REGİONLAR
Masallıdan olan fermerlər çəltik sahələrindən bol məhsul götürəcəklərinə əmindirlər FOTO VİDEO
Masallı, 28 sentyabr, İsmayıl Cəfərli, AZƏRTAC
Masallı rayonunda fermerlər bir neçə gündür çəltik sahələrində biçin kampaniyasına başlayıblar. Ötən il rayonda hər hektardan orta hesabla 4 ton 500 kiloqram çəltik götürülmüşdü. Bu il isə bu rəqəmin 20 faiz artacağı proqnozlaşdırılır.
AZƏRTAC xəbər verir ki, məhsuldarlığı və gəlirliliyi ilə seçilən çəltikçilik Masallıda ənənəvi təsərrüfat sahələrindən biridir. Ağır əl əməyi tələb edən bu təsərrüfat sahəsi uzun müddət rayonda tənəzzül dövrünü yaşayıb. Məhsul istehsalçılarına göstərilən dövlət dəstəyi - fermerlərə subsidiyaların verilməsi, güzəştli qaydada gübrələrin və texnikaların satılması rayonda çəltikçiliyin dirçəldilməsi üçün geniş imkanlar açıb.
Bu barədə danışan fermer Teyyub Kərimov deyib: “Əvvəllər texnika yox idi, su problemi vardı, çəltik əkmək çox çətin başa gəlirdi. Bu gün isə dövlət dəstəyi sayəsində çəltikçilik inkişaf edir. Texnika baxımından da işimiz asanlaşıb. Kombaynlarla məhsulumuzu biçirik. Yəqin ki, hər hektara 7 ton “Apollo”, 5 ton “Haşimi” düyüsü götürərik”.
Bu il Masallı rayonunda 240 hektara yaxın çəltik əkini həyata keçirilib. Təsərrüfatçılar əsasən məhsuldar “Apollo”, “Okean” və “Haşimi” növlərinə daha çox üstünlük veriblər. Sahələrdə vaxtında lazımi aqrotexniki işlər görülüb, zərərvericilərə qarşı tədbirlər aparılıb. Bundan başqa çəltik əkini zamanı əkinçilər su sarıdan heç bir əziyyət çəkməyiblər.
“Üç ildir yaxşı məhsul götürürəm. İndi su problemimiz həll olunub. Subsidiyamızı vaxtında alırıq. Dövlətin biz fermerlərə qayğısı böyükdür. Dəstək olanda işlər də yolunda gedir. Rayona gəlirlər, maraqlanırlar bizimlə. Gözləyirəm, bu il 2 hektar sahədən 800 ton məhsul götürəcəyəm. Gələcəkdə fikirləşirəm ki, 2-3 hektar əlavə sahədə əkin aparım”, - deyə fermer Mozi Nurəliyev bildirib.
Masallı rayonunda çəltik əsasən Qızılağac, Xıl, Sərçuvar, Şıxlar, Tüklə kəndlərində əkilib. Artıq sahələrin xeyli hissəsində biçin başa çatdırılıb.
Masallı rayon Dövlət Aqrar İnkişaf Mərkəzinin baş məsləhətçisi Hasil Hüseynovun sözlərinə görə, ötən il rayonda 217 hektar sahədə çəltik əkini aparılmışdı. Bu il isə çəltik sahələri genişləndirilərək 240 hektara çatdırılıb: “Fermerlərə hər hektara görə 280 manat subsidiya verilir. 280 manatın müəyyən hissəsi gübrəyə ayrılır. Qalanı isə toxum almaq üçün nəzərdə tutulub. Əvvəllər toxumlar İrandan gətirilirdisə, bu il öz yerli toxumlarımızla əkin aparmışıq. Şükürlər olsun, məhsuldarlıq da boldur”.
Çəltikçilər bu il təsərrüfatlardan bol məhsul əldə edəcəklərini bildirirlər. Hava şəraiti imkan verərsə, rayonda çəltik biçini sentyabr ayının sonunadək yekunlaşacaq.