SİYASƏT
MİLLİ MƏCLİSDƏ NAZİRLƏR KABİNETİNİNHESABATI DİNLƏNİLDİ
Milli Məclisin sədri Murtuz Ələsgərov demişdir ki, ümummilli liderimiz Heydər Əliyevin rəhbərliyi ilə ölkədə başlanmış hüquqi, iqtisadi, siyasi və sosial islahatlar uğurla davam etdirilir. “Azərbaycan Respublikasının Milli Məclisinin Azərbaycan Respublikasının Nazirlər Kabinetinə etimad məsələsinin həll edilməsi hüququnun əlavə təminatları haqqında” Konstitusiya Qanununa uyğun olaraq, hər il Milli Məclisin yaz sessiyasının 5-ci iclasında hökumət özünün fəaliyyəti ilə bağlı parlament qarşısında hesabat verir. Ötən il Milli Məclis Nazirlər Kabinetinin ilk hesabatını dinləyərək müvafiq qərar qəbul etmişdir. Ölkənin hərtərəfli inkişafının təmin olunmasına yönəldilmiş islahatların həyata keçirilməsində Nazirlər Kabineti olduqca mühüm rol oynayır. Ötən dövrdə hökumət ölkə iqtisadiyyatında 1995-ci ildən bəri mövcud olan inkişaf dinamikasını qoruyub saxlamış, əhalinin rifah halının daha da yaxşılaşmasına şərait yaradan səmərəli tədbirlər görmüşdür. Ümumi daxili məhsul əhəmiyyətli dərəcədə artmış, nəticədə dövlət büdcəsinin gəlirləri çoxalmışdır. Azərbaycan Respublikası ilbəil daha da inkişaf edərək, iqtisadi cəhətdən qüdrətli dövlətə çevrilməkdədir. Qarşıda isə görüləcək işlər çoxdur. Bütün işləri həyata keçirmək üçün Nazirlər Kabinetinin fəaliyyətini daha da gücləndirmək, istifadə edilməyən ehtiyat mənbələrini üzə çıxarmaq lazımdır.
Sonra iqtisadi inkişaf naziri Fərhad Əliyev Nazirlər Kabinetinin 2003-cü il üçün hesabat məruzəsi ilə çıxış etmişdir. O demişdir ki, ötən il Azərbaycanın sosial-iqtisadi inkişafı yüksələn xətlə davam etmişdir. Bu irəliləyiş 1996-cı ildən başlamış və son 8 il ərzində ümumi daxili məhsul 90 faiz, büdcə gəlirləri 3,9 dəfə, əsas kapitala yönəldilən sərmayələrin həcmi 6,5 dəfə, xarici ticarət dövriyyəsi 3,3 dəfə, əhalinin real pul gəlirləri 3 dəfə, orta aylıq əmək haqqı 6 dəfə artmış, büdcə kəsiri ÜDM-in 2 faizindən çox olmamış, inflyasiyanın illik səviyyəsi 1-2 faiz təşkil etmişdir. İqtisadi inkişafın sadalanan göstəricilərinə görə Azərbaycan MDB ölkələri arasında ilk yerlərdən birini tutur. Ötən illər ərzində dərin struktur və institusional islahatlar uğurla həyata keçirilmişdir.
Bütün bu nailiyyətlər Azərbaycanda iqtisadi siyasətin düzgün istiqamətdə aparılmasından xəbər verir. Bu siyasətin müəllifi ümummilli liderimiz, dünya miqyaslı görkəmli siyasi və dövlət xadimi Prezident Heydər Əliyev olmuşdur.
Heydər Əliyevin qeyri-adi rəhbərlik istedadı hələ ötən əsrin 70-80-ci illərində Azərbaycanın gələcək dövlətçiliyi üçün güclü iqtisadi, elmi və kadr potensialı yaratmağa imkan vermişdir. Məhz bu potensial Azərbaycanı 1990-cı illərin əvvəlindəki dərin iqtisadi böhrandan çıxarmağa imkan yaratmışdır.
2003-cü il oktyabrın 15-də keçirilmiş prezident seçkilərində Azərbaycan vətəndaşlarının təxminən 77 faizi Heydər Əliyev siyasi xəttinin ən layiqli davamçısı İlham Əliyevə səs verdi. İlham Əliyev seçkiqabağı və seçkidən sonrakı çıxışlarında birmənalı şəkildə bəyan etmişdir ki, Heydər Əliyevin daxili və xarici siyasəti davam etdiriləcək, onun dövlət quruculuğuna, Azərbaycanın iqtisadi və hərbi qüdrətinin möhkəmləndirilməsi və inkişafına yönəldilmiş ideyaları reallaşdırılacaqdır. Təsadüfi deyil ki, respublikanın sosial-iqtisadi inkişafı ilə bağlı verilmiş elə ilk fərman və sərəncamlar da iqtisadi siyasətin varisliyini göstərir.
Hesabat dövründə ümumi daxili məhsulun real artım sürəti 11,2 faiz təşkil edərək 35,1 trilyon manata, ÜDM-in strukturunda maddi istehsalın payı 63 faizə çatmışdır. Ümumi daxili məhsulun formalaşması prosesində qeyri-dövlət sektorunun xüsusi çəkisi 73,3 faiz təşkil etmişdir. Özəl sektorda artım sürəti dövlət sektoruna nisbətən 3-4 faiz yüksək olmuşdur.
2003-cü ildə dövlət büdcəsinə 6,132 trilyon manat və ya 2002-ci illə müqayisədə 35 faiz çox vəsait daxil olmuşdur. Büdcə vəsaitinin 55 faizindən çoxu əhalinin maddi və sosial ehtiyaclarının ödənilməsi üçün istifadə edilmişdir. Ötən il büdcə kəsiri cəmi 41 milyard manat və ya ÜDM-ə nisbətdə 0,1 faiz təşkil etmişdir. 2004-cü ilin əvvəli üçün Azərbaycanın valyuta ehtiyatları 75 milyon dollar artmış və 757 milyon dollar təşkil etmişdir ki bu da ölkənin 4-5 aylıq idxal həcminə bərabərdir. Dövlət Neft Fondunda 815 milyon dollar, yaxud 2003-cü ilin əvvəlinə nisbətən 123 milyon dollar çox vəsait toplanmışdır. Kənd təsərrüfatı istehsalının real artımı 5,6 faiz təşkil etmişdir.
Əldə olunmuş bütün bu uğurlar bilavasitə Prezident Heydər Əliyevin adı ilə bağlıdır.
Məruzəçi xatırlatdı ki, Azərbaycan Prezidenti tərəfindən “Azərbaycan Respublikası regionlarının sosial-iqtisadi inkişafı Dövlət Proqramı” (2004-2008) təsdiq edilmişdir. Bu sənəddə respublikanın sosial-iqtisadi inkişafının əsas parametrləri müəyyənləşdirilmiş, iqtisadi və struktur islahatlarının sürətləndirilməsi, regionların inkişaf etdirilməsi, kiçik və orta sahibkarlığa dövlət yardımının artırılması, strateji baxımdan mühüm obyektlərin və infrastrukturun inşası, biznes mühitinin yaxşılaşdırılması, işsizliyin azaldılması, əhalinin maddi rifahının yüksəldiməsi kimi çox mühüm vəzifələr irəli sürülmüşdür. Bu vəzifələrin həyata keçirilməsi üçün artıq zəruri işlərə başlanılmışdır. Azərbaycan hökuməti Prezident İlham Əliyevin müəyyən etdiyi sosial-iqtisadi inkişaf strategiyasından irəli gələn vəzifələrin layiqincə yerinə yetirilməsi üçün bütün imkanlarını səfərbər edəcəkdir.
Sonra məruzə ətrafında müzakirələr başlandı.
Müzakirələrdə çıxış edən deputatlar hökumətin səlahiyyətlərinə daxil olan bütün məsələlərə toxunaraq vurğuladılar ki, hesabat dövründə əldə edilən nailiyyətlər ümummilli liderimiz Heydər Əliyevin iqtisadi siyasət xəttinin həyata keçirilməsinin nəticəsidir və həmin siyasət bu gün Azərbaycan Prezidenti İlham Əliyev tərəfindən yeni konsepsiya əsasında uğurla davam etdirilir.
Eyni zamanda, bildirildi ki, Azərbaycanda son illər yaranmış potensialdan düzgün istifadə olunmalı, sahibkarlığa diqqət artırılmalı, iş adamlarına kreditlərin verilməsindəki əngəllər və mənfi hallar aradan qaldırılmalı, struktur dəyişiklikləri aparılmalıdır.
Deputatlar bir sıra nazirliklərin, yanacaq-energetika sektoruna daxil olan şirkətlərin fəaliyyətindəki nöqsan və çatışmazlıqlarla bağlı iradlarını söylədilər.
Nazirlər, şirkət rəhbərləri deputatların qaldırdıqları məsələlərə aydınlıq gətirdilər.
İqtisadi inkişaf naziri Fərhad Əliyev müzakirələrdə səslənən tənqid və iradlara öz münasibətini bildirdi.
Milli Məclisin sədri Murtuz Ələsgərov iclasa yekun vurdu. Azərbaycan hökumətinin hesabat dövründəki fəaliyyətinin nəzərə alınması barədə qərar qəbul edildi.