İQTİSADİYYAT


Maliyyə Nazirliyi 6 ayda dövlət büdcəsinin icrasına dair məlumat yayıb

Bakı, 18 iyul, AZƏRTAC

Bu ilin 6 ayında dövlət büdcəsinin mədaxili 10 milyard 405,5 milyon manat, xərcləri 10 milyard 951 milyon manat olub, 545,5 milyon manat məbləğində dövlət büdcəsinin kəsiri (defisit) yaranıb.

Maliyyə Nazirliyinin mətbuat xidmətindən AZƏRTAC-a bildirilib ki, yarım ildə dövlət büdcəsinin mədaxili 10 milyard 405,5 milyon manat icra olunub, bu da ötən ilin eyni dövrü ilə müqayisədə 6 faiz və yaxud 590,2 milyon manat çoxdur.

Vergilər Nazirliyi tərəfindən dövlət büdcəsinə 3 milyard 632,8 milyon manat vəsait daxil olub ki, bu da keçən ilin müvafiq dövrü ilə müqayisədə 7,4 faiz və ya 250,3 milyon manat çoxdur. Həmin vəsaitin 70,1 faizi və yaxud 2 milyard 245,3 milyon manatı qeyri-neft sektorundan daxilolmaların payına düşür ki, bu da ötən ilin eyni dövrü ilə müqayisədə 318,8 milyon manat və ya 14,3 faiz çoxdur.

Hesabat dövründə Dövlət Gömrük Komitəsi tərəfindən dövlət büdcəsinə 2 milyard 65,2 milyon manat vəsait təmin edilib ki, bu da ötən ilin eyni dövrü ilə müqayisədə 27,6 faiz və yaxud 446,2 milyon manat çoxdur. Dövlət büdcəsindən maliyyələşdirilən təşkilatların ödənişli xidmətlərindən daxilolmaları 234,4 milyon manat təşkil edib ki, bu da keçən ilin müvafiq dövrü ilə müqayisədə 30,9 faiz və ya 55,5 milyon manat çoxdur.

Sair daxilolmalar üzrə büdcəyə 60,1 milyon manat vəsait daxil olub. Azərbaycan Respublikasının Dövlət Neft Fondundan dövlət büdcəsinə 4 milyard 413 milyon manat vəsait transfert edilib. Bu ilin aprel-iyun ayları üzrə dövlət büdcəsinin mədaxil proqnozu 4 milyard 965,8 milyon manat icra olunub.

Cari ilin 6 ayında dövlət büdcəsinin xərcləri 10 milyard 951 milyon manat icra olunub ki, bu da 2018-ci ilin eyni dövrü ilə müqayisədə 15 faiz və ya 1 milyard 426,7 milyon manat çoxdur.

İqtisadi təsnifata uyğun olaraq cari ilin ilk 6 ayında dövlət büdcəsi xərclərinin 36,1 faizi və ya 3 milyard 953,7 milyon manatı sosialyönümlü xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib ki, bu da ötən ilin eyni dövrü ilə müqayisədə 9 faiz və ya 328 milyon manat çoxdur. Yarım ildə dövlət büdcəsi xərclərinin 5 milyard 621 milyon manatı və ya 51,3 faizi cari xərclərə, 3 milyard 941,6 milyon manatı və ya 36 faizi əsaslı xərclərə, 1 milyard 388,4 milyon manatı və ya 12,7 faizi dövlət borcuna və öhdəliklərinə xidmətlə bağlı xərclərə yönəldilib.

Aprel-iyun ayları üzrə dövlət büdcəsinin xərcləri 5 milyard 891,8 milyon manat icra olunub ki, bu da ötən ilin eyni dövrü ilə müqayisədə 775,5 milyon manat və ya 15,2 faiz çoxdur.

Altı ayda icmal büdcənin gəlirləri 17 milyard 583,1 milyon manat olub ki, bu da ötən ilin eyni dövrü ilə müqayisədə 2 milyard 467,6 milyon manat və ya 16,3 faiz çoxdur. İcmal büdcənin xərcləri 11 milyard 682 milyon manat icra olunub ki, bu da keçən ilin müvafiq dövrü ilə müqayisədə 839 milyon manat və ya 7,7 faiz çoxdur. İcmal büdcədə 5 milyard 901,1 milyon manat büdcə artıqlığı (profisit) yaranıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.