SİYASƏT


Malik Həsənov: Üçüncü Brüssel görüşü Azərbaycanın növbəti qələbəsidir

Bakı, 24 may, AZƏRTAC

Tarixi Zəfərimizin yaratdığı reallıqların qəbulu istiqamətində atılan addımlar Azərbaycanın qalib ölkə kimi möhkəmlənən mövqeyinə işıq salır. Belə ki, bölgədə dayanıqlı sülhün və təhlükəsizliyin təmin olunması üçün Azərbaycanla Ermənistan arasında münasibətlərin normallaşdırılmasının vacibliyini qeyd edən dünya gücləri bunun üçün dəstəklərini göstərməyə hazır olduqlarını bildirirlər. Ötən il Moskva və Soçi görüşlərinin ardınca reallaşan Brüssel görüşü sülh gündəliyinin formalaşması ilə yadda qaldı. Avropa İttifaqı Şurasının Prezidenti Şarl Mişelin təşəbbüsü ilə keçirilən Brüssel görüşlərinin davamlılığı qurumun vasitəçilik səylərini artırmaq istəyini nümayiş etdirir. Mayın 22-də Avropa İttifaqı Şurasının Prezidenti Şarl Mişel, Azərbaycan Prezidenti İlham Əliyev və Ermənistanın baş naziri Nikol Paşinyanın Brüsseldə sayca üçüncü üçtərəfli görüşü baş tutdu. Hər bir görüş qarşıya qoyulan məqsədə nail olmaqda öz sözünü deyir. Bu baxımdan digər görüşlər kimi üçüncü Brüssel görüşü də müzakirə olunan məsələlərin əhatəliliyi və yekun nəticə baxımından diqqətçəkəndir. Müzakirələrdə əsas məqamlardan biri heç bir halda “Dağlıq Qarabağ” ifadəsinin işlədilməməsi oldu. Artıq dünya gücləri postmünaqişə dövrünün reallıqlarını qəbul edir, Dağlıq Qarabağ münaqişəsinin tarixə qovuşması fonunda regionda yeni reallıqların həyata keçirilməsində maraqlıdırlar. Bu günün əsas məsələsi sülh müqaviləsinin imzalanması, gələcəyə doğru addımların atılmasıdır. Bu addımlar öz növbəsində bölgədə etimad mühitinin yaradılmasına öz müsbət təsirini göstərəcək.

Bu fikirləri AZƏRTAC-a Milli Məclisin deputatı Malik Həsənov bildirib.

Malik Həsənov qeyd edib ki, Avropa İttifaqı Şurasının Prezidenti Şarl Mişelin mayın 22-də keçirilən üçtərəfli görüşün yekunu ilə bağlı mətbuata açıqlamasında yer alan məqamlardan biri indiki halda yalnız Qarabağda yaşayan erməni əhalisinin təhlükəsizliyi və hüquq məsələləri oldu: “Azərbaycan tolerant ölkədir. Müxtəlif xalqların, millətlərin nümayəndələri ölkəmizdə mehriban dostluq və qardaşlıq şəraitində yaşayırlar. Ermənilər də bütün digər etnoslar kimi eyni bərabər hüquqlara malikdirlər. Bu, Azərbaycanın prinsipial mövqeyidir. Azərbaycandan fərqli olaraq Ermənistan monoetnik ölkədir, orada ermənilərdən başqa heç kim yoxdur. Artıq bu faktın özü hazırkı mərhələdə bir çox məqamlara aydınlıq gətirir.”

“Dövlətimizin başçısı İlham Əliyevin istər Avropa İttifaqı Şurasının Prezidenti Şarl Mişel ilə keçirdiyi təkbətək görüşdə, istərsə də üçtərəfli görüşün nəticələrində işğaldan azad edilmiş ərazilərimizin minalardan təmizlənməsi prosesi və itkin düşmüş şəxslərin taleyi ilə bağlı məsələlər əsas müzakirə mövzularından oldu”, - söyləyən M.Həsənov vurğulayıb ki, torpaqlarımızda bərpa-quruculuq işlərinə mane olan əsas amil minalardan təmizlənmə prosesinin çox vaxt tələb etməsidir: “Azərbaycan tərəfi beynəlxalq hüquq çərçivəsində dəfələrlə işğalçı Ermənistandan həmin ərazilərin mina xəritələrini tələb etdi. Ermənistan rəhbərliyi öncə belə xəritələrin onlarda olmamasını iddia etsə də Azərbaycan dövlətinin ciddi səyləri nəticəsində təqdim etmək məcburiyyətində qaldı. Amma həmin xəritələrin dəqiqlik göstəricisi 25 faizə yaxındır. Hər addımında tarixi Zəfərimizi həzm edə bilmədiyini qabarıq şəkildə büruzə verən Ermənistan ölkəmizin hansı imkanlara malik olduğunu yaxşı bilir. İlyarımdır işğaldan azad edilmiş ərazilərimizdə aparılan bərpa-quruculuq işlərinin miqyasına diqqət yetirmək kifayətdir. Azərbaycan bütün işləri öz maliyyə imkanları hesabına görür. Çox böyük vəsait tələb edən minaların təmizlənməsi prosesi də ölkəmizin maliyyə imkanlarının təqdimatında mühüm rol oynayır. İşğalçı Ermənistan heç bir halda beynəlxalq hüququ nəzərə almadığı, bu prinsipləri kobud şəkildə pozduğu halda hansısa sanksiya ilə üzləşmədiyi üçün mina xəritələri ilə yanaşı, 4000-ə qədər soydaşımızın Birinci Qarabağ müharibəsində taleyi ilə bağlı məsələdə də Azərbaycana açıqlama vermək istəmir”.

M.Həsənov qeyd edib ki, 6 aprel görüşündə olduğu kimi, bu görüşün də nəticəsində yer alan əsas məqamlardan biri budur ki, sərhəd məsələləri ilə bağlı sərhəd komissiyalarının birinci birgə iclası dövlətlərarası sərhəddə yaxın günlərdə baş tutacaq. Bu iclasda sərhədin delimitasiyası və sabit vəziyyətin ən yaxşı şəkildə necə təmin edilməsi ilə bağlı bütün məsələlərə toxunulacaq.

Diqqəti Prezident İlham Əliyevin 2022-ci il 23 may tarixli “Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının yaradılması haqqında” Sərəncamına yönəldən deputat bildirib ki, Azərbaycan istər 2020-ci il 10 noyabr tarixli üçtərəfli Bəyanatda, eyni zamanda, digər görüşlərin yekun sənədində əksini tapan hər bir öhdəliyi uğurla yerinə yetirərək regionda dayanıqlı sabitliyə və təhlükəsizliyə nail olmaq istəyini təsdiqləyir. Təbii ki, Ermənistan da bu öhdəliklərə əməl etməlidir ki, sülh müqaviləsinin imzalanması reallaşsın.

M.Həsənov üçüncü Brüssel görüşünü də Azərbaycanın qələbəsi kimi dəyərləndirərək deyib: “Müzakirə olunan bütün məsələlərdə Azərbaycanın mövqeyi dəstəklənir. Azərbaycanla Ermənistan arasında münasibətlərin normallaşdırılması üçün səylərini artıran Avropa İttifaqının vasitəçiliyi ədaləti və beynəlxalq hüququ özündə ehtiva edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.