RƏSMİ XRONİKA
MİLLİ MƏCLİSİN DEPUTATI SİRUS TƏBRİZLİNİN ÇIXIŞI
Qədirbilən xalqımız ölkəmizin hər yerində öz ümummilli lideri, dahi dövlət rəhbəri Heydər Əliyevin xatirəsini əbədiləşdirir, ayrı-ayrı müəssisələrə, prospektlərə, küçələrə onun adı verilir, müxtəlif yerlərdə büstləri, heykəlləri ucaldılır. Bütün bunlar uzun illər ömrünü xalqına, vətəninə həsr etmiş böyük şəxsiyyətin həyatın ən ağır mərhələlərində öz xalqına göstərdiyi misilsiz xidmətlərin, böyük əməllərin məntiqi davamıdır.
Bu gün Azərbaycan parlamentində Heydər Əliyevin abidəsinin açılması çox əhəmiyyətli bir hadisədir. Ona görə ki, məhz Azərbaycan tarixinin ağır dövrlərində xalqın nicat tapmasında Heydər Əliyevin parlamentdəki fəaliyyətinin böyük rolu olmuşdur. Xatirinizdədirsə, hələ 1991-ci ilin fevralında ilk dəfə parlamentin kürsüsündən o zamankı Sovetlər Birliyində və Azərbaycanda baş verən acı həqiqətləri Heydər Əliyev açıqladı. Onun dediklərini xalq anladı, onu dəstəklədi. Çox təəssüf ki, bəzi deputatlar onu nəinki anlamadılar, dəstəkləmədilər, hətta o həqiqətlərə görə ona hücumlar etdilər. Çünki o, Azərbaycan, onun torpaqları üçün çalışırdı. Ancaq bir qrup deputat əllərindəki hakimiyyəti itirməmək, digər qismi isə hakimiyyəti qamarlamaq barədə düşünürdü. Lakin daxili və xarici nankorlarımızın, düşmənlərimizin səylərinə baxmayaraq, millət, xalq 1993-cü ilin iyun ayında Heydər Əliyevi əzmlə bu parlamentin rəhbərliyinə gətirdi. Ümummilli liderimiz dörd ay ərzində bu parlamentdə 40 ilə sığmayan işlər gördü. Bu işlərdən ən mühümü qısa bir müddətdə AXC-Müsavat hakimiyyətinin Azərbaycan xalqını saldığı qardaş qırğınından xilas etməsi oldu. O, bu parlamentdə nizam-intizam yaratdı və bütün bunları televiziya vasitəsilə xalqa nümayiş etdirdi. İctimaiyyətimiz bir çox deputatlarımızın daxili aləmini, onların simalarını gördü. Gördülər ki, ayazsevərlər, əbülfəzsevərlər bir an içində bir-bir necə heydərsevərlər oldular. Ən başlıcası isə, bir vaxtlar meydanlarda yalançı qəhrəmanlar kimi üzə çıxıb xalq arasında saxta nüfuz qazananların mənəviyyatı bəyan oldu. Bunun nəticəsində xalq referendumda AXC-Müsavat hakimiyyətinə qətiyyətlə “yox” dedi. Eyni zamanda, o cılız siyasətçilərin müqabilində bütün millət Heydər Əliyevin möhtəşəmliyini, zəkasını, iradəsini, səlis nitqini, vətənini, xalqını sevmək yolunda hər bir çətinliyə qatlaşmasını gördü. Ona görə də qısa bir müddətdə xalq Heydər Əliyevi Prezident kürsüsündə əyləşdirdi. 10 il ərzində Prezident kimi onun necə böyük işlər gördüyünü bütün dünya bildi.
Dünyanın ən mötəbər təşkilatları bunu etiraf etdilər, qiymətləndirdilər. Ən böyük siyasətçilər onun fəaliyyətinə böyük qiymət verdilər. Amma, ən vacibi o idi ki, bu nəhəng siyasətçinin, vətən və xalq yolunda fədakar insanın əməyini sadə insanlar qiymətləndirdilər. Bunun da nəticəsi ötən ilin oktyabr ayında millətin yekdilliklə Heydər Əliyev siyasətinin layiqli davamçısı İlham Əliyevə səs verməsi oldu.
Bəli, bir vaxtlar Heydər Əliyev bu foyedən keçəndə onun əlindən çörək yeyənlər, su içənlər üzlərini sağa-sola çevirirdilər. Budur, tarixin qələbəsi, tarixin hökmü - Heydər Əliyev yenə də bu foyedədir. Yenə onun möhtəşəm duruşu, məğrur baxışları gələcəyə baxır. Amma indi heç kəs onun baxışlarından yan keçə bilməyəcəkdir.
Heydər Əliyev parlamentin foyesində dayansa da, əbədi olaraq Azərbaycan parlamentinin spikeri olacaqdır.