ORDU
Media nümayəndələri Heydər Əliyev adına Azərbaycan Ali Hərbi Məktəbində olublar
Bakı, 11 fevral, AZƏRTAC
Fevralın 11-də Heydər Əliyev adına Azərbaycan Ali Hərbi Məktəbinə media-tur təşkil olunub.
AZƏRTAC xəbər verir ki, media-tur zamanı Məktəbin komandanlığı ilə keçirilən görüşdə bu ali hərbi təhsil müəssisəsinin tarixi, təlim-tədris prosesi və fəaliyyətinə dair ətraflı məlumat verilib.
Hərbi təhsil müəssisəsində jurnalistlər məişət şəraiti, hərbi və fiziki hazırlıq bazası, o cümlədən müxtəlif fakültələrdə tədris prosesi, maddi-texniki vəsait və hərbi təyinatlı digər avadanlıqla tanış olublar.
Məlumat verilib ki, məktəbdə Azərbaycan vətəndaşları ilə yanaşı, Qırğızıstan, Tacikistan və Əfqanıstan vətəndaşları da təhsil alırlar. Burada təhsil alan kursantlara dövlət tərəfindən xüsusi diqqət yetirilir. Belə ki, I və II kurslarda oxuyan kursantlara 158 manat, III və IV kurslarda oxuyanlara isə 170 manat məbləğində təqaüd verilir. Qiymətləri yaxşı və əla olan kursantlar 25 və 50 faiz miqdarında əlavə məvaciblə təmin olunurlar.
Heydər Əliyev adına Azərbaycan Ali Hərbi Məktəbin rəisi, general-mayor Füzuli Salahov məktəbin fəaliyyəti barədə məlumat verərkən bildirib ki, dövlətimizin və müstəqilliyimizin dayağı olan Azərbaycan Silahlı Qüvvələri bu gün ən müasir silah və texnika ilə təmin edilmiş, yüksək təchizata, güclü intizama və döyüş hazırlığına malik qüdrətli güc strukturudur. Təsadüfi deyil ki, Azərbaycan Ordusu bu gün ən güclü ordular sırasındadır.
General-mayor, həmçinin əlavə edib ki, son illərdə Azərbaycan Prezidenti, Silahlı Qüvvələrin Ali Baş Komandanı İlham Əliyev və müdafiə naziri, general-polkovnik Zakir Həsənov tərəfindən orduya diqqət və qayğı ən yüksək səviyyədədir. Kursantların sosial-məişət şəraitinin yaxşılaşdırılması məqsədilə yeni yeməkxana və klub tikilib, sıra meydanı, üzgüçülük hovuzu, tir və 4-cü taborun kursant yataqxanası təmir olunub”.
Hərbi təhsil müəssisəsinin rəisi bildirib ki, Məktəbin Vətən müharibəsində Qələbə uğrunda döyüşən 600-ə yaxın hərbi qulluqçusundan 10-u şəhid olub, 23-ü isə yaralanıb. Şəhid olanlardan 5-i zabit-müəllim, 5-i isə IV kursdan müharibəyə göndərilən kiçik leytenantdır. Şəhid polkovnik Nudirəliyev Zaur İsmayıl oğlu ən yüksək – “Vətən Müharibəsi Qəhrəmanı” adına layiq görülüb.
Füzuli Salahov qeyd edib ki, beynəlxalq təhsil standartlarına cavab verən tədris metodikası hərb elminin incəliklərini kursantlara tam aşılamağa imkan verir. Heydər Əliyev adına Azərbaycan Ali Hərbi Məktəbində “xüsusi təyinatlı texnika və sistemlər” ixtisası üzrə bakalavr pilləsində mütəxəssislər hazırlanır. 2020/2021-ci tədris ilindən etibarən birinci kursa qəbul olan kursantlar bakalavr səviyyəsində 10 yeni ixtisas üzrə ali təhsil alırlar. Məktəbdə 4 fakültə və 21 kafedra fəaliyyət göstərir. Hərb elminin incəlikləri kursantlara beynəlxalq təhsil standartlarına cavab verən tədris metodikası və vasitələri ilə öyrədilir.
Hərbi məktəbin kursantı, Vətən müharibəsi qazisi Mobil Əhmədzadə jurnalistlərə müsahibəsində Vətən müharibəsinə kiçik leytenant kimi yollandığını bildirib: “Döyüşlərə tağım komandiri kimi qatıldım. Noyabrın 8-də Şuşa-Xankəndi istiqamətində ağır yaralandım və 5 gün meşədə tək qaldım. Beş gündən sonra - özümdə olmadığım zaman düşmən tərəfindən əsir götürülmüşəm. Ümumilikdə 35 gün əsirlikdə olmuşam. Dörd gün reanimasiyada, qalan günləri isə əsirlikdə keçirmişəm. Orada bir ayağımı amputasiya ediblər. Xəstəxanada olduğum müddətdə isə ermənilər tərəfindən işgəncəyə məruz qaldım. Məhz Azərbaycan Prezidentinin qətiyyəti nəticəsində dekabrın 14-də əsirlikdən azad edilərək Azərbaycana gətirilmişəm. Burada müəllim-mütəxəssis heyəti bizə hərb sənətinin sirlərini öyrədiblər. Burada öyrəndiklərimiz sayəsində biz döyüşdə necə vuruşacağımızı bilirdik. Buna görə də Məktəbin rəhbərliyinə, müəllim və zabit heyətinə borcluyuq”.
Müharibədən sonra bir ayağını itirməsinə baxmayaraq, bu ali hərbi təhsil ocağına tez-tez gəldiyini vurğulayan Mobil Əhmədzadə qeyd edib: “Heç nəyə görə peşman deyiləm. Fəxr edirəm ki, işğal altındakı torpaqlarımızı azad etdik. Kursant yoldaşlarımdan beşi şəhidlik zirvəsinə ucalıb. Onlarla çiyin-çiyinə döyüşlərdə iştirak etdiyim üçün qürur duyuram”.
Sonda media nümayəndələri kursantlarla birgə nahar ediblər.
Qeyd edək ki, bir əsrdən çox tarixi olan bu ali hərbi təhsil ocağı şərəfli yol keçib. Çar ordusunda Müsəlman korpusunun komandiri general-leytenant Əliağa Şıxlinskinin Milli Hərbiyyə Məktəbinin açılması haqqında Zaqafqaziya Komissarlığından icazə alması ilə 1918-ci il martın 1-də Tiflisdə Milli Hərbiyyə Məktəbi yaradılıb. 1918-ci ilin aprelin 2-də Milli Hərbiyyə Məktəbi Tiflisdən Gəncəyə köçürülüb. 1918-ci il oktyabrın 27-də Milli Hərbiyyə Məktəbinin ilk buraxılışı olub. Gəncədə yerləşmiş Milli Hərbiyyə Məktəbi Azərbaycan Xalq Cümhuriyyətinin hərbi nazirinin 1918-ci il 1 dekabr tarixli əmri ilə Praporşiklər Məktəbi adlandırılıb və məzunlara ilk zabit rütbəsi verilib. Azərbaycan Xalq Cümhuriyyəti süqutundan qısa müddət sonra - 1920-ci il mayın 25-də Hərbiyyə Məktəbi Azərbaycan Birləşmiş Hərbiyyə Məktəbi adlandırılıb.
1942-ci ildə Böyük Vətən müharibəsi zamanı Bakı Hərbi Piyada Məktəbinin şəxsi heyətinin əsas hissəsi cəbhəyə göndərilib. Böyük Vətən müharibəsində məktəbin rəşadət və qəhrəmanlıq göstərən bir neçə məzunu “Sovet İttifaqı Qəhrəmanı” adına layiq görülüb.