Bakı, 10 iyun, AZƏRTAC

Son illər ölkədə tikinti sektorunun rolu durmadan artır. Əsaslı tikintiyə qoyulan investisiyaların həcmində müşahidə olunan kəskin artım, tikinti bazarının inkişafı və bu sahəyə investisiyaların axınının sürətlənməsi, həm də bu sahəyə olan tələbatdan irəli gəlir.

Bu sözləri AZƏRTAC-a açıqlamasında tanınmış memar Fəzail Bayramov deyib.

Memar bildirib ki, müasir bazar iqtisadiyyatı şəraitində milli iqtisadiyyatın bütün sahələri kimi tikinti sektoru da müstəqildir. Belə ki, inzibati idarəçilik sistemindən fərqli olaraq müasir bazar iqtisadiyyatı şəraitində istifadəçinin tələblərinin formalaşması əraziyə uyğun olaraq həyata keçirilir. Bu da ölkə daxilində fəaliyyət göstərən tikinti komplekslərinin müstəqilliyindən xəbər verir: “Azərbaycan Respublikasında tikinti sektorunun inkişafında tikinti materialları sənayesinin rolu əvəzsizdir. Hazırda bu sahənin inkişafında dövlət tərəfindən müəyyən islahatlar həyata keçirilir. Artıq xarici ölkələrdən bəzi tikinti materialları Azərbaycana gətirilmir. Respublikada tikinti materialları sənayesi ölkəmizin tikinti sektorunun tələbatlarını lazımi səviyyədə ödəmə qabiliyyətinə malikdir. Ölkəmizdə istehsal olunan armatur, sement, mişar daşı və s. rəqabətqabiliyyətli olmaqla, beynəlxalq standartlara uyğundur”.

F.Bayramov qeyd edib ki, tikinti kompleksi istehsal prosesləri ilə birbaşa bağlıdır. Buna görə də tikintidə iqtisadi səmərəliliyin artırılması istiqamətində yeni texnikaların istifadəsinə xüsusi diqqət yetirilir. Tikinti kompleksinin əsas funksiyalarından biri elmi-texniki tərəqqinin sürətlə inkişafı və onun nəticələrinin istehsalda daha tez tətbiq edilməsi, yeni texnologiya yaradılması və onun mənimsənilməsidir.

Memar həmçinin vurğulayıb ki, tikinti kompleksinin inkişaf etdirilməsinin əsas məqsədi Azərbaycanda sözügedən sektorun təşəkkülü və milli iqtisadiyyatda özünəməxsus yer tutması, tikintidə sahibkarlığın inkişafı, inşaat bazasının formalaşdırılması, tikililərin möhkəmliyini, etibarlılığını və təhlükəsizliyi təmin etmək məqsədilə dövlət siyasətinin istiqamətlərinin və tənzimləmə vasitələrinin müəyyənləşdirilməsidir.