AZƏRTAC xəbər verir ki, Cəmahiriyyə İnformasiya Agentliyinin yaydığı məlumata görə, Liviya rəhbəri Müəmmər Qəzzafi şahmat qrossmeysteri adına layiq görülmüşdür. Bunu Tripolidə 17-ci dünya çempionatı başa çatdıqdan sonra Beynəlxalq Şahmat Federasiyasının (FİDE) prezidenti Kirsan İlyumjinov bildirmişdir.

K.İlyumjinov demişdir ki, Liviya lideri bu adı FİDE tarixində ilk dəfə olaraq Afrikada keçirilən dünya çempionatının təşkilinə göstərdiyi köməyə görə qazanmışdır.

Müəmmər Qəzzafiyə qrossmeyster adı verilməsi haqqında sənədlər onun oğluna, Aralıq dənizi Ölkələri Şahmat Federasiyasının prezidenti Məhəmmədə təqdim edilmişdir.

Xatırladaq ki, 17-ci dünya çempionatı özbək Rüstəm Qasımcanovun qələbəsi ilə başa çatmışdır. Finalda o, ingilis Maykl Adamsı məğlubiyyətə uğratmışdır. FİDE versiyası üzrə dünya çempionu 100 min dollar və Müəmmər Qəzzafinin kubokunu almışdır.