Bakı, 27 iyul, AZƏRTAC

Xalqımızın ümummilli lideri Heydər Əliyev gənclərin milli ruhda, milli-mənəvi dəyərlərimiz əsasında formalaşması işinə həmişə böyük önəm verər və bu istiqamətdə fəaliyyətin daha da genişləndirilməsi üçün səylərini əsirgəməzdi. Ulu Öndərə görə milli dəyərlərimizi, milli ənənələrimizi, tariximizi, ədəbiyyat və incəsənətimizi yaxşı bilməyən, ondan bəhrələnməyən gənc vətənpərvər ola bilməz. Hər bir gənc Azərbaycanın müstəqil gələcəyini təmin etmək üçün Vətəni, ölkəni, torpağı, dilimizi, dinimizi, milli ənənələrimizi sevməlidir. Onları sevə bilməyən, özü üçün mənəvi əsas edə bilməyən gənc həyatda özünə yer tapa bilməyəcək və şübhəsiz ki, cəmiyyətdə, ictimai-siyasi proseslərdə, müstəqil Azərbaycanın inkişafında, onun təhlükəsizliyinin təminatçısı olan Ordumuzda Vətənə, xalqa, dövlətə sədaqətlə xidmət edə bilməyəcək.

Tarix boyu dünya ordularında, eləcə də Azərbaycan Ordusunda döyüşçünün fiziki sağlamlığı, iradi keyfiyyətləri, peşəkarlıq qabiliyyəti, taktiki vərdişlərə yiyələnməsi, istifadə edəcəyi silahların müasirliyi ilə yanaşı, onun döyüş ruhu, vətənpərvərlik hissi, mənəvi-psixoloji hazırlığının hansı səviyyədə olması da şərtləndirici amillər kimi nəzərə alınıb.

İstər döyüşqabağı, istərsə də döyüşlərdə şairlər, aşıqlar zaman-zaman öz xeyir-duaları, söz və ifa etdikləri cəng havaları ilə igidləri düşmən üzərində qələbə çalmağa ruhlandırıb, onların şücaətinə, qəhrəmanlığına dastanlar bağlayıb, şan-şöhrətlərini el-obaya yayıblar.

Folklorumuza, etnoqrafiyamıza, qəhrəmanlıq dastanlarımıza nəzər salsaq görərik ki, xalq qəhrəmanlarımız bir əlində qopuz, saz, bir əlində isə qılınc, şeşpər savaş meydanına atılıb. Bəzən hərbə-zorbaları ilə düşməni elə sındırıb ki, qılıncı işə salmağa belə ehtiyac duyulmayıb.

İkinci Dünya müharibəsi illərində təkcə “Müqəddəs müharibə” mahnısı minləri, milyonları bir bayraq altına toplamadımı?! Xalq şairi Səməd Vurğunun “Bilsin ana torpaq, eşitsin Vətən, Müsəlləh əsgərəm mən də bu gündən!”, “Çiçək vaxtı deyil indi, barıt vardır havalarda”, “Qoy hər sözün ciyəriylə nəfəs alsın bir qəhrəman” misraları, Üzeyir Hacıbəylinin, Səid Rüstəmovun musiqi əsərləri, Bülbülün, Xan Şuşinskinin ifa etdikləri mahnılar müharibənin ilk günündən döyüşən ordunu qələbəyə ruhlandırmırdımı?!

Azərbaycan Ordusunun əsgər və zabitlərinin döyüş ruhu, vətənpərvərlik hissi yüksəkdir. Məhz onları zəfərdən-zəfərə, zirvədən-zirvəyə aparan bu hiss, bu duyğu idi.

Azərbaycan Prezidenti, Müzəffər Ali Baş Komandan İlham Əliyev respublikamızın ərazi bütövlüyünün bərpası, tarixi torpaqlarımızın işğaldan azad edilməsi uğrunda döyüşlərdə qazanılan möhtəşəm Qələbədən danışarkən əsgər və zabitlərimizin döyüş ruhunun, vətənpərvərlik hissinin, mənəvi-psixoloji hazırlığının yüksək səviyyədə olduğunu dəfələrlə qeyd edib.