Oktyabrın 17-də Milli Məclisin iclası keçirilmişdir. Milli Məclisin sədri Murtuz Ələsgərov demişdir ki, oktyabrın 15-də keçirilmiş prezident seçkilərinin ilkin nəticələri artıq elan olunmuşdur. Seçkilər son dərəcə yüksək səviyyədə, demokratik, azad və şəffaf keçirilmişdir. Bu nəticələr seçkiləri izləyən dünya parlamentlərinin, beynəlxalq və yerli müşahidəçilərin müsbət rəylərində də öz əksini tapmışdır. Hətta bəzi müşahidəçilər əhalinin səsvermədə iştirakı, prosesin azad və şəffaflığı baxımından seçkilərin bir sıra Avropa ölkələrindən də üstün keçirildiyini qeyd etmişlər. Bugünkü iclasda seçkilərin nəticələri, seçkidən sonrakı ictimai-siyasi vəziyyət və Azərbaycan Respublikası Prokurorluğunun Milli Məclisə ünvanladığı təqdimat müzakirə olunacaqdır. Prokurorluğun təqdimatında Milli Məclisin deputatı İqbal Ağazadə seçkilərdən sonrakı dövrdə törədilmiş iğtişaşların fəal təşkilatçılarından və iştirakçılarından biri olduğuna görə onun deputat mandatından məhrum olunması istənilir.

Respublika Baş prokurorunun birinci müavini Ramiz Rzayev çıxış etmişdir. O demişdir ki, prezident seçkilərində öz məğlubiyyətləri ilə razılaşmayan Müsavat və Ümid partiyalarının üzvləri və onların tora saldıqları adamlar oktyabrın 16-da Bakı şəhərində kütləvi iğtişaşlar törətmişlər. Bu faktla əlaqədar Azərbaycan Respublikası Prokurorluğunda cinayət işi başlanılıb, istintaq aparılır. Həmin cinayət işinin istintaqı ilə əlaqədar Azərbaycan Respublikasının Baş prokuroru Milli Məclisə təqdimatla müraciət etmişdir.

Təqdimatda deyilir: “2003-cü il oktyabrın 16-da saat 11 radələrindən başlayaraq Müsavat Partiyasının başqanı İsa Yunis oğlu Qəmbərovun və “Bizim Azərbaycan Bloku”na daxil olmuş digər partiyaların rəhbərlərinin çağırışları ilə həmin partiyaların üzvləri digər şəxslərlə birlikdə saat 14 radələrində “Sərbəst toplaşmaq haqqında Azərbaycan Respublikası” Qanunun tələblərini pozaraq, Bakı Şəhər İcra Hakimiyyətinin razılığı olmadan Bakı şəhərinin Neftçilər prospektində yerləşən Azərbaycan Muzey Mərkəzinin qarşısında qanunsuz toplaşmış, onları qayda-qanunlara riayət etməyə dəvət edən polis əməkdaşlarının və digər hakimiyyət nümayəndələrinin qanuni tələblərinə tabe olmayaraq onlara qarşı həyat və sağlamlıqları üçün təhlükəli olan zor işlədərək Bakı şəhərinin Azadlıq meydanında, ayrı-ayrı küçələrində kütləvi iğtişaşlar törətmiş, nəticədə Azərbaycan Respublikası DİN-in əməkdaşlarına, Daxili Qoşunların əsgər və zabitlərinə, ayrı-ayrı vətəndaşlara müxtəlif dərəcəli bədən xəsarətləri yetirilmiş, həmçinin vətəndaşların əmlaklarını dağıtmış, polis əməkdaşlarının xidməti istifadəsində olan avtomaşınları əzməklə maddi ziyan vurmuşlar.

