REGİONLAR
Masallıda minifutbol üzrə rayon birinciliyinin qalibləri mükafatlandırılıblar
Masallı, 17 oktyabr, Bağır Əliyev, AZƏRTAC
Masallı Rayon Gənclər və İdman İdarəsinin və Uşaq-Gənclər İdman Şahmat Məktəbinin birgə təşkilatçılığı ilə “Viləş” minifutbol meydançasında torpaqlarımızın azadlığı uğrunda şəhidlik zirvəsinə ucalan qəhrəmanlarımızın əziz xatirəsinə həsr olunmuş məktəblilər arasında minifutbol yarışı üzrə rayon birinciliyi keçirilib.
AZƏRTAC-ın bölgə müxbiri xəbər verir ki, rayon birinciliyində qalib gəlmiş komandalar Masallı Rayon Gənclər və İdman İdarəsi tərəfindən diplomlarla mükafatlandırılıblar.
Mükafatlandırma mərasimində çıxış edən Masallı Rayon Gənclər və İdman İdarəsinin rəis müavini Oktay Mütəllimov və Uşaq-Gənclər İdman Şahmat Məktəbinin direktoru Əlifağa Yaqubov qalibləri təbrik edərək, 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusunun əsgər və zabitlərinin qəhrəmanlıqlarından danışıblar.