Tokio, 18 noyabr, AZƏRTAC

Malayziyada noyabrın 19-da keçiriləcək ümumi seçkilər ərəfəsində davam edən gərginlik fonunda “Pakatan Harapan” koalisiyasına rəhbərlik edən Ənvər İbrahim liderliyini saxlamaq üçün seçkiqabağı kampaniyada fəallığını artırıb.

AZƏRTAC xəbər verir ki, şənbə günü Malayziyada keçiriləcək sayca 15-ci ümumi seçkilər bu Cənub-Şərqi Asiya ölkəsinin 1957-ci ildə əldə edilmiş müstəqillik tarixində ən gərgin seçkilər olacaq. Bildirilir ki, ictimai rəy sorğularına əsasən, ümumi seçkilərdə hər hansı partiyanın və ya koalisiyanın hökuməti formalaşdırmaq üçün kifayət qədər yer əldə edəcəyini söyləmək çətindir.

Bununla yanaşı, keçirilən sorğular Malayziyanın ən uzunmüddətli liderinin 25 illik varisi yolunu keçən, sodomiya və korrupsiyaya görə 9 il həbs cəzası çəkən, amma hazırda ölkənin aparıcı müxalifət qüvvəsinin liderinə çevrilən Ənvər İbrahimin hakimiyyəti qazanmaq şansının daha çox olduğunu deməyə əsas verir.

Hazırda Malayziyanın Baş naziri İsmail Yakob Sabrinin rəhbərlik etdiyi “Barisan Nasional” ittifaqı məhz ötən il keçirilən iki sorğuda üstünlük əldə etdiyinə, rəqibləri isə parçalandığına görə qalib gələ bilib.

Böyük Britaniyanın “YouGov” tədqiqat mərkəzinin noyabrın 16-da keçirdiyi son sorğunun nəticələrinə görə, Ənvər İbrahimin rəhbərlik etdiyi “Pakatan Harapan” koalisiyasının parlamentdəki yerlərin 35 faizini əldə edəcəyi bildirilir. Həmin sorğu nəticəsində, həmçinin sabiq Baş nazir Muhiddin Yassinin rəhbərlik etdiyi “Perikatan” alyansının yerlərin 20 faizinə yiyələnəcəyi qeyd edilir. “Barisan Nasional”ın isə cəmi 17 faiz yer qazanacağı gözlənilir.

Sabiq maliyyə naziri olan Ə.İbrahimin əsasən böyük mitinqlərdə kütlə qarşısına çıxdığı, bu zaman siyasi sabitliyi təmin etməklə yanaşı, əksəriyyəti müsəlmanlar olan malaylarla digər etnik qruplar arasındakı fikir ayrılığını aradan qaldıracağını, həmçinin iqtisadi sabitliyə və bunun sayəsində yeni iş yerlərinin açılmasına və investisiya qoyuluşuna nail olacağı barədə vədlər verdiyi bildirilir.

Noyabrın 17-də seçicilər qarşısına çıxan Ə.İbrahim bildirib ki, bu seçkilər yalnız baş nazirin əvəz olunmasını nəzərdə tutmur. Bu seçkilər ölkəni xilas etmək üçün bir şans, əziz xalqımızın dirçəlişi üçün radikal dəyişikliklərə imkan yaradan addımdır.

Qeyd edək ki, Ə.İbrahimin başçılıq etdiyi “Pakatan Harapan” koalisiyası müxtəlif etnik qrupları birləşdirdiyi halda, Muhiddin Yassinin rəhbərlik etdiyi “Barisan Nasional” əsasən malayların maraqlarına prioritet verir. Qeyd edək ki, irqi və dini ayrı-seçkilik etnik çinlilərin və hindistanlıların elektoratın 30 faizini təşkil etdiyi çoxmillətli Malayziyada parçalanmaya səbəb olur.

Analitiklərin bildirdiyinə görə, digər bloklar Ə.İbrahimin rəhbərlik etdiyi koalisiyaya qarşı birləşəcəyi halda onun qələbəsi mümkün olmaya bilər. Lakin digər iki koalisiya arasında olan fikir ayrılığı və Ə.İbrahimin yeni müttəfiqlər cəlb etməsi, onun üstünlüyünü təmin edər.

Bununla yanaşı, “Merdeka Center” müstəqil ictimai rəy sorğusu mərkəzinin bildirdiyinə görə, seçicilərin 15-faizdən 30 faizədək olan hissəsinin hələ də öz mövqeyini müəyyən etməməsi əvvəlcədən qalibin adını çəkməyə çətinlik yaradır.

Xatırladaq ki, hazırda əsas müxalifət qüvvələrinin lideri olan Ə.İbrahim 2018-ci ildə sabiq Baş nazir Mahathir Məhəmməd ilə birləşərək seçkilərdə qalib gəldikdən sonra həbsdən azad edilib. Həmin vaxt MDB fondu ilə əlaqədar baş verən çoxmilyardlıq qalmaqal Malayziyada uzun müddət fasiləsiz şəkildə hakimiyyətdə olmuş “Barisan Nasional”ın seçkilərdə ağır məğlubiyyəti ilə başa çatıb.

Həmin vaxt ikinci dəfə Baş nazir vəzifəsini tutan Mahathir Məhəmməd iki il ərzində hökuməti Ənvər İbrahimə ötürəcəyini vəd etsə də, 22 aydan sonra koalisiyanın parçalanması bu planı yarımçıq qoyub. Muhiddin Yassin Baş nazir təyin edilsə də, onun hökuməti ötən il dağılıb və İsmail Yakob Sabrinin başçılıq etdiyi “Barisan Nasional” yenidən hakimiyyətə qayıdıb.

Vüqar Ağayev

AZƏRTAC-ın xüsusi müxbiri

Tokio