Həmin faktlara görə, 2003-cü il oktyabrın 16-da Azərbaycan Respublikası Prokurorluğunda Azərbaycan Respublikası Cinayət Məcəlləsinin 220.1-ci maddəsi ilə cinayət işi başlanmış və istintaq aparılır. Aparılmış istintaqla müəyyən edilmişdir ki, həmin cinayətin təşkilatçılarından və iştirakçılarından biri də 1969-cu ildə Füzuli rayonunda anadan olmuş, azərbaycanlı, Azərbaycan Respublikasının vətəndaşı, Ümid partiyasının sədri, Azərbaycan Respublikası Milli Məclisinin deputatı, Bakı şəhəri Xətai rayonunda 8-ci Dairəvi küçədəki 26 nömrəli evdə yaşayan Ağazadə İqbal Fehruz oğludur. Ağazadənin həmin cinayətdə iştirakı şahidlərin və zərərçəkmiş şəxslərin ifadələri, maddi sübutlar, hadisə yerində çəkilmiş və istintaqın gedişində əldə edilərək götürülmüş videomateriallar və digər materiallarla tam sübuta yetirilmişdir. İqbal Ağazadənin hərəkətlərində Azərbaycan Respublikası Cinayət Məcəlləsinin 220.1-ci və 315.2-ci maddələrinin əlamətləri vardır və o, həmin maddələrlə cinayət məsuliyyətinə cəlb edilməlidir. İqbal Ağazadə Azərbaycan Respublikası Milli Məclisinin deputatı olduğundan, Azərbaycan Respublikası Konstitusiyasının 90-cı maddəsi və “Azərbaycan Respublikası Milli Məclisi deputatının statusu haqqında” Qanunun 12-ci maddəsinə əsasən toxunulmazlıq hüququna malikdir və deputat toxunulmazlığına Milli Məclisin qərarı ilə xitam verilmədən o, cinayət məsuliyyətinə cəlb edilə bilməz. Ona görə də Azərbaycan Respublikası Konstitusiyasının 90-cı maddəsi və “Azərbaycan

Respublikasının Prokurorluq haqqında” Qanunun 10-cu maddəsini rəhbər tutaraq xahiş edirəm, 1969-cu ildə Füzuli rayonunda anadan olmuş, azərbaycanlı, Azərbaycan Respublikasının vətəndaşı, Ümid partiyasının sədri, Azərbaycan Respublikası Milli Məclisinin deputatı, Bakı şəhəri Xətai rayonunun 8-ci Dairəvi küçəsindəki 26 nömrəli evdə yaşayan Ağazadə İqbal Fehruz oğlunun cinayət məsuliyyətinə cəlb edilməsi üçün onun deputatlıq toxunulmazlığına xitam verilməsi məsələsinə baxasınız.”

Oktyabrın 16-da Bakı şəhərində törədilmiş iğtişaşlardan fraqmentlər nümayiş etdirildikdən sonra Milli Məclisin İntizam komissiyasının sədri Kərim Kərimov çıxış etmişdir. O demişdir ki, Milli Məclisin sədri, deputat İqbal Fehruz oğlu Ağazadənin Azərbaycan Respublikası Cinayət Məcəlləsinin 220.1-ci və 315.2-ci maddələri ilə cinayət məsuliyyətinə cəlb edilməsinə icazə verilməsi barədə Baş prokurorun təqdimatını Milli Məclisin Daxili Nizamnaməsinin 22-ci maddəsinə əsasən baxılmaq üçün intizam komissiyasına göndərmişdir. Komissiyada məsələnin müzakirəsindən öncə dəfələrlə İqbal Ağazadəyə müraciət edilmiş, amma o müxtəlif bəhanələrlə iclasa gəlməkdən boyun qaçırmışdır.

Komissiyanın rəyi dinlənildikdən sonra məsələyə öz münasibətlərini bildirən Milli Məclisin komissiya sədrləri, deputatlar Baş prokurorun təqdimatını ölkədə sabitliyi pozmağa cəhd edən qüvvələrə qarşı atılan vacib addım kimi qiymətləndirmişlər. Onlar bildirmişlər ki, oktyabrın 15-16-da ekstremist qüvvələrin törətdikləri cinayət hadisələri təkcə iğtişaş kimi deyil, hakimiyyəti zor gücü ilə ələ almaq və dövlət çevrilişinə cəhd kimi qiymətləndirilməlidir. Prezident seçkilərinin rəsmi nəticələri məlum olunmamışdan qabaq özünü prezident elan edən İsa Qəmbər, onu dəstəkləyən digər partiyalar haqqında çox ciddi tədbirlər görülməlidir. Eyni zamanda, İqbal Ağazədəyə, eləcə də digər təşkilatçılara qarşı, - bu hadisələrdə həm də insan tələfatı baş verdiyini nəzərə alaraq, - Cinayət Məcəlləsinin 220.1-ci və 315.2-ci maddələri ilə deyil, digər maddələrlə cinayət işi qaldırılmalıdır. Deputatlar hüquq-mühafizə orqanlarından işə ciddi yanaşmağı tələb etmişlər.

Müzakirələrdən sonra Respublika Prokurorluğunun təqdimatına əsasən, İqbal Ağazadənin deputat toxunulmazlığının ləğv edilməsi məsələsi səsə qoyulmuş və 93 səs leyhinə olmaqla yekdil qərar qəbul olunmuşdur. (Qərar qəzetdə dərc olunur).

Milli Məclisin sədri Prokurorluğa müraciət edərək işin obyektiv aparılması ilə bağlı deputatların səsləndirdikləri təkliflərin nəzərə alınmasını xahiş etmişdir.

İclasın ikinci yarısında prezident seçkilərindən sonra yaranmış ictimai -siyasi vəziyyət müzakirə olunmuşdur.

Deputatlar bildirmişlər ki, oktyabrın 15-də keçirilən seçkilər, sözün həqiqi mənasında, MDB məkanında ən nümunəvi seçkilər hesab olunmalıdır. Bunu beynəlxalq müşahidəçilər də təsdiq etmişlər. Amma özünü müxalifət adlandıran bəzi radikal qüvvələr uduzduqlarını etiraf etmək əvəzinə, əvvəlcədən bəyan etdikləri kimi, ölkədə qarşıdurma yaratmağa cəhd göstərdilər. Özlərini demokratik müxalifət adlandıran Müsavat, ADP, Ümid və “Bizim Azərbaycan Bloku”na daxil olan digər partiyalar nəinki ölkədə insan hüquqlarını müdafiə etdilər, əksinə millətimizi təhqir etdilər. Onların vandalizmi, saxtakarlığı və dövlətə qarşı düşmənçilik siyasəti nəticəsində qan töküldü. Özlərini söz azadlığının qoruyucusu kimi xalqa sırımaq istəyən bu nadanlar jurnalistlərə qarşı da zor tətbiq etməkdən çəkinmədilər. Bütün bunlar dövlətçiliyimizə qarşı qəsddir.

Türkiyə, Rusiya, İran, Gürcüstan və Ukrayna dövlət başçılarının İlham Əliyevi seçkilərdə qələbə qazanması münasibətilə təbrik etdikləri bir vaxtda, xarici havadarlarının təhriki ilə ölkədə siyasi sabitliyi pozmaq istəyən qüvvələr haqqında ciddi tədbirlər görülməlidir.

Müxalifətin təkcə xaricdən deyil, ölkədə ikili mövqe tutan iş adamları və məmurlar tərəfindən də maliyyələşdirildiyini bildirən deputatlar bu qaynaqların aşkarlanmasını və onlar barəsində də qəti tədbirlərin görülməsini hüquq mühafizə orqanlarından tələb etmişlər.

Çıxışlarda o da bildirilmişdir ki, dağıdıcı müxalifətin himayəsində olan mətbuat vasitələri barəsində də tədbir görülməlidir.

Deputatlar qeyd etmişlər ki, ölkədə baş vermiş qanlı hadisəyə, vandalizmə və vəhşiliyə görə birbaşa İsa Qəmbər, Rəsul Quliyev, Sərdar Cəlaloğlu, İqbal Ağazadə məsuliyyət daşıyırlar. Ona görə də Müsavat, Ümid, ADP və onlarla bir bloka daxil olan digər partiyalar bağlanmalı, əmlakları müsadirə olunaraq dövlət müəssisələrinə, vətəndaşlara, səhmdar cəmiyyətlərinə dəyən ziyanın ödənilməsinə yönəldilməlidir. Həmin partiyaların liderləri barəsində ən ciddi tədbirlər görülməlidir. “Siyasi partiyalar haqqında” və “Kütləvi İnformasiya vasitələri haqqında” Qanunlar yenidən işlənməlidir.

Parlamentin sədri Murtuz Ələsgərov sonda bildirmişdir ki, müxalifətin bütün ekstremist hərəkətlərinin qarşısı qətiyyətlə alınmış, bundan sonra da alınacaqdır. Onlar layiq olduqları cəzalarını alacaqlar. Milli Məclis müzakirə olunan məsələ ilə bağlı qərar qəbul etmişdir.