Bakı, 16 may, AZƏRTAC

Mayın 16-da Mədəniyyət Nazirliyində Azərbaycan Respublikası Prezidentinin müvafiq sərəncamları ilə təltif edilmiş mədəniyyət və incəsənət xadimlərinə mükafatlar təqdim olunub.

AZƏRTAC xəbər verir ki, tədbirdə mədəniyyət naziri Əbülfəs Qarayev çıxış edərək ölkəmizdə mədəniyyət və incəsənət sahələrində xidmətləri olan şəxslərə göstərilən dövlət qayğısından danışıb.

Vurğulanıb ki, vaxtilə ulu öndər Heydər Əliyev tərəfindən mədəniyyət və incəsənət xadimlərinə göstərilən diqqət və qayğı bu gün Prezident İlham Əliyev tərəfindən davam etdirilir. Mədəniyyətimizin dünyada tanıdılması və təbliği istiqamətində görülən işlərdən söz açan nazir Azərbaycanın Birinci vitse-prezidenti Mehriban Əliyevanın bu sahədə xidmətlərini xüsusi qeyd edib.

“Prezident İlham Əliyev hər zaman müxtəlif sahələrdə çalışan insanların əməyini yüksək qiymətləndirərək onları mükafatlandırıb. Ölkə həyatının digər sahələrindən fərqli olaraq, mədəniyyət sahəsində təltif edilənlərin sayı daha çoxdur. Bu da özlüyündə mədəniyyət aləmində əldə olunan nailiyyətləri əks etdirir”,- deyə nazir bildirib.

Nazir vurğuladı ki, sevindirici haldır ki, bu gün iki ayrı sahənin əməkdaşlarına mükafatlar təqdim edirik: “Burada bizim Xalq artistimiz Hacı İsmayılov Azərbaycanın sevilən aktyorlarından biridir. Onun teatrda, kinoda yaratdığı obrazlar öz unikallığı ilə fərqlənir. Onun oynadığı hər bir rolun öz xarakteri var. Əməkdar artist Yadigar Muradov da uzun illərdi Şuşa Dövlət Dram teatrına rəhbərlik edir. Onun rəhbərliyi ilə Şuşa teatrı maraqlı tamaşalar səhnəyə qoyur. Ötən ilin sonlarında teatr üçün yenidən qurulmuş bir bina verildi. İnanırıq ki, çox da uzaq olmayan bir vaxtda Şuşa teatrı doğma məkanında – Şuşada öz fəaliyyətini davam etdirəcək”.

Əbülfəs Qarayev “Nə? Harada? Nə zaman?” Televiziya Klubu Komandası üzvləri Balakişi Qasımov və Elman Talıbovun Azərbaycan gəncliyini beynəlxalq intellektual oyunlarda layiqincə təmsil etdiklərini deyib.

Sonra ölkə başçısının müvafiq sərəncamları ilə “Şöhrət” ordeni ilə təltif olunan Xalq artisti Hacı İsmayılov, “Tərəqqi” medalı ilə təltif olunmuş Əməkdar artist Yadigar Muradov, Balakişi Qasımov və Elman Talıbova mükafatların vəsiqə və medalları təqdim olunub.

Mükafat alanlar fəaliyyətlərinə verilən yüksək qiymətə, göstərilən diqqət və qayğıya görə ölkə başçısına dərin minnətdarlıqlarını bildiriblər.