İDMAN


Maradona Messiyə Argentina yığmasına qayıtmamağı məsləhət görüb

Bakı, 1 oktyabr, AZƏRTAC

İspaniyanın “Barselona” klubunun hücumçusu Lionel Messi Argentina yığmasına qayıtmamalıdır, çünki milli komandanın bütün uğursuzluqlarında onu ittiham edirlər. Messiyə bu məsləhəti 1986-cı ildə Argentina yığması tərkibində dünya çempionu olmuş Dieqo Maradona verib.

AZƏRTAC “Qazeta.ru” saytının “FourFourTwo” portalına istinadla dərc etdiyi məqaləyə istinadla xəbər verir ki, Rusiyada keçirilmiş futbol üzrə dünya çempionatında Argentina yığması 1/8 finala qədər gəlib və sonradan çempion titulunu qazanmış fransızlara 3:4 hesabı ilə məğlub olub. Çempionatdan sonra Messi yığma komandaya dəvət edilməyib. O, sentyabrda keçirilən yoldaşlıq matçlarında, İraq və Braziliya komandaları ilə oyunlarda iştirak etməyib.

“İstəyirəm ki, Messi heç kəsə məhəl qoymasın. Argentinanın dünya çempionu olmamasında onun günahı yoxdur. Bəli, bizim bütün ümidlərimiz onunla bağlı idi, lakin at yarışlarında olduğu kimi, sizin birinci olacağını gözlədiyiniz at finişə ancaq səkkizinci gəlir. Formula 1-də Sebastyan Fettelin əla maşını var idi, amma o, Lyuis Hemiltona uduzur”, - deyə Maradona bildirib.

“Bu gün Argentina yığması nə mənim üçün, nə də azarkeşlər üçün oynayır. Futbolçular insanlarda heç bir hiss doğurmur, biz bu hissləri itirmişik, ehtirasdan məhrum olmuşuq. Argentina komandası Nikaraqua və Maltaya qarşı oynayır. Bu, belə olmamalıdır, bizim bütün nüfuzumuzu ayaqyoluna atıblar. Mən Messiyə deyirəm ki, yığmaya qayıtmasın və karyerasını milli komandada başa vurmasın. Argentinanın 15 yaşdan aşağı oyunçulardan ibarət komandası uduzanda da, “Rasinq” və “Boka Xuniors” çempionatda məğlub olanda da Messini günahlandırırlar. O, hər zaman hər şeydə günahkardır. Bəsdir, baxaq görək, yığma komanda onsuz necə bacaracaq, hansı məharəti göstərəcək”, - deyə Maradona əlavə edib.

Messi Argentina yığmasının tərkibində Pekində keçiriləm 2008-ci il Olimpiya Oyunlarının qalibi olub. Hücumçu dörd dünya çempionatında iştirak edib və argentinalılar onunla ən yaxşı nəticəyə 2014-cü ildə Braziliyada nail olublar. Həmin il onlar dünya çempionatının gümüş medalını qazanıb, Messi isə turnirin ən yaxşı oyunçusu elan edilib. O, həmçinin milli komandanın tarixində ən məhsuldar oyunçudur (128 matçda 65 qol).

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.