CƏMİYYƏT
“Mən azərbaycanlıyam” milli intellektual telelayihəsinin səkkizinci mövsümünün qalibləri mükafatlandırılıb
Bakı, 30 oktyabr, AZƏRTAC
Gənclər və İdman Nazirliyinin təşəbbüsü, Nəqliyyat, Rabitə və Yüksək Texnologiyalar, Təhsil nazirliklərinin, “Azərbaycan Televiziya və Radio Verilişləri” Qapalı Səhmdar Cəmiyyətinin təşkilatçılığı ilə keçirilən “Mən azərbaycanlıyam” milli intellektual bilik yarışmasının səkkizinci mövsümünün qaliblərinin oktyabrın 30-da Azərbaycan Dövlət Bədən Tərbiyəsi və İdman Akademiyasında mükafatlandırılması mərasimi olub.
AZƏRTAC xəbər verir ki, tədbirdə Akademiyanın rektoru Fuad Hacıyev, gənclər və idman nazirinin müavini İntiqam Babayev və digərləri iştirak ediblər.
Əvvəlcə telelayihənin VIII mövsümündən bəhs edən videoçarx nümayiş olunub.
Akademiyanın rektoru Fuad Hacıyev tədbirdə çıxış edərək gənclərin asudə vaxtının səmərəli təşkilində və onların intellektual səviyyəsinin artırılmasında telelayihənin əhəmiyyətini yüksək qiymətləndirib. Bildirib ki, Azərbaycan gəncləri həmişə dünyagörüşü və kreativ ideyaları ilə seçilirlər. Ölkəmizin tarixinin, mədəniyyətinin, coğrafiyasının tanıdılması və təbliği baxımından da telelayihənin rolu böyükdür. Ulu öndər Heydər Əliyev həmişə ölkə gənclərinə yüksək qayğı göstərib, onların ölkənin ictimai-siyasi həyatında mühüm rol oynaması üçün əlverişli şəraitin yaradılmasını diqqət mərkəzində saxlayıb. Ümummilli Lider həmişə gənclərin yüksək biliyə, intellektə sahib olmasını, vətənpərvər yetişməsinə xüsusi diqqət yetirirdi.
Gənclər və idman nazirinin müavini İntiqam Babayev tədbirdə çıxış edərək səkkiz il əvvəl start götürən layihənin cəmiyyətimiz, o cümlədən gənclərimiz tərəfindən böyük maraqla qarşılandığını vurğulayıb. Gənclərlə işin dövlət siyasətinin ayrılmaz tərkib hissəsi olduğunu qeyd edən İ.Babayev onlara diqqət və qayğı göstərilməsinin əsasının ulu öndər Heydər Əliyev tərəfindən qoyulduğunu söyləyib. Bildirib ki, ümummilli lider Heydər Əliyev gənclərimizin geniş intellektə, dünyagörüşünə malik olmalarına, milli vətənpərvərlik və dövlətçilik ruhunda tərbiyə edilmələrinə, fiziki cəhətdən sağlam yetişmələrinə xüsusi diqqət yetirirdi. Qürurverici haldır ki, müasir Azərbaycanın sağlam gəncliyi ölkəmizi bütün sahələrdə layiqincə təmsil edir. Gənclərimizin potensialının inkişaf etdirilməsi dövlət gənclər siyasətinin tərkib hissəsidir. “Mən azərbaycanlıyam” layihəsi isə intellektual potensialı olan gənclərin üzə çıxarılmasına imkan yaradır. Bu layihənin qalibi olmuş gənclər bu gün öz uğurları ilə fərqlənirlər. Layihə davamlı olacaq və daha geniş auditoriyanı əhatə edəcək.
Çıxışlardan sonra bilik yarışının qaliblərinə mükafatlar təqdim olunub.
Mükafatlandırmadan sonra mərasim tanınmış incəsənət ustalarının ifasında maraqlı konsert proqramı ilə davam edib.
“Mən azərbaycanlıyam” intellektual telelayihəsi ölkəmizin təbliğinə həsr edilmiş ilk milli televiziya oyunudur. Məhz bu xüsusiyyətlərinə görə veriliş yerli teleməkanda kifayət qədər tamaşaçı rəğbəti qazanıb.
Layihəyə yerli gənclərlə yanaşı, digər ölkələrdə yaşayan azərbaycanlıların da virtual şəkildə qoşularaq iştirak etmələri üçün imkan yaradılıb. Xaricdə təhsil alan və yaşayan gənclər oyunda dəfələrlə iştirak ediblər.