Bakı, 16 iyun, AZƏRTAC

Azərbaycan Şahmat Federasiyasının (AŞF) prezidenti, Beynəlxalq Şahmat Federasiyasının vitse-prezidenti Mahir Məmmədov AŞF-nin mətbuat xidmətinə müsahibə verib.

AZƏRTAC xəbər verir ki, federasiya rəsmisi Azərbaycanın işğaldan azad olunan torpaqlarında beynəlxalq şahmat turnirinin keçiriləcəyi ilə bağlı məlumat verib: “Bu gün tarixi torpaqlarımızda beynəlxalq yarışlar keçirmək imkanımız var. Buna görə Müzəffər Ali Baş Komandan İlham Əliyevə və Azərbaycan Ordusuna təşəkkür etmək istəyirəm. Tarixi qələbənin qəhrəmanları hər zaman bizim yaddaşımızdadır. Allah şəhidlərimizə rəhmət eləsin, qazilərimizə şəfa versin”.

Federasiya rəhbəri böyük qürurla tarixi Şuşada şahmat turnirinin keçiriləcəyini söyləyib. Qarabağ xanlığının sonuncu varisi, görkəmli şairə və xeyriyyəçi Xurşidbanu Natəvanın 190 illiyinə həsr olunacaq beynəlxalq turnirin təşkilatı məsələləri üzərində işin başladığını, təşkilati işlərdə Gənclər və İdman Nazirliyi ilə yanaşı, Şuşa Şəhəri Dövlət Qoruğu İdarəsinin də yaxından iştirak edəcəyini bildirən M.Məmmədov qadın və kişi şahmatçılar arasında təşkil olunacaq turnirin rapid və blits formatında olacağını vurğulayıb: “Şuşada keçiriləcək beynəlxalq turnirində ölkəmizin və dünyanın məşhur şahmatçılarının iştirakı planlaşdırılır”.

60 yaşdan yuxarı şahmatçılar arasında ölkə çempionatının açılış mərasimində veteran şahmatçılarla görüşündən danışan federasiya rəhbəri gələcəkdə veteran şahmatçılarla bağlı planlardan danışıb: “Biz daim veteran idmançılarımızı diqqətdə saxlayırıq. Bundan sonra da onların yarışlarda iştirakına kömək edəcəyik. Veteran şahmatçıların Azərbaycan çempionatında mükafat fondu üç dəfə artırılıb. Qaliblər ölkəmizi beynəlxalq arenada təmsil etmək imkanı qazanacaqlar. Kişi və qadınlar arasında ən yüksək nəticə göstərən iştirakçı FİDE tərəfindən təşkil olunan dünya çempionatına göndəriləcək. Elmira Əliyeva yeganə xanım iştirakçı olduğuna görə, onun dünya çempionatında iştirakı dəqiqləşib. Veteranların yarışında ikinci yeri tutan iştirakçı isə Moskvada MDB ölkələrinin çempionları arasında baş tutacaq turnirdə mübarizə aparacaq. Veteranların yarışında əvvəllər şahmatı özünün əsas işi hesab edən peşəkarlar və həm də həvəskar iştirakçılar mübarizə aparır. Buna görə veteranlar həvəskar iştirakçıların nəticələrini nəzərə almağı xahiş etdilər. Bu amil mütləq nəzərə alınacaq və yekunda xüsusi nominasiya üzrə ən yaxşı iştirakçı təltif olunacaq”.

Mahir Məmmədov milli komandanın üzvü Şəhriyar Məmmədyarovun Norveçin Stavanger şəhərində keçirilən "Norway Chess" turnirindəki çıxışı ilə bağlı fikirlərini də bölüşüb. O, son aylar şahmatçının demək olar ki, istirahətə vaxtı olmadığını, ardıcıl böyük turnirlərdə iştirak etdiyini diqqətə çatdırıb: “Şəhriyar Məmmədyarov yüksək səviyyəli şahmatçı olduğuna görə, çoxlu sayda dəvət alır. Onların arasında, həm FİDE Qran-Prisini, həm Grand Chess Tour kimi yarışları qeyd etmək olar. Ardıcıl turnirlərdə iştirakına baxmayaraq Şəhriyar nailiyyətlərini artırmağı bacarır. Son illərin ən böyük turnirlərindən sayılan "Norway Chess" çox məşhur yarışlardan biridir. Şahmatçımız mötəbər turniri qalib başa vurmağa çox yaxın idi. Püşkə əsasən, son turda milli komandadakı yoldaşı Teymur Rəcəbovla mübarizə apardı. Fikrimcə, bizim şahmatçılar çox ağır, psixoloji vəziyyətdə qalmışdılar. İnanıram ki, ədalətli mübarizə apardılar. Azərbaycan şahmatçılarının duelində sonda Teymur qalib gəldi. Amma idmanda istənilən nəticə ola bilər. Şəhriyar qalib gəlsəydi, yenə də tənqidçilər fərqli fikir söyləyəcəkdilər. Bununla belə, ikinci yeri tutan Şəhriyar karyerasının ən gözəl yarışlarından birini keçirdi”.

Federasiya rəsmisi Beynəlxalq Şahmat Federasiyasında rəhbər vəzifələrə seçkilərlə bağlı fikirlərini də açıqlayıb. O qeyd edib ki, əvvəlki illərdən fərqli olaraq seçkilər gərgin keçəcək. Ali şahmat qurumunun prezidenti postuna 4 müxtəlif komanda iddia edir. Arkadi Dvorkoviç son 4 ildə işini peşəkar səviyyədə əyani olaraq nümayiş etdirdi. Böyük şahmat ailəsini idarə edəcək bacarığa malik rəhbər olduğunu sübut edib. Vurğulayıb ki, A. Dvorkoviçin seçki komandasında hindistanlı dünya çempionu Vişvanatan Anandın olması mühüm amildir.

M.Məmmədov iddiaçılar turnirində Azərbaycan şahmatçısı Teymur Rəcəbovun şanslarını qiymətləndirib: “Teymurun çətinliyi ondan ibarətdir ki, çox az yarışda iştirak edir. Az oynamağının obyektiv səbəbləri var, onları açıqlamaq istəməzdim. Oyun praktikası baxımından Stavanger turnirində iştirakı çox vacib idi. İddiaçılar turnirində rəqiblərin hamısı təcrübəlidir, dünyada tanınan böyük ustalardır. Teymuru gərgin mübarizə gözləyir. Hazırlıqla bağlı dövlətimiz və federasiya tərəfindən bütün lazımi işlər görülüb”.

Federasiya rəsmisi Naxçıvanda təşkil olunacaq 16 yaşlılar arasında Ümumdünya Şahmat Olimpiadası ilə bağlı da fikirlərini bildirib. O, yaxın günlərdə Təşkilat Komitəsinin formalaşacağını bildirib. Qeyd edib ki, oktyabrda keçiriləcək olimpiadada təxminən 50-dək komandanın iştirakı gözlənilir.