ELM VƏ TƏHSİL
Martın 12-də 37 mindən artıq şagird imtahan verəcək VİDEO
Bakı, 9 mart, AZƏRTAC
Martın 12-də Dövlət İmtahan Mərkəzi (DİM) 33 rayonda ümumtəhsil müəssisələrinin IX sinif şagirdləri üçün buraxılış imtahanının birinci mərhələsini, 23 rayonda isə ilk peşə-ixtisas təhsili müəssisələrinin sonuncu sinfində təhsil alan şagirdləri üçün buraxılış imtahanı keçirəcək.
Həmin gün ümumilikdə 37 min 230 şagirdin imtahan verəcəyi nəzərdə tutulur.
DİM-dən AZƏRTAC-a bildiriblər ki, imtahanlarda iştirak edəcək şagirdlər “İmtahana buraxılış vərəqəsi”ni internet vasitəsilə çap edib götürə bilərlər. Buraxılış vərəqəsi ilə yanaşı, onlara “Yaddaş kitabçası” da təqdim olunur. Burada şagirdlərə imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır.
İmtahan saat 11.00-da başlanacaq. Şagirdlər imtahana şəxsiyyət vəsiqəsini, əcnəbilər şəxsi pasportları və icazə vəsiqələrini, vətəndaşlığı olmayan şəxslər şəxsiyyət vəsiqələrini və icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini gətirməlidirlər.
Şəxsiyyət vəsiqəsində şəkli olmayan şagirdlər digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa şagirdin 3x4sm ölçülü şəkli yapışdırılır və şəkil möhürlə təsdiqlənir) təqdim etməlidirlər.
İmtahanların keçirilməsi üçün ümumilikdə 113 imtahan mərkəzi ayrılıb.
IX sinif buraxılış imtahanının birinci mərhələsində 34 min 116 (Naxçıvan şəhərində 1053, Kəngərlidə 226, Babəkdə 598, Ordubadda 425, Sədərəkdə 89, Culfada 414, Şərurda 743, Şahbuzda 159, Xocavənddə 76, Bərdədə 2205, Ağcabədidə 1816, Ağdamda 953, Tərtərdə 867, Ucarda 870, Kürdəmirdə 1343, Zərdabda 616, Ağsuda 731, İmişlidə 1242, Füzulidə 796, Beyləqanda 1077, Şirvanda 1043, Hacıqabulda 754, Sabirabadda 1946, Biləsuvarda 1408, Neftçalada 732, Salyanda 1438, Saatlıda 1053, Lənkəranda 2214, Astarada 1220, Lerikdə 674, Yardımlıda 706, Cəlilabadda 2473, Masallıda 2156 nəfər) şagirdin iştirakı nəzərdə tutulur.
İlk peşə-ixtisas təhsili müəssisələrinin buraxılış imtahanında isə 3 min 114 (Bakıda 1232, Gəncədə 250, Şəmkirdə 63, Gədəbəydə 58, Qazaxda 51, Tovuzda 39, Sumqayıtda 432, Şamaxıda 64, Qaxda 88, Bərdədə 79, Göyçayda 73, Kürdəmirdə 81, Zərdabda 41, Şirvanda 99, Sabirabadda 59, Biləsuvarda 47, Salyanda 19, Saatlıda 57, Lənkəran 20, Cəlilabadda 130, Qubada 58, Qusarda 39, Xaçmazda 35 nəfər) XI sinif şagirdinin iştirakı nəzərdə tutulur.
İmtahanların idarə olunmasına ümumilikdə 269 imtahan rəhbəri, 3091 nəzarətçi müəllim ayrılıb.