Marneulidə Azərbaycan, Gürcüstan, Türkiyə və Pakistan şahmat məktəblərinin iştirakı ilə yoldaşlıq görüşü keçirilib

Tbilisi, 4 may, AZƏRTAC

Marneulidə Azərbaycan, Gürcüstan, Türkiyə və Pakistanın şahmat məktəblərinin iştirakı ilə yoldaşlıq görüşü keçirilib.

AZƏRTAC xəbər verir ki, onlayn formatda keçirilən görüşdə 6 komandada 88 gənc şahmatçı iştirak edib.

Yarışda ümumi nəticələrə görə 311 bal toplayan Azərbaycan Respublikası Balakən Şahmat Məktəbinin yetirmələri birinci yerə, Gürcüstanı təmsil edən “Marneuli Şahmat Klubu”nun yetirmələri 116 balla ikinci, Azərbaycan Respublikası Samux Uşaq Gənclər İdman, Şahmat Məktəbinin gəncləri isə üçüncü yerə çıxıblar.

Marneulidəki “Çay Evi”nin layihə rəhbəri Emin Əhmədov AZƏRTAC-a müsahibəsində deyib ki, bu cür yarışlar şahmatın regionlarda inkişafına və gənclərin şahmata marağının artmasında mühüm rol oynayır.

Onun sözlərinə görə, Marneuli şahmat klubu SOCAR-ın Gürcüstan nümayəndəliyinin dəstəyi ilə fəaliyyət göstərir. Layihədə 420 yeniyetmə və gənc müxtəlif peşə və ixtisaslar üzrə pulsuz təhsil alıb.

Xətayi Əzizov

AZƏRTAC-ın xüsusi müxbiri

Tbilisi