Ağır çəkidə keçmiş dünya çempionu Mayk Tayson, deyəsən, rinqdə kişi rəqiblə qarşılaşmaqda problemlə üzləşmişdir. Buna görə də o, qadın peşəkar boksunun ən məşhur nümayəndələrindən birini – Ənn Vulfu döyüşə dəvət etmişdir.

AZƏRTAC Assoşieyted Press Agentliyinə istinadla xəbər verir ki, 40 yaşlı boksçunun dediyinə görə, döyüş Mayk Taysonun bu günlərdə başlanacaq dünya turnesi şousu çərçivəsində keçirilməlidir.

Tayson Ənn Vulfu qadın peşəkar rinqində hökmranlıq edən görkəmli idmançı adlandırmışdır. O bir daha vurğulamışdır ki, böyük boksa qayıtmaq fikri yoxdur, qarşıdakı turnedən məqsədi dolanmaq üçün pul qazanmaqdır.

Xatırladaq ki, Ənn Vulf peşəkarlar rinqində 22 görüş keçirmiş və onların 21-də qələbə qazanmış, 15 döyüşdə rəqiblərini nokauta salmışdır.