Masallı, 6 oktyabr, Bağır Əliyev, AZƏRTAC

Oktyabrın 6-da Masallı şəhərində gənclərin və qadınların məşğulluğuna dəstək məqsədilə Qadın Resurs, SYSLAB Gənclərin Məşğulluq və Təlim-Tədris mərkəzlərinin açılışı və “ASAN həyat” kompleksindəki “ABAD” layihəsinin təqdimatı olub.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla anıblar.

"Sahibkarlığa və məşğulluğa iqtisadi dəstək" layihəsi çərçivəsində Masallı şəhərindəki Heydər Əliyev Mərkəzində keçirilən tədbirdə gənclər, rayonda fəaliyyət göstərən qadın təşkilatlarının təmsilçiləri, sahibkar qadınlar və ictimaiyyət nümayəndələri iştirak ediblər. Layihə Azərbaycan Hökuməti, ABŞ Beynəlxalq İnkişaf Agentliyi (USAİD) və BMT-nin İnkişaf Proqramı (BMTİP), Əmək və Əhalinin Sosial Müdafiəsi Nazirliyi, Ailə, Qadın və Uşaq Problemləri üzrə Dövlət Komitəsi ilə birgə əməkdaşlıq çərçivəsində reallaşdırılıb.

Tədbirdə çıxış edən Masallı Rayon İcra Hakimiyyətinin başçısı Rafil Hüseynov regionların sosial-iqtisadi inkişafına dair Dövlət proqramları çərçivəsində rayonda görülən işlərdən danışaraq əhalinin məşğulluğunun diqqətdə saxlanıldığını bildirib. Qeyd edib ki, yeni açılan mərkəzlər gənclər və qadınların məşğulluğunun dəstəklənməsi baxımından böyük əhəmiyyətə malikdir.

Əmək və əhalinin sosial müdafiəsi nazirinin müavini İdris İsayev gənclərin məşğulluğuna və iqtisadi inkişaf proseslərində fəal iştirakına şərait yaradılmasının Prezident İlham Əliyevin sosial-iqtisadi inkişaf kursunun əsas komponentlərindən biri olduğunu vurğulayıb. Bildirilib ki, ölkəmizdə gənclərlə bağlı icra olunan Dövlət proqramları, eyni zamanda, dövlət məşğulluq siyasəti gənclərin işlə təmin olunması imkanlarının genişləndirilməsi istiqamətində mühüm addımların atılmasına şərait yaradıb.

“Bu gün Azərbaycan gənclər arasında işsizliyin ən aşağı səviyyədə olduğu ölkələrdən biridir. Beynəlxalq Əmək Təşkilatının (BƏT) rəsmi saytında gənclərin səmərəli məşğulluğunun təmin olunması üzrə dolğun hüquqi bazası, iş təcrübəsi təqdim olunan ölkələr sırasına Azərbaycan da daxil edilib. Cari ilin mayında BƏT-in beynəlxalq səviyyəli konfransı çərçivəsində təşkil olunan müsabiqədə ölkəmiz gənclərin məşğulluğunun dəstəklənməsi sahəsində MDB üzrə ən yaxşı iş təcrübəsi ilə seçilərək birinci yerə layiq görülüb, nümayəndə heyətimizə BƏT-in diplomu təqdim olunub”, - deyə İdris İsayev bildirib.

Ölkə gəncləri arasında iqtisadi fəallıq göstəricisinin də yüksəlməkdə olduğunu qeyd edən nazir müavini diqqətə çatdırıb ki, Əmək və Əhalinin Sosial Müdafiəsi Nazirliyi tərəfindən həyata keçirilən aktiv məşğulluq tədbirlərinin mühüm bir istiqaməti gəncləri əhatə edir. Bu ilin ötən dövründə nazirliyin məşğulluq orqanlarının xətti ilə münasib işlərlə təmin edilənlərin təqribən 35 faizi, peşə hazırlığı və əlavə təhsil kurslarına cəlb olunanların 65 faizi gənclər olub. Eləcə də 2013-cü ilin dekabrında fəaliyyətə başlayan Sağlamlıq imkanları məhdud gənclərin Peşə Reabilitasiya Mərkəzində 870 nəfərdən çox gənc peşə hazırlığına cəlb olunub.

Gənclərlə bağlı aktiv məşğulluq tədbirlərinin təşkilində müasir dünya təcrübəsinə uyğun innovativ vasitələrdən istifadə olunduğunu vurğulayan İ.İsayev deyib: “BMT İnkişaf Proqramı ilə nazirlik arasında son illərdə icra olunan “Azərbaycanda İnnovasiyanın və Məşğulluğun İnkişafı” layihəsi gənclərin əmək bazarına inteqrasiyasında SYSLAB (Yenilik və Məşğulluq üzrə Sistem Laboratoriyası) metodologiyasının tətbiqinə imkan verib. Layihəyə əsasən, Bakı, Sumqayıt və Gəncə şəhərlərində SYSLAB Təlim-Tədris mərkəzləri yaradılıb və ilk dəfə işaxtaran ali təhsilli 452 nəfər gənc həmin mərkəzlərdə təlim kurslarına cəlb edilib. Onlar bu təlimlər zamanı müasir üsullar, innovativ metodlar əsasında iş axtarışı bacarıqlarına yiyələniblər. Həmin gənclərdən 80 faizə yaxını bu bacarıqlardan faydalanaraq, ayrı-ayrı müəssisələrdə münasib işlə təmin olunublar”.

Qeyd olunub ki, bu müsbət təcrübə cari ilin aprelində BMT İnkişaf Proqramı ilə Əmək və Əhalinin Sosial Müdafiəsi Nazirliyi arasında növbəti “Azərbaycanda İnnovasiyanın və Məşğulluğun İnkişafı” layihəsinin imzalanmasına əsas yaradıb. 2017-ci ilin sonunadək davam edəcək həmin layihə çərçivəsində hazırda Masallı rayonunda SYSLAB Təlim-Tədris Mərkəzi fəaliyyətə başlayır. Mərkəzdə təşkil olunan təlim kursları işaxtaran gənclərin SYSLAB metodologiyası əsasında müvafiq bacarıqlara yiyələnərək əmək bazarına çıxış imkanları əldə etmələrinə öz töhfəsini verəcək. Təlim kurslarında iştirakçılar üçün xüsusi ehtiyacları nəzərə alınmaqla, müvafiq köməyin göstərilməsi üçün fərdi sessiyaların keçirilməsi də təmin olunacaq.

İ.İsayev Masallı rayonunda yeni yaradılan Qadın Resurs Mərkəzinin də bölgədə qadınların iqtisadi və sosial həyatda iştirakının stimullaşdırılmasında, onların əmək bazarına inteqrasiyasında və məşğulluq imkanlarının reallaşdırılmasında əhəmiyyətli rol oynayacağını bildirib, hər iki mərkəzin fəaliyyətinə uğurlar arzulayıb.

BMT-nin Azərbaycandakı rezident əlaqələndiricisi və BMT İnkişaf Proqramının rezident nümayəndəsi Qulam İsakzai Azərbaycanla təmsil etdiyi qurum arasında səmərəli əməkdaşlığın uğurla davam etdiyini bildirib.

Q.İsakzai gənclərin və qadınların sosial-iqtisadi həyatda fəal iştirakının ölkənin kənd rayonlarında inklüziv və davamlı inkişaf üçün vacib olduğunu vurğulayıb, yeni yaradılan mərkəzlərin bu sahədə fəal rol oynayacağına əminliyini ifadə edib. O, uğurlu əməkdaşlığa görə tərəfdaşlara minnətdarlığını bildirərək deyib ki, aparılan birgə işlər bütün tərəflərin BMT-nin Davamlı İnkişaf Məqsədlərinə sadiqliyini sübut edir.

Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova qadın və uşaqların sosial-iqtisadi vəziyyətinin yaxşılaşdırılması istiqamətində aparılan dövlət siyasətindən söz açıb. O, kənd və rayonlarda yaşayan qadınların sosial-iqtisadi fəallığının artırılması məqsədilə həyata keçirilən tədbirləri, o cümlədən BMT-nin İnkişaf Proqramı ilə əməkdaşlıq müstəvisində görülən işləri diqqətə çatdırıb. Əminliklə bildirib ki, Masallı rayonunda açılan yeni Qadın Resurs Mərkəzi qadınların iqtisadi və sosial həyatda iştirakının təşviqinə mühüm töhfə verəcək.

ABŞ-ın Azərbaycandakı səfirliyinin əməkdaşı Karter Uilbur belə tədbirlərin gənclərin və qadınların məşğulluğunun təmin olunmasında, onların sosial-iqtisadi həyatda fəal iştirak etmələrində önəmli dəstək olduğunu vurğulayıb.

Tədbirdə artıq iş yeri əldə etmiş SYSLAB layihəsinin məzunlarına - 13 qadına və 8 gəncə sertifikatlar verilib.

Sonra Qadın Resurs mərkəzləri iştirakçılarının biznes fəaliyyətinə dair nümunələri təqdim edilib. Layihələr üzrə qısa təqdimatlar keçirilib, tədbir iştirakçıları hər iki mərkəzdə yaradılmış şəraitlə tanış olublar.

Qonaqlar Masallı şəhərindəki Heydər Əliyev parkında evdar qadınların əl işlərinə, yerli mətbəx, xalq tətbiqi sənəti nümunələrinə baxıb, “Halay” folklor kollektivinin və uşaq rəqs qrupunun çıxışlarını izləyib, Uşaq İncəsənət Məktəbi və rayon tarix-diyarşünaslıq muzeyində olublar.

Daha sonra qonaqlar “ASAN həyat” kompleksində fəaliyyət göstərən xidmət sahələri və burada yaradılan şəraitlə maraqlanıblar. Tədbir “ASAN həyat” kompleksində “ABAD” (Ailə Biznesinə Asan Dəstək) layihəsinin təqdimatı ilə başa çatıb.