Masallı, 26 oktyabr, Bağır Əliyev, AZƏRTAC

Masallı rayonunda fəaliyyət göstərən “Ümidin Sənsən” Sosial İnkişafa Yardım İctimai Birliyi bu ilin sentyabr ayından başlayaraq Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı və Azərbaycan Respublikası Ailə, Qadın və Uşaq Problemləri üzrə Dövlət Komitəsinin tərəfdaşlığı ilə “Aztəminatlı ailələr arasında “Erkən nikah çarə deyil!” adlı fərdi maarifləndirmə işinin aparılması və sosial dəstəyin göstərilməsi" layihəsini reallaşdırır.

Layihənin həyata keçirilməsində məqsəd vətəndaş məsuliyyətini artırmaqla "Erkən nikah" və onun cəmiyyətdə yaratdığı problemləri minimuma endirmək, eyni zamanda aztəminatlı ailələrdən olan qız övladlarının təhsil almasına marağının artırılmasına dəstək olmaqdır.

Birliyin sədri Fidan Abbaslı AZƏRTAC-ın bölgə müxbirinə bildirib ki, ölkəmizdə erkən nikahlarla bağlı aparılan səmərəli işlər artıq öz bəhrəsini verməkdədir. Hazırda icrasına başladığımız layihə bu işləri daha da möhkəmləndirməyə yönəlib. Biz bu layihədə təkcə sözlə, maarifləndirmə ilə deyil, həm də konkret təhsilə yönəlik həvəsləndirici hədiyyələr də təqdim etməyi nəzərdə tutmuşuq.

Artıq layihənin işçi heyəti ilə müqavilələr bağlanıb, onun strategiyası müzakirə edilib, icrasına təcrübəli ekspertlər cəlb olunub. Yaxın günlərdə keçiriləcək fərdi maarifləndirmə işlərinə hazırlıq görülüb.

Masallı rayonunun beş fərqli, müxtəlif istiqamətlərdə yerləşən Ərkivan qəsəbəsi, Hışkədərə, Bədəlan, Çaxırlı, Qızılağac kəndində aztəminatlı və erkən nikahla bağlı risk qrupuna daxil olan cəmi 20 ailə müəyyən edilib.

Həmin ailələr, onların ailə vəziyyəti və ehtiyacları araşdırılıb. Aztəminatlı ailədən olan qız övladları ilə fərdi söhbətlər zamanı onlara məktəbli forması və məktəb ləvazimatlarının verilməsi, eləcə də onlara gigiyenik vasitələr kimi tibbi maskalar paylanması nəzərdə tutulub.

Layihə çərçivəsində “cenub.az” saytında multimedia sistemlərindən istifadə olunmaqla erkən nikahla bağlı materiallar çap olunacaq, müvafiq qaydada hazırlanmış press-relizlər internet mediada və “Facebook” sosial şəbəkəsində yayımlanacaq.

Qeyd edək ki, bu həftə Masallı rayonunun Qızılağac kəndində layihənin icrasına başlanılacaq.