız yürüşdə qalib gəlməyə imkan verirdi. Dolayı əlamətlərlə hesab edirdik ki, sürəti artıra biləcəyik və hər şey yaxşı alınacaq. Lakin mən öz işimi ideal səviyyədə yerinə yetirə bilmədim. İkinci yerlə barışmaq çətindir, lakin növbəti yürüşdə daha güclü olmaq üçün mən hər şeyi təhlil edəcəyəm.
-“Mercedes” dörd yürüşdə Konstruktorlar Kubokundakı şəxsi hesabda üstünlüyü stabil şəkildə artırırdı. İndi siz Valtteri Bottası titul uğrunda mübarizədə əsas rəqib hesab edirsiniz?
- Yox. Hələ titul uğrunda mübarizədən danışmaq tezdir. Dediyim kimi, bu uik-enddə “Ferrari”nin məşqlərdə və təsnifatlarda əla tempi vardı. Əgər bu komandanın hər iki pilotu öz işlərini bizim kimi dəqiq yerinə yetirsəydi, onda bizdən bu qədər geri qalmazdı. Biz ayıq-sayıq olmalıyıq. Bu uik-endə biz yeni texnika ilə gəlməmişdik, onlar isə bunun əksinə etdilər. Yürüş vaxtı biz öz sürətimizdən bir az təəccübləndik. Haçansa biz də yeni texnika ilə gələcəyimizə ümid edirik.
-Söylədiniz ki, öz startlarınızdan narazısısınız. Belə olan halda necə işləyirsiniz?
- Bundan əvvəlki iki yürüşdə mən əla start götürmüşdüm. Keçən uik-enddə isə hamıdan yaxşı idim. Araşdırmaq lazımdır, lakin bu gün də mən ən yaxşı üç yürüşçü arasında idim.
-Bu il nəticələrin bir-birinə yaxın olması barədə nə düşünürsünüz?
- Bu cür sıx mübarizə mənim xoşuma gəlir. Ötən il də bundan məmnun qalmışdım.
-“Ferrari” və “Red Bull Racing” sizdən azacıq geri qalır, aradakı məsafə azalır...
-Aradakı məsafə həqiqətən də azalır. Hər halda ötən illə müqayisədə belədir. O vaxt da sıx mübarizə vardı, lakin bu, məhz bizə lazım olan amildir. Məqsədə nail olmaq isə daha çox xoşdur. Hər zaman uğur əldə etməyə can atırsan, lakin bu uik-enddə mən bunu bacarmadım.
-İspaniyadakı növbəti yürüşdə sizə daha asan olacaq, axı siz mövsümqabağı testlərdə orada çalışmısınız. Güc nisbəti orada müəyyən ediləcək? Biz bütün suallara cavab tapa biləcəyikmi?
-Bunu bilmirəm. Bu cür suallara cavab vermək istəmirəm. Testlərdə biz də, “Ferrari” də sürətli idik. Güc nisbətini müəyyən etmək üçün bir neçə yürüş lazımdır. Əlbəttə, biz ilk dörd yürüşdə əla çıxış etdik, lakin ayıq-sayıq olmalıyıq, axı rəqiblərin irəli addım atacağı məqamı əvvəlcədən bilmək olmur. Adətən, hamı Barselonaya yeni texnika gətirir və “Ferrari” bunu edəcək. Biz hadisələrin inkişafını diqqətlə izləməliyik və bu cür nəticələr qazanmağa davam etməliyik.
-Qarşıda hələ çoxlu Qran-Pri var. Lakin sürətli dairə üçün xal final dairələrində mühüm rol oynayır. Siz bu mübarizədə iştirak edəcəksiniz?
- Bu barədə düşünməmişəm. Mövsümün dörd yürüşündən sonra başa düşdük ki, son dairələrdə hadisələr necə cərəyan edəcək. Əgər kiminsə pip-stopu problemsiz keçirmək imkanı olsa, onda həmin pilot boksda dayanacaq və sonra sürətli dairəni keçəcək. Mən diqqətimi yürüşdə maksimum xal qazanmağa yönəltmişdim. Düşünmürəm ki, sürətli dairəyə görə bir xal məni maraqlandıra bilər.
-Bu həftə siz sosial şəbəkələrdə yeni tatuirovkaların fotoşəkillərini paylaşmısınız. Onların tarixçəsi nə ilə bağlıdır? Siz bu və ya digər tatuirovkanı nə üçün edirsiniz?
- Tatuirovkanı seçmək üçün vaxt lazımdır, onların hər birinin öz mənası var. Mənim bütün tatuirovkalarım özümü necə gördüyümlə əlaqəlidir.