Bakı, 3 fevral, AZƏRTAC

Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin regionlarda ixtisasartırma təlimləri keçirir. Mərkəzdən AZƏRTAC-a bildirilib ki, ötən müddət ərzində 9 rayonda keçirilən müxtəlif mövzulardakı təlimlərdə 15 rayondan olan 212 dinləyici iştirak edib. Digər sahələrin, o cümlədən iş adamların iştirakı ilə keçirilən kurslar çətinlik dərəcəsinə görə səviyyələrə bölünüb. Belə ki, müasir dövrdə ixtisasartırma sahəsində təhsilin keyfiyyətini artırmaq, kadr hazırlığında yüksək nəticə əldə etmək və kadrların peşə inkişafını təmin etmək məqsədilə Mədəniyyət üzrə Elmi-Metodiki və İxtisasartırma Mərkəzinin əməkdaşları arasında olan təlimçi-kuratorlarının iştirakı ilə cari ilin 3 fevral tarixində Cəfər Cabbarlı adına Respublika Gənclər Kitabxanasında ilk simulyasiya açıq dərs keçirilib.

Mərkəzin direktoru Asif Usubəliyev çıxış edərək qeyd edib ki, açıq dərslər eksperimental metodikası əsasında həyata keçiriləcəkdir. Simulyasiya real həyatdakı bir çox problemlərin aradan qaldırılması üçün əvəzi olunmaz həll metodudur. Məhz bu səbəbdən mərkəz bu metoddan istifadə edərək simulyasiya açıq dərslərin keçirilməsini qərara alıb. Dərslərdə nəzərdə tutulan təlim prosesi dinləyici auditoriyası olmadan müasir təlim metodlarının və tədrisə kreativ yanaşmanın tətbiqi ilə bağlı təlimçilərə metodiki köməkliyin göstərilməsindən, eləcə də təlimçilər arasında təcrübə mübadiləsinin aparılmasından ibarətdir.

Dinləyicilər qismində mərkəzin rəhbərliyi və əməkdaşlarının iştirakı ilə keçirilən “Nitq mədəniyyəti: natiqlik” mövzusunda ilk dərsi mərkəzin şöbə müdiri Nəzakət Rəhmanova təqdim edib. Dərs zamanı qədim və müasir dövrlərinin nitq mədəniyyətindən söz açılıb. Mövzu ətrafında mərkəzin direktor müavini Ramazan Şabanov, əməkdaşları Sənan Talıbov, Nurəddin Babazadə, Ceyhun Əhmədov və Hikmət Nəbili arasında geniş fikir mübadiləsi aparılıb.

Qeyd edək ki, simulyasiya açıq dərslər hər bir təlimçi-kuratorlara heç bir maneə olmadan öz iş metodunu müstəqil, yaradıcı şəkildə müəyyənləşdirilməsinə şərait yaradacaq, müəllim və auditoriyanı vahid məqsədə doğru aparacaq, onlar arasında qarşılıqlı fəaliyyət və humanist münasibət yaradılmasına təkan verəcək.

Açıq dərslər rəhbərlik tərəfindən təsdiq edilmiş qaydalara və tərtib edilmiş cədvələ uyğun olaraq həftədə 3 dəfə cari ilin mart ayının 18-dək davam edəcək, dərslərin qiymətləndirilməsi qaydalarda müəyyən edilmiş meyarlar üzrə həyata keçiriləcək.