MƏDƏNİYYƏT


Mədəniyyət İşçiləri Həmkarlar İttifaqı Respublika Komitəsi fəal əməkdaşları təltif edib

Bakı, 14 aprel, AZƏRTAC

Azərbaycan Əmək və Sosial Münasibətlər Akademiyasında Azərbaycan Respublikası Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin Həmkarlar İttifaqı Komitəsi ilə Mərkəz rəhbərliyi arasında kollektiv müqavilə imzalanıb.

AZƏRTAC xəbər verir ki, tədbirdə akademiyanın rektoru, professor Hüseyn Qaraşov qonaqları salamlayaraq əmək fəaliyyəti ilə məşğul olan hər bir şəxsin öz hüquqlarından məlumatlı olmasının vacibliyini qeyd edib. Azərbaycan Mədəniyyət İşçiləri Həmkarlar İttifaqı Respublika Komitəsinin sədri, Əməkdar mədəniyyət işçisi Cəmilə Səttarova müəssisələrdə Həmkarlar İttifaqının fəaliyyətinin əhəmiyyəti barədə danışıb.

Qeyd edib ki, Həmkarlar İttifaqının mövqeyi hər bir əməkdaşın, bütövlükdə kollektivin maraqlarını ifadə etməlidir.

Mədəniyyət üzrə Elmi-Metodiki və İxtisasartırma Mərkəzinin Həmkarlar İttifaqı Komitəsinin sədri Cavid Əliyev əməkdaşların maraqlarının müdafiəsinin vacib şərt kimi qarşıya qoyulduğunu vurğulayıb. Bildirib ki, əməkdaşların iş fəaliyyətinin qiymətləndirilməsində Həmkarlar İttifaqı Komitəsi fəal mövqe tutmalıdır. Natiq ittifaq tərəfindən hazırlanan yeni qiymətləndirmə meyarlarının əməkdaşlarda sağlam rəqabət mühitinin dəstəklənməsinə töhfə verəcəyini qeyd edib. Söyləyib ki, “əməkdaşların reytinqi” adlı sistemin tətbiqi nəticəsində fəaliyyətin daha ədalətli və obyektiv qiymətləndirilməsi təmin olunacaq.

Gənc mədəniyyət işçiləri ilə iş sektorunun müdiri Ceyhun Əhmədov “Kollektivdə münaqişələrin həllində “Həmkarlar İttifaqı Komitəsinin rolu” barədə çıxış edib.

Mərkəzin direktoru Asif Usubəliyev keçirilən tədbiri təqdirəlayiq hal kimi qiymətləndirib. Bildirib ki, Həmkarlar İttifaqı Komitəsinin fəaliyyətinin və qiymətləndirmə mexanizminin açıq formada ictimaiyyətə təqdim olunması sağlam əhval-ruhiyyənin göstəricisidir. Burada yalnız rəhbərin kollektiv qarşısında deyil, eyni zamanda, kollektivin rəhbərlik qarşısındakı ədalətsiz və əsassız iddiasının qarşısı alınacaq.

Sonda ictimai işlərdə fəallığı ilə seçilən əməkdaşlara Azərbaycan Mədəniyyət İşçiləri Həmkarlar İttifaqı Respublika Komitəsinin sədri Cəmilə Səttarova tərəfindən fəxri fərmanlar təqdim olunub.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.