REGİONLAR
Masallıda şəhid Sübhan Həsənovun doğum günündə xatirəsi anılıb
Masallı, 27 iyul, Bağır Əliyev, AZƏRTAC
Masallıda Vətən müharibəsində qəhrəmancasına döyüşərək şəhidlik zirvəsinə ucalan Azərbaycan ordusunun əsgəri Sübhan Həsənovun doğum günü qeyd olunub.
Mövcud pandemiya qaydalarına uyğun olaraq keçirilən mərasimdə rayonun ağsaqqalları, ziyalılar, şəhidin doğmaları, ictimaiyyət nümayəndələri iştirak ediblər.
AZƏRTAC-ın bölgə müxbiri xəbər verir ki, tədbir iştirakçıları şəhid Sübhan Həsənovun məzarı önünə gül dəstələri düzərək xatirəsini ehtiramla anıb, ruhuna dualar oxuyublar.
Anım tədbirində çıxış edən Masallı Rayon Ağsaqqallar Şurasının sədri, III dərəcəli "Vətənə xidmətə görə" ordenli Ələşrəf Niftiyev Sübhan Həsənovun qısa və şərəfli ömür yolundan danışaraq Vətənimizin azadlığı uğrunda canlarını qurban verən şəhidlərimizin əbədi ehtirama layiq olduqlarını bildirib.
“Qarabağ müharibəsi əlilləri, veteranları və şəhid ailələri” İctimai Birliyinin Masallı rayon şöbəsinin sədri Nahid Rəhimov, Masallı Rayon Mədəniyyət Mərkəzinin direktoru Vəkil İsmayılov, “Yeni həyat” qəzetinin əməkdaşı Akif Ağayev igid döyüşçü Sübhan Həsənovun Vətənə sədaqətindən, Masallı övladlarının torpaqlarımızın azad edilməsi uğurundakı mübarizəyə necə ürəklə yollanmalarından söhbət açıblar.
Vətən müharibəsi iştirakçısı Cavid Nuri, şəhidin döyüş yoldaşı Ceyhun Şiriyev Sübhan kimi qəhrəman oğullarımızın and yerimizə, ziyarət məkanımıza çevrildiklərini, şəhidlərimizin qanının yerdə qalmadığını söyləyiblər.
Şəhid Fuad Novruzovun atası Qorxmaz Novruzov, “Viləş” uşaq bağçasının müdiri Şəfa Allahverdiyeva, Masallı şəhər “İmam Əli” məscidi dini icmasının sədri və imamı, ilahiyyat üzrə fəlsəfə doktoru Əliqulu Qardaşov çıxışlarında qeyd ediblər ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin qətiyyəti, Ordumuzun şücaəti, şəhid və qazi olmuş igid oğlanlarımızın qəhrəmanlığı ilə Azərbaycanın ərazi bütövlüyü bərpa olundu.
Masallı şəhər 5 nömrəli tam orta məktəbin direktoru Cəsarət Həmidov çıxışında bildirib ki, Sübhan Həsənov məktəb illərində nümunəvi davranışı, yüksək etikası ilə fərqlənib: “Onun kimi şəhidlik zirvəsinə ucalan şagirdlərimiz - Rafael Abbasov, Emin Əliyev, Fuad Novruzov, Zeynal Şahhüseynlinin xatirəsini yaşatmaq, onları gəncliyə nümunə göstərmək hər birimizin ən müqəddəs borcudur”.
Şəhidin atası Rauf Həsənov ölkəmizdə şəhid ailələrinə göstərilən diqqət və qayğıya görə dövlətimizin başçısına minnətdarlığını bildirib.
Qeyd edək ki, Sübhan Rauf oğlu Həsənov 26 iyul 2001-ci il tarixində Masallı şəhərində anadan olub. O, 2007-2018-ci illərdə şəhid İsfəndiyar Zülalov adına Masallı şəhər 5 nömrəli tam orta məktəbində təhsil alıb. Masallı Rayon Gənclər və İdman İdarəsinin nəzdindəki Uşaq Gənclər İdman məktəbinin cüdo bölməsinin yetirməsi kimi dəfələrlə rayon və zona yarışlarının mükafatçısı olub.
2019-cu ilin 30 iyul tarixində Səfərbərlik və Hərbi Xidmətə Çağırış üzrə Dövlət Xidmətinin Masallı rayon şöbəsi tərəfindən hərbi xidmətə çağırılıb.
İgid döyüşçü Goranboy rayonunda yerləşən hərbi hissədə snayperçi əsgər kimi xidmətə başlayıb, Tovuz döyüşlərində iştirak edib.
Azərbaycan Ordusunun əsgəri Sübhan Həsənov 27 sentyabr 2020-ci il tarixdə Silahlı Qüvvələrimiz tərəfindən erməni işğalı altında olan ərazilərin azad edilməsi uğrunda başlanan Vətən müharibəsi zamanı Füzuli, Ağdərə və Suqovuşan istiqamətində gedən döyüşlərdə düşmənə qarşı böyük mərdliklə döyüşüb.
Cəsur döyüşçü oktyabrın 2-də Suqovuşan qəsəbəsi istiqamətində gedən döyüşlərdə şəhidlik zirvəsinə ucalıb. İki aydan sonra nəşi tapılıb. Dekabrın 7-də doğulub boya-başa çatdığı Masallı şəhər qəbiristanlığında dəfn edilib.
Ailənin yeganə oğlu olan Sübhan subay idi.
Döyüşlər zamanı göstərdiyi igidliyə və vəzifə borcunu şərəflə yerinə yetirdiyinə görə Azərbaycan Respublikası Prezidenti İlham Əliyevin müvafiq Sərəncamlarına əsasən Sübhan Rauf oğlu Həsənov ölümündən sonra “Vətən uğrunda”, "Cəsur döyüşçü", “Suqovuşanın azad olunmasına görə” medalları ilə təltif edilib.