DÜNYA


Mariu Sentenu 2018-ci ildə Avropanın ən yaxşı maliyyə naziri sayılıb

Lissabon, 7 yanvar, AZƏRTAC

Britaniyanın “Financial Times” qəzetinin əlavəsi olan nüfuzlu “The Banker” maliyyə jurnalı Portuqaliya Respublikasının maliyyə nazirinin fəaliyyətini yüksək qiymətləndirib.

AZƏRTAC xəbər verir ki, nəşr Mariu Sentenunu 2018-ci ildə Avropanın ən yaxşı maliyyə naziri adlandırıb.

Jurnal yazır ki, Mariu Sentenu Avroqrupun Cənubi Avropa ölkəsindən və “xilasetmə” tədbirlərinə məruz qalmış ölkədən olan ilk lideridir. “The Banker” Portuqaliya iqtisadiyyatının bərpa olunmasını da yüksək qiymətləndirib. Portuqaliyada 2013-cü ildə 17 faiz səviyyəsində olan işsizlik azalaraq 7 faizdən aşağı düşüb, İqtisadi Əməkdaşlıq və İnkişaf Təşkilatının hesablamaları Portuqaliyada ümumi daxili məhsulun 2019-cu ildə, eləcə də 2020-ci ildə 2 faiz artacağını proqnozlaşdırır.

Yazıda deyilir: “Harvard Universitetində elmlər doktoru dərəcəsi almış portuqaliyalı iqtisadçının seçilməsi Portuqaliya iqtisadiyyatının inanılmaz şəkildə bərpasının təsdiqidir”.

M.Sentenunun Avroqrupun başçısı vəzifəsində ilk 12 ay ərzində gördüyü işi yüksək qiymətləndirən “The Banker” yazır: “Avrozona ölkələrinin maliyyə nazirlərinin dekabrın əvvəlində iştirak etdikləri danışıqlar marafonu vahid valyuta blokunda suveren borcun böhranı dövründən etibarən ən əhəmiyyətli islahatlara gətirib çıxarıb”.

Mariu Sentenu Portuqaliyanı 2015-ci ildən idarə edən hökumətdə “2 nömrəli” şəxsdir. O, həmçinin Portuqaliyanın 5 ən iri bankından dördünü restrukturizasiya edib və yenidən kapitallaşdırıb. Nəşr yazır ki, bu dövr ərzində minimum əməkhaqqı və pensiyalar artıb, eyni zamanda müəssisələr və aşağı gəlirlər üçün vergilər azalıb.

“The Banker” 2018-ci ildə indoneziyalı Şri Muliani İndravatini dünyanın və Aşıya və Sakit okean regionunun, çilili Felipe Larreni Amerika qitəsinin, israilli Moşe Kaxlonu Yaxın Şərqin, misirli Məhəmməd Maiti Afrika qitəsinin ən yaxşı maliyyə nazirləri elan edib.

“Ən yaxşı maliyyə nazirləri” adına maliyyə sisteminin artımının stimullaşdırılmasına və iqtisadiyyatın sabitləşməsinə böyük töhfə vermiş maliyyə nazirləri layiq görülür.

Nigar Cəfərli

AZƏRTAC-ın xüsusi müxbiri

Lissabon

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.