Bakı, 27 fevral, AZƏRTAC

Fevralın 27-də Salyan rayonunda regional müşavirə keçirilib. Müşavirə “Təhsil Nazirliyinin tabeliyindəki təhsil müəssisələrinin ərazilərində hərbi sursat və tərkibində partlayıcı maddə olan qurğuların aşkar edilməsi, zərərsizləşdirilməsi, müəllim-şagird heyətinin partlayış təhlükəsinə qarşı maarifləndirilməsi barədə” Təhsil nazirinin müvafiq əmrinin icrası ilə əlaqədar təşkil edilib.

Təhsil Nazirliyindən AZƏRTAC-a bildiriblər ki, müşavirədə bu qurumun, Fövqəladə Hallar Nazirliyi, Daxili İşlər Nazirliyi və Ərazilərin Minalardan Təmizlənməsi üzrə Milli Agentliyinin (ANAMA) nümayəndələri, həmçinin Salyan, Neftçala, Sabirabad, Saatlı, İmişli, Cəbrayıl, Şirvan və Hacıqabul bölgələrini əhatə edən təhsil müəssisələrinin rəhbərləri, kollec, peşə və internat müəssisələrinin direktorları, həmin bölgələrdə çalışan gənclərin çağırışaqədərki hazırlığı üzrə hərbi rəhbərləri iştirak ediblər.

Təhsil Nazirliyinin təşkilatçılığı, Fövqəladə Hallar Nazirliyi, Daxili İşlər Nazirliyi, Ərazilərin Minalardan Təmizlənməsi üzrə Milli Agentliyin və Salyan Rayon İcra Hakimiyyətinin dəstəyi ilə keçirilən müşavirənin əsas məqsədi qeyd olunan məsələ ilə əlaqədar yerli təhsili idarəetmə orqanlarında çalışan rəhbər və digər aidiyyəti işçilərlə müvafiq maarifləndirmə işinin aparılmasıdır.

Nazirliyin audit şöbəsinin Əmlakın monitorinqi sektorunun müdiri Bəhruz Müslümov Təhsil nazirinin müvafiq əmrinin icrası ilə əlaqədar qarşıda duran vəzifələr barədə, bu sahədə çalışan bəzi əməkdaşların peşəkarlıq səviyyəsinin yüksəldilməsinin vacibliyindən danışıb.

ANAMA-nın nümayəndəsi İdris İsmayılov minaların zərərsizləşdirilməsi və digər normativlərin yerinə yetirilməsində təhlükəsizlik qaydalarına dəqiq riayət edilməsi, partlamamış hərbi sursat (minalar, qumbaralar, mərmilər və digər partlayıcı əşyalar) vasitələri aşkar edildikdə onlara toxunmağın qəti qadağan olması və dərhal 102 və ya 112 “Qaynar xətti”nə məlumat verilməsinin önəmini vurğulayıb.

Fövqəladə Hallar Nazirliyinin nümayəndəsi Rafiq Zeynalov əleyhqazlardan istifadə qaydasından, baş verə biləcək fövqəladə hallar zamanı təxliyə işinin doğru tənzimlənməsinin vacibliyindən danışıb.

Baş Dövlət Yol Polisi İdarəsinin təmsilçisi, polis polkovnik-leytenantı Mübariz Ağayev “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nda qarşıya qoyulan vəzifələr haqqında məlumat verib.

Təhsil Nazirliyinin nümayəndəsi Rövşən Ağayev müvafiq dövlət standartları əsasında hazırlanmış proqram və dərsliklərə uyğun tədris edilən GÇH fənninin məktəblilərin ordu həyatı ilə tanış olmalarına, hərbi Nizamnamə və Qaydaların mənimsədilməsinə də xidmət etdiyini qeyd edib.

Müşavirədə maarifləndirmə tədbirlərinin təşkilinin xüsusi əhəmiyyəti vurğulanıb, məktəblilərin vətənpərvər ruhda tərbiyə edilməsinin vacibliyi qeyd edilib. Eyni zamanda, “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nın həyata keçirilməsi ilə əlaqədar müzakirələr aparılıb.