SİYASƏT
MİLLİ MƏCLİS SEÇKİ MƏCƏLLƏSİNİ ÜÇÜNCÜ OXUNUŞDA QƏBUL ETMİŞDİR
Milli Məclisin mayın 27-də keçirilən iclasında spiker Murtuz Ələsgərov deputatlar adından xalqımızı və Prezidentimiz Heydər Əliyevi Azərbaycan Xalq Cümhuriyyətinin 85 illik yubileyi münasibətilə təbrik etmişdir. Qeyd etmişdir ki, Azərbaycanda demokratiyanın əsasını qoyan və Şərqdə ilk parlamentli respublika olan Xalq Cümhuriyyətinin çox böyük tarixi əhəmiyyəti vardır. Ötən əsrin əvvəllərində yaradılmış demokratik Cümhuriyyət sonradan imperiya qüvvələrinin təsiri və təzyiqi nəticəsində öz müstəqilliyini itirmişdir. Azərbaycan öz müstəqilliyini 1991-ci ildə bərpa etdikdən sonra yenidən bir sıra problemlərlə qabaqlaşmış və müstəqilliyini itirmək təhlükəsi ilə üzləşmişdir. 1993-cü ildə xalqın tələb və təkidi ilə Heydər Əliyev hakimiyyətə qayıtdıqdan sonra Azərbaycanda hüquqi və demokratik dövlət quruculuğu davam etdirilmiş və bu istiqamətdə mühüm nailiyyətlər əldə olunmuşdur. Azərbaycanın dövlət müstəqilliyi Heydər Əliyevin müdrik və uzaqgörən siyasəti sayəsində əbədi və dönməz olacaqdır.
Sonra deputatlar Seçki Məcəlləsinin müzakirəsinə başlamışlar.
Müxalifətdən olan deputat, “Yurddaş” partiyasının sədri Mais Səfərli Milli Məclisin mayın 23-dəki iclasında baş verənlərlə bağlı yenidən müzakirə açmaq istəsə də spiker buna imkan verməmişdir. Murtuz Ələsgərov demişdir ki, Məcəllədəki 33.1 və 38.1 maddələri istisna olmaqla layihə ikinci oxunuşda qəbul olunub. Deputatların narazılığına səbəb olan həmin maddələr Qanun layihəsinin müəllifi olan Prezidentlə razılaşdırılmışdır.
Parlamentin hüquq siyasəti və dövlət quruculuğu məsələləri daimi komissiyasının sədr müavini Əli Hüseynov demişdir ki, razılaşdırılmış layihədə Mərkəzi Seçki Komissiyasının (MSK) bütün üzvləri, Dairə Seçki Komissiyalarının (DSK) sədri və müavinləri 5 il müddətinə, DSK-nın üzvləri və Məntəqə Seçki Komissiyasının (MSK) sədri, müavini və üzvləri isə yalnız seçkilər dövründə əvvəlki iş yerlərindəki əmək haqları da qalmaqla fəaliyyətlərinə görə də əmək haqqı alacaqlar.
Layihə üçüncü oxunuşda qəbul edildikdən sonra deputatlar seçki komissiyalarının təşkili ilə bağlı yeni layihənin müzakirəsinə başlamışlar.
Yeni layihədə bütün siyasi partiyaların istirakı nəzərə alınmaqla MSK-nın - 15, DSK-nın- 9, Məntəqə Seçki Komissiyalarının isə 6 üzvdən təşkil olunması nəzərdə tutulur.
Müzakirələr zamanı deputatlar baryeri aşmayan müxalifət partiyalarının seçki komissiyalarında təmsil olunmalarına şəraitin yaradılmasına narazılıqlarını bildirsələr də, yeni variant 95 səs lehinə olmaqla qəbul olunmuşdur.
İclasın sonunda Milli Məclisin mayın 23-də keçirilmiş iclasında baş verənlərlə bağlı İntizam komissiyasının məlumatı dinlənilmişdir. Baş verənlərə görə deputatlar Əhəd Abiyevə, Əli Kərimliyə, Nizami Quliyevə və İqbal Ağazadəyə qəti xəbərdarlıq edilmişdir.