MƏDƏNİYYƏT


Mədəniyyət nazirinin müavini UNESCO-da görüşlər keçirib

UNESCO Ümumdünya İrs Komitəsinin 43-cü sessiyası 2019-cu ildə Bakıda təşkil olunacaq

Paris, 14 dekabr, AZƏRTAC

UNESCO-nun Mədəni özünüifadə müxtəlifliyinin qorunması və təşviqi üzrə Hökumətlərarası Komitəsinin 12-ci sessiyasında iştirak etmək üçün Parisə səfəri çərçivəsində mədəniyyət nazirinin müavini Sevda Məmmədəliyeva bir sıra görüşlər keçirib.

AZƏRTAC xəbər verir ki, UNESCO-nun Ümumdünya İrs Mərkəzində keçirilən görüşdə Şəki şəhərinin tarixi hissəsinin UNESCO-nun Ümumdünya İrs Siyahısına daxil edilməsi məqsədilə 2019-cu ildə nominasiya faylının yekun versiyasının təqdim olunması istiqamətində atılacaq addımlar müzakirə olunub.

Həmçinin UNESCO Ümumdünya İrs Komitəsinin 43-cü sessiyasının 2019-cu ildə Bakıda təşkili ilə bağlı fikir mübadiləsi aparılıb.

Ümumdünya İrs Komitəsinin 42-ci sessiyasında qəbul edilmiş qərara əsasən Azərbaycan bir il müddətinə komitənin sədri seçilib və 43-cü sessiya 2019-cu il iyunun 30-dan iyulun 10-dək Bakı şəhərində keçiriləcəkdir. Azərbaycan üçün mühüm əhəmiyyətə malik belə bir qərarın qəbul olunması və UNESCO-nun ən mühüm tədbirlərindən birinin Bakıda keçirilməsi ölkəmizin bu təşkilatla tərəfdaşlıq münasibətlərinin yüksək səviyyədə olduğunu göstərir.

Nazir müavini UNESCO-nun konfranslar və mədəni tədbirlərin idarə edilməsi üzrə direktoru Tanya Fernandez de Toledo ilə də görüşüb. Görüş zamanı UNESCO-nun “Görkəmli şəxslərin və əlamətdar hadisələrin yubileyləri Proqramı” çərçivəsində Azərbaycanın fəaliyyəti müzakirə edilib. 2019-cu ildə Bakı Dövlət Universitetinin təsis olunmasının 100, görkəmli Azərbaycan şairi və mütəfəkkiri İmadəddin Nəsiminin anadan olmasının 650 illiyinin UNESCO səviyyəsində qeyd olunmasına dair müzakirələr aparılıb.

UNESCO-nun Mədəni özünüifadə müxtəlifliyinin qorunması və təşviqi üzrə Hökumətlərarası Komitəsinin 12-ci sessiyası öz işini yekunlaşdırıb. “Create 2030” şüarı altında keçirilən sessiyada yaradıcılıq azadlığı, vətəndaş cəmiyyətinin mədəniyyət və yaradıcı sənayelərdə rolu, süni intellektin yaradıcılığa təsiri və qadın sahibkarların mədəniyyət sənayelərində fəaliyyətinə dair mövzular müzakirə edilib.

Həmçinin sessiyada UNESCO-nun Mədəni özünüifadə müxtəlifliyinin qorunması və təşviqi haqqında 20 oktyabr 2005-ci il tarixli Konvensiyası çərçivəsində Azərbaycanın son 5 illik fəaliyyətinə dair hesabat qəbul olunub.

Şəhla Ağalarova

AZƏRTAC-ın xüsusi müxbiri

Paris

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.