Bakı, 27 iyul, AZƏRTAC

İyulun 12-də Ermənistan silahlı qüvvələri növbəti dəfə beynəlxalq hüquq normalarını pozaraq Azərbaycanın Tovuz rayonuna ağır artilleriya silahları ilə hücum etdi. Bu dəfə Ermənistan hərbi təcavüzünü Azərbaycanın dövlət sərhədində həyata keçirməyə cəhd etdi. Bu, ayrıca mövzudur və bir neçə səbəbi var. Belə ki, Ermənistan Azərbaycanın sərhədlərini keçərək yeni torpaqlar işğal etmək, işğal etdiyi Dağlıq Qarabağın ilhaqını tanımaq üçün Azərbaycanı məcburi vəziyyətdə qoyacağını fikirləşirdi. Lakin yüksək rütbəli hərbçiləri - generalları, polkovnikləri, mayorları sıravi əsgərlərdən öndə gedən əzmli Azərbaycan Ordusu düşməni geri oturtdu.

Bu sözləri AZƏRTAC-a açıqlamasında AMEA-nın Qafqazşünaslıq İnstitutunun elmi işlər üzrə direktor müavini, siyasi elmlər doktoru Ramilə Dadaşova deyib. O qeyd edib ki, Ermənistanın Azərbaycana növbəti dəfə hərbi təcavüz etdiyi bu günlərdə Prezident, ordu və xalq arasında birlik bir daha özünü göstərdi. Azərbaycan xalqı səfərbər olunmaq istəyini bildirdi. Ermənistanı nə Kollektiv Təhlükəsizlik Müqaviləsi Təşkilatı, nə ayrı-ayrı dövlətlər, nə də öz əhalisi müdafiə etdi. Çoxlu itki verən Ermənistanda əhali hökumətə etirazını bildirdi, Ermənistanın yüksək rütbəli hərbçiləri qorxaraq ordudan qaçdılar. Türkiyə, Pakistan, Ukrayna Azərbaycanın haqq mübarizəsində onun yanında olacaqlarını vurğuladılar. Azərbaycanlıların dünyanın 60-a yaxın ölkəsində Ermənistanın təcavüzkar siyasətini pisləyən aksiyaları keçirildi. İndi təklənən Ermənistan məğlubiyyəti ilə barışa bilmir, daha da aqressivləşir və dünya birliyinin Azərbaycana qarşı münasibətini dəyişmək üçün yeni yollara əl atır. Ermənistan əvvəlcə dezinformasiyalardan yararlanmağa çalışdı. Belə bir dezinformasiya yaydı ki, guya Serbiyadan aldığı silahları qonşu Gürcüstan öz ərazisindən keçirərək Ermənistana göndərir. Rəsmi Tbilisi ermənilərin bu dezinformasiyasını təkzib etdi. Gürcüstanın Xarici İşlər Nazirliyinin yaydığı bəyanatda bildirildi ki, “...Gürcüstan və Azərbaycanı strateji tərəfdaşlıq və çoxəsrlik dostluq birləşdirir. Bu münasibətlər daha da inkişaf etdirilir və dərinləşdirilir. Hər iki ölkə regionda mühüm rol oynayır, əhəmiyyətli regional və beynəlxalq layihələri birgə həyata keçirirlər”.

Ermənistan hökuməti tərəfindən istiqamətlənən ermənilər Azərbaycanı müdafiə edən ölkələrin səfirliklərinə hücum etmək fikrinə də düşdülər. Ukrayna Xarici İşlər Nazirliyinin Azərbaycan-Ermənistan sərhədindəki vəziyyətlə bağlı bəyanatı ilə əlaqədar Ukraynanın səfiri Ermənistan Xarici İşlər Nazirliyinə çağırıldı. Bundan sonra isə Daşnaksutyun Gənclər Birliyinin üzvləri Ukraynanın İrəvandakı səfirliyinin binasına hücum edərək səfirliyin binasına borş atdılar. Ermənilərin guya Azərbaycanı müdafiə edən dövlətlərin gözlərini qorxutmaq məqsədilə törətdikləri bu əməl də bir nəticə vermədi. Belə olduqda, Ermənistan diasporunun fəalları azərbaycanlıların keçirdikləri dinc aksiyalara kobud və qanunsuz müdaxilə etdilər. ABŞ-ın Kaliforniya ştatının Los-Anceles şəhərində və Belçikanın Brüssel şəhərində yaşayan və dinc şəkildə etiraz etmək məqsədilə toplaşan az sayda olan azərbaycanlılara onlardan sayca dəfələrlə çox olan ermənilər hücum etdilər. Eyni zamanda, Ermənistan tərəfindən yönləndirilən dünyanın müxtəlif ölkələrində yaşayan ermənilər kütləvi halda ayrı-ayrı azərbaycanlılara, jurnalistlərə hücum edir, müxtəlif ağır bədən xəsarətləri yetirirlər. Ukraynanın Kiyev şəhərinin mərkəzində dörd azərbaycanlı tələbənin ermənilər tərəfindən güllələnməsi və bunlardan ikisinin ölməsi, ikisinin ağır yaralanması ermənilərin açıq surətdə terror törətdiklərini sübut edir. Məqsəd məlumdur: ermənilər qarşıdurma yaradıb, dünya dövlətlərinin, beynəlxalq təşkilatların Azərbaycanı müdafiə etdiyi bir zamanda ölkəmiz haqqında mənfi rəy yaratmaq fikrinə düşüblər. Bu, terrordur, terrorizmə qarşı mübarizəni gündəmdə tutan dünya birliyi Ermənistanın bu terror fəaliyyəti haqqında ölçü götürməlidir. Terrorçuluğa qarşı mübarizədə hər bir dövlət BMT-nin qəbul etdiyi qətnamələri yerinə yetirməlidir. Təkcə bir beynəlxalq sənədi qeyd etmək istəyirəm. Təhlükəsizlik Şurasının 2001-ci il sentyabrın 28-də qəbul etdiyi 1373 saylı qətnamə əsasında BMT Təhlükəsizlik Şurasının bütün üzvlərindən ibarət Terror əleyhinə komitə yaradıldı. Ekspertlərdən ibarət olan bu komitə qarşısında hər bir dövlət terrorizmlə mübarizə, sərhədlərə nəzarət, terrorçuların maliyyələşməsinin qarşısını almaq barədə hesabat verməlidir.

“Son hadisələr bir daha göstərdi ki, Ermənistan hökumət səviyyəsində terrorçuluğu həyata keçirən bir dövlətdir. Ona görə də bu təcavüzkar dövlət BMT Nizamnaməsinin VII fəslinə, təşkilatın beynəlxalq terrorizmlə mübarizə barədə qəbul etdiyi qərar və qətnamələrə müvafiq olaraq cəzalandırılmalı, beynəlxalq sülh və təhlükəsizliyi, qlobal sabitliyi, sosial-iqtisadi inkişafı pozan, beynəlxalq terrorizmin tərkib hissəsi olan erməni terrorizmi məhv edilməlidir. Ermənistana silah satan, onun təcavüzkar siyasətinə havadar çıxan dövlətlər haqqında da ölçü götürülməlidir", - deyə R.Dadaşova vurğulayıb.