SİYASƏT
MİLLİ MƏCLİSDƏ MÜŞAVİRƏ
Milli Məclisin mətbuat xidmətindən AZƏRTAC-a bildirmişlər ki, Arif Rəhimzadə müşavirəni açaraq, iştirakçıları məzuniyyətlərini bitirib işə başlamaları münasibətilə təbrik etdi və qarşıda duran vəzifələr haqqında danışdı.
Sonra Milli Məclis aparatının rəhbəri Səfa Mirzəyev parlamentin 2004-cü il payız sessiyasının qanunvericilik işləri planı haqqında ətraflı məlumat verdi. Bildirildi ki, payız sessiyasında bir sıra qanun layihələri, o cümlədən respublika Prezidentinin qanunvericilik təşəbbüsü ilə parlamentə göndərilmiş, habelə Avropa Şurası qarşısında götürülmüş öhdəliklərlə bağlı hüquqi sənədlər də müzakirə olunacaqdır.
Müşavirədə çıxış edən daimi komissiya sədrləri Əli Hüseynov, Səttar Səfərov, Eldar İbrahimov, Şahlar Əsgərov, Hadi Rəcəbli, Zahid Qaralov, Asya Manafova, Səməd Seyidov və daimi komissiya sədrinin müavini Rəbiyyət Aslanova payız sessiyasının qanunvericilik işləri planı haqqında mülahizələrini söylədilər və təkliflərini verdilər.
Müşavirəyə yekun vuran Milli Məclis sədrinin birinci müavini Arif Rəhimzadə payız sessiyasının qanunvericilik işləri planının təkmilləşdirilməsi, qanun layihələrinin hazırlanma müddətinin dəqiqləşdirilməsi məsələlərinə toxundu. Qərara alındı ki, Milli Məclisin 2004-cü il payız sessiyasının qanunvericilik işləri planına sentyabrın 1-dək yenidən baxılacaqdır.