SİYASƏT
MİLLİ QEYRİ-HÖKUMƏT TƏŞKİLATLARI FORUMUNUN VI QURULTAYI KEÇİRİLMİŞDİR
Dövlət qurumları nümayəndələrinin, Milli Məclisin deputatlarının, beynəlxalq təşkilatların təmsilçilərinin qonaq kimi qatıldığı tədbirdə Azərbaycanın dövlət himni səslənmiş, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla yad edilmişdir. Qurultayın işçi heyəti seçilmiş, gündəlik təsdiq edilmişdir.
Prezidentin İcra Aparatının ictimai-siyasi məsələlər şöbəsinin müdiri Əli Həsənov Azərbaycan Prezidenti İlham Əliyevin qurultaya təbrikini oxumuşdur.
Baş nazirin müavini Əli Həsənov, Milli Məclis sədrinin müavini Bahar Muradova, gənclər və idman naziri Azad Rəhimov, BMT-nin ölkəmizdəki rezident-əlaqələndiricisinin müavini Devid Eyzenberq təbrik nitqi söyləmiş, QHT-lərin ölkəmizin ictimai həyatında fəal iştirakını qeyd etmişlər.
Milli QHT Forumunun prezidenti Azay Quliyevin hesabat məruzəsi dinlənilmişdir.
Qurumun yaradılmasından əsas məqsədin Azərbaycanda QHT sektorunun inkişafını dəstəkləmək, onların pərakəndə fəaliyyətini əlaqələndirmək, habelə qeyri-hökumət təşkilatları ilə dövlət orqanları arasında əməkdaşlığı möhkəmləndirmək olduğunu bildirən A.Quliyev hesabat dövründə görülmüş işlərdən söz açmışdır.
Bildirilmişdir ki, hazırda Azərbaycanda çoxlu sayda QHT fəaliyyət göstərir. Onlar ölkəmizdə demokratik, dünyəvi, hüquqi dövlətin formalaşmasına, insan hüquqlarının qorunmasına, sosial və iqtisadi, o cümlədən qadınların, gənclərin, uşaqların, habelə qaçqın və məcburi köçkünlərin problemlərinin həllinə, elm, təhsil, mədəniyyətin inkişafına və s. yardım etməyə çalışırlar.
Ötən dövrdə üzvlərin sayı 400-ə çatmış, bölgələrdə QHT-lər üçün regional resurs və təlim mərkəzləri, qurumun məlumat bazası yaradılmış, təlim və seminarlar keçirilmişdir. Forum QHT-lər üçün əlaqələndirmə və əməkdaşlıq baxımından əhəmiyyətli rol oynadığını dəfələrlə nümayiş etdirmiş, dövlət orqanlarının, beynəlxalq təşkilatların və bələdiyyələrın etibarlı tərəfdaşına çevrilmişdir.
Qurum Azərbaycan Respublikası Prezidenti yanında Sahibkarlar Şurası, Dövlət Əfv Komissiyası, Əsir və İtkin Düşmüş, Girov Götürülmüş Vətəndaşlarla İş üzrə Dövlət Komissiyası, Məcburi Köçkünlərin Sosial İnkişafı Fondunda ictimaiyyəti təmsil edir, hökumətlə QHT sektoru arasında körpü rolunu oynayır.
A.Quliyev rəhbərlik etdiyi forumun Azərbaycanın milli maraqlarının qorunmasında da yaxından iştirak etdiyini diqqətə çatdırmış, ABŞ və Avropanın 37 ölkəsinin 64 qeyri-hökumət təşkilatının Bakı-Tbilisi-Ceyhan neft kəmərinin maliyyələşdirilməsi əleyhinə apardıqları kampaniyanı ifşa etmək məqsədi ilə 2002-ci ilin iyulunda “BTC neft kəmərinə QHT-lərin münasibəti” mövzusunda tədbir keçirmiş, Azərbaycan, Türkiyə və Gürcüstanın 300-dən çox qeyri-hökumət təşkilatının dəstəyi ilə BTC-yə dəstək aksiyasını reallaşdırmışdır.
Milli QHT Forumunun üzvləri 38 milyon ABŞ dolları dəyərində 1730 layihə həyata keçirmiş, nəticədə 7 minə yaxın iş yeri açılmış, ümumilikdə, 1,5 milyon nəfərə xidmət göstərilmişdir. A.Quliyev qarşıda duran vəzifələrdən, həlli vacib olan problemlərdən söz açmışdır.
Tədbirdə qurumun idarə heyətinin sədri Aydın Kərimov və nəzarət təftiş komissiyasının sədri Ceyhun Hacıbəyovun hesabatları dinlənilmiş, ötən dövrdə Forumun fəaliyyəti qənaətbəxş hesab olunmuş, qurultayın qətnaməsi qəbul edilmişdir.
Gizli səsvermə nəticəsində Azay Quliyev yenidən Azərbaycan Milli Qeyri-Hökumət Təşkilatları Forumunun prezidenti seçilmişdir. Forumun idarə heyəti və nəzarət-təftiş komissiyasının üzvləri də seçilmişdir.
Qurultayda Azərbaycan Prezidenti İlham Əliyevə müraciət qəbul edilmişdir.
Müraciətdə deyilir:
“Möhtərəm cənab Prezident!
Milli Qeyri-Hökumət Təşkilatları Forumunun VI Qurultayına göndərdiyiniz təbrikə və ünvanımıza söylədiyiniz xoş sözlərə görə Sizə dərin minnətdarlığımızı bildirir və bunu Azərbaycanda ictimai sektora göstərdiyiniz diqqət və qayğının təzahürü kimi qiymətləndiririk. Azərbaycan xalqının ümummilli lideri Heydər Əliyevin himayəsi ilə 1997-ci ildə Azərbaycan hökuməti və BMT-nin İnkişaf Proqramının “Azərbaycanda QHT-lərin institusional inkişafı və vətəndaş cəmiyyəti quruculuğuna kömək” layihəsinin həyata keçirilməsi nəticəsində 95 təşkilat tərəfindən təsis edilən Milli Qeyri-Hökumət Təşkilatları Forumu hazırda müxtəlif istiqamətlərdə fəaliyyət göstərən 400-dən çox təşkilatı özündə birləşdirir.
Milli QHT-lərin problemlərinin həllinə çalışan və onların fəaliyyətini əlaqələndirən Milli Qeyri-Hökumət Təşkilatları Forumu ölkənin ictimai həyatında yaxından iştirak edir, bir sıra nüfuzlu dövlət qurumlarında və beynəlxalq forumlarda ictimaiyyəti layiqincə təmsil edir. Azərbaycanın demokratik və qüdrətli dövlətə çevrilməsi digər mühüm amillərlə yanaşı, ölkədə vətəndaş cəmiyyətinin gücündən və müxtəlif ictimai təsisatların bu prosesdə yaxından iştirakından çox asılıdır. İctimai həyatın bütün sahələrində qeyri-hökumət təşkilatları müxtəlif layihələri reallaşdırmış, bir çox problemlərin həllində dövlətə yaxından kömək etmiş, böyük məbləğdə əvəzsiz vəsaiti ölkəmizə cəlb etmişlər.
Görülən işlərin nəticəsində Azərbaycanın bütün regionlarını əhatə edən QHT sektorunda 3 min 900 daimi, 2 min 900 müvəqqəti iş yeri açılmış, 225 min könüllü cəlb olunmuş və bütövlükdə bu sektorun fəaliyyətindən 1,5 milyon nəfər faydalanmışdır.
Dövlətçiliyimizin möhkəmlənməsi, ictimai-siyasi sabitliyin davamlı olması, milli mənəvi və demokratik dəyərlərin qorunması və inkişafı, sosial-iqtisadi və hüquqi islahatların uğurla həyata keçirilməsi, iqtisadiyyatın yüksək sürətlə inkişafı nəticəsində ölkəmiz regionun aparıcı dövlətinə çevrilmişdir.
Son iki il ərzində regionların inkişafı, işsizliyin və yoxsulluğun azaldılması, vətəndaş cəmiyyətinin gücləndirilməsi, ərazi bütövlüyü və suverenliyimizin bərpası istiqamətində apardığınız məqsədyönlü siyasət ölkə ictimaiyyəti tərəfindən təqdir olunur.
İnanırıq ki, Sizin diqqət və qayğınız nəticəsində bütün sahələrdə olduğu kimi, qeyri-hökumət təşkilatları sektorunun qarşılaşdığı bütün problemlər və çətinliklər də öz həllini tapacaq, Azərbaycanda vətəndaş cəmiyyəti quruculuğu yeni inkişaf mərhələsinə qədəm qoyacaqdır.
Cənab Prezident!
Qurultay nümayəndələri Sizi əmin edir ki, Milli Qeyri-Hökumət Təşkilatları Forumu hər zaman olduğu kimi, bundan sonra da ölkəmizin inkişafı, dövlətimizin güclənməsi və xalqımızın rifahı naminə gördüyünüz bütün işlərdə Sizə dəstək olacaq, bu istiqamətdə üzərinə düşən vəzifələri layiqincə yerinə yetirməyə çalışacaqdır”.