SİYASƏT
MÜXALİFƏTİN QANUNSUZ AKSİYALARINA VƏ POZUCULUQ HƏRƏKƏTLƏRİNƏ QARŞI ETİRAZ MİTİNQİ KEÇİRİLMİŞDİR
Universitetin rektoru, professor Bəhlul Ağayev mitinqi açaraq dedi ki, 15 oktyabr prezident seçkilərində xalqımız müdriklik göstərərək düzgün seçim etmiş, öz xoşbəxt gələcəyinə səs vermişdir.
Tam demokratik və şəffaf keçən seçkilərdə görkəmli dövlət xadimi Heydər Əliyevin siyasi xəttinin layiqli davamçısı, Baş nazir İlham Əliyevin böyük səs çoxluğu ilə qalib gəldiyini vurğulayan rektor bu qələbə ilə barışmayan, xalqın iradəsinə qarşı çıxan azğın müxalifət qüvvələrinin oktyabrın 16-da Bakıda milli mentalitetimizə uyğun olmayan zorakılıq, iğtişaşlar törətdiyini və beləliklə əhalinin dincliyini və rahatlığını pozduğunu söyləmiş və onların bu vəhşiliklərinə qarşı öz kəskin etirazını bildirmiş, törətdikləri cinayətlərə görə ciddi cəzalandırılmalarını tələb etmişdir.
Təhsil naziri Misir Mərdanov mitinqdə çıxış edərək ölkəmizin tarixində əlamətdar hadisə olan 15 oktyabr prezident seçkilərində ümummilli liderimiz Heydər Əliyevin layiqli davamçısı İlham Əliyevin çox böyük üstünlüklə qalib gəldiyini vurğulamış və bunu xalqın böyük qələbəsi kimi diqqətə çatdırmışdır.
Müdrik dövlət xadimi Heydər Əliyevin siyasi xəttinin Azərbaycanda daim davam etdiriləcəyinə əminliyini bildirən nazir ölkəmizin inkişafına əngəl törədən müxalifət qüvvələrinin, xüsusilə Müsavat Partiyasının üzvlərinin və onların tərəfdarlarının şəhərimizdə törətdikləri insanlığa sığmayan hərəkətlərini qətiyyətlə pisləmiş, bununla onların heç vaxt heç nəyə nail ola bilməyəcəyini söyləmişdir.
Digər çıxış edənlər də xalqımızın böyük öndəri Heydər Əliyevin siyasi xəttini dəstəklədiklərini diqqətə çatdırmış, 1992-ci ildə olduğu kimi, ölkədə sabitliyi, asayişi pozmağa, özbaşınalıq yaratmağa, dövlət çevrilişi etməyə cəhd göstərən müxalifət qüvvələrinin dağıdıcı hərəkətlərinə qarşı öz etirazlarını bildirmiş, onların məsuliyyətə cəlb edilməsini müvafiq orqanlardan tələb etmişlər.
Mitinqdə bəyənat qəbul edilmişdir. Bəyənatda deyilir:
“Azərbaycan müstəqilliyini bərpa etdikdən sonra AXC-Müsavat cütlüyü hakimiyyəti ələ keçirdi. Onların hakimiyyəti dövründə xalqımız min bir bəlalara düçar oldu, vətəndaş qarşıdurması baş verdi. Belə bir şəraitdə böyük siyasətçi, milli liderimiz Heydər Əliyev 1993-cü ildə xalqın təkidi ilə ikinci dəfə hakimiyyətə gəldi. Onun gəlişi ilə ölkədə əmin-amanlıq yarandı, siyasi sabitlik əldə olundu, ölkəmiz dünyada hüquqi, demokratik dövlət kimi tanındı. Heydər Əliyevin rəhbərliyi altında dövlətimiz möhkəmləndi, ordumuz gücləndi, siyasi sabitlik yarandı, iqtisadi inkişaf əldə edildi. Xalqın həyat tərzi yaxşılaşmağa başladı. Bütün bunlar xalqımızın işıqlı gələcəyindən xəbər verir.
Ölkəmizdə 2003-cü il oktyabrın 15-də prezident seçkiləri keçirildi. Bu seçkilərdə Heydər Əliyev siyasi xəttinin layiqli davamçısı, respublikamızın Baş naziri İlham Əliyev inamla qələbə çalaraq prezident seçildi.
İlham Əliyevin bu inamlı qələbəsi Heydər Əliyevin siyasi xəttinin qələbəsidir. İlham Əliyevin demokratik yolla prezident seçilməsi inkişaf etmiş dünya dövlətləri tərəfindən dəstəkləndi. ABŞ Dövlət Departamenti, Rusiya, Ukrayna, Gürcüstan, Türkiyə, eləcə də digər xarici ölkələrdən gələn müşahidəçilər ölkəmizdə keçirilən prezident seçkilərini ədalətli, şəffaf, demokratik seçkilər adlandırdılar.
Demokratik və şəffaf seçkilər dağıdıcı, xarici ölkələrdən maliyyələşən Müsavat Partiyasının rəhbəri İsa Qəmbəri qane etmədi. Haqqın qələbəsi Müsavat Partiyasını siyasi iflasa uğratdı. Lakin biabırcasına məğlub olan İsa Qəmbər vandalizm yolunu seçdi, onun təhriki ilə 2003-cü il oktyabrın 15-i axşam saat 10-dan sonra Bakı şəhərində əhalinin dinc həyat şəraiti pozuldu. Bir qrup müsavatçı oktyabrın 16-da daş-kəsək, kəsici alətlərlə silahlanaraq şəhərimizin əmin-amanlığını pozmağa cəhd göstərdi. Azğınlaşmış müsavatçılar Bakı şəhərində vandalizm törətdilər. İsa Qəmbərin və onun yaxın ətrafının təhriki ilə Bakının mərkəzində törədilən iğtişaşlar mülki əhaliyə və inzibati binalara böyük zərər vurdu. Onların bu hərəkətləri birmənalı şəkildə lənətə layiqdir.
Müsavat Partiyası və himayəsində olan “Yeni Müsavat” qəzeti bütün fəaliyyətlərini yalan və şantaj üzərində qurmuşdur. Onun fəaliyyəti xalqımızın milli mentalitetinə tamamilə yaddır. Oktyabrın 15-də Müsavat Partiyasının qərargahında “Lider” televiziyasının müxbiri Sahil Kərimlinin vəhşicəsinə döyülməsi bu partiyanın iç üzünü açıb göstərdi.
1993-cü ildə cinayət törədən İsa Qəmbər və onun ətrafındakıların cəzasızlığı bugünkü hadisələrin baş verməsinə səbəb oldu.
Müsavat Partiyasının qərargahı Azərbaycan Dövlət Pedaqoji Universitetinin yaxınlığında yerləşir. Tez-tez burada mitinqlərin keçirilməsi tədris prosesinə mənfi təsir göstərməklə yanaşı, gənclərin tərbiyəsini də pozur. Məhz bunun nəticəsidir ki, oktyabrın 16-da Müsavat Partiyasının törətdiyi iğtişaşlar nəticəsində universitetdə nəinki tədris prosesi pozulmuş, hətta ali təhsil ocağımızın binasına xeyli ziyan dəymiş, qapı və pəncərələr sındırılmışdır.
ADPU-nun çoxminli professor-müəllim və tələbə kollektivi Bakı şəhərində törədilən vandalizmi, vəhşiliyi lənətləyir, Müsavat Partiyası və “Yeni Müsavat”, “Azadlıq“, “Hürriyyət”, “Müxalifət” “Bakı xəbərləri” qəzetlərinin fəaliyyətinin dayandırılmasını və cinayətlərin təşkilatçılarının ciddi cəzalandırılmasını hüquq-mühafizə orqanlarından tələb edir”.