ELM VƏ TƏHSİL


Memarlıq və İnşaat Universitetində qabiliyyət imtahanları sentyabrın 16-dan başlayacaq

Bakı, 11 sentyabr, AZƏRTAC 

Sentyabrın 16-da Azərbaycan Memarlıq və İnşaat Universitetində (AzMİU) 2020/2021-ci tədris ili üçün xüsusi qabiliyyət tələb edən memarlıq ixtisası üzrə qabiliyyət imtahanı keçiriləcək. Proses sentyabrın 18-də yekunlaşacaq.

AzMİU-dan AZƏRTAC-a bildirilib ki, abituriyentlərin tapşırıqlarını qiymətləndirmək üçün Qabiliyyət İmtahanı Komissiyası yaradılıb. Komissiyaya memarlıq ixtisası üzrə mütəxəssis hazırlığını həyata keçirən ali təhsil müəssisələrinin mütəxəssisləri, yaradıcılıq ittifaqlarının üzvləri və Dövlət İmtahan Mərkəzinin (DİM) əməkdaşları daxil edilib.

Pandemiya şəraitinin tələblərinə uyğun olaraq universitetin imtahan keçirilən binasında - idman zalında bir sıra profilaktik tədbirlər görülüb. Həmçinin binaların və otaqların dezinfeksiyası, hər bir otağa düşən iştirakçı sayının sosial məsafə prinsipinə uyğun şəkildə tənzimlənməsi, imtahan heyətinin müvafiq qoruyucu vasitələrlə (əlcək, tibbi maska) təmin olunması həyata keçirilib. Karantin şərtlərinə əsasən iştirakçıların yalnız tibbi maska ilə imtahan binasına daxil olmasına icazə veriləcək. İmtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılacaq, zəruri dezinfeksiyaedici vasitələrdən istifadə olunacaq.

Qeyd edək ki, 1-ci ixtisas qrupunda xüsusi qabiliyyət tələb edən memarlıq ixtisası üzrə qabiliyyət imtahanlarında iştirak etmək üçün ümumilikdə 230 abituriyent DİM-in saytında qeydiyyatdan keçib. Qabiliyyət imtahanında ortaya çıxan problemləri, imtahanın nəticələrdən narazı qalan abituriyentlərin şikayətlərini araşdırmaq üçün AzMİU-da Münaqişə Komissiyası yaradılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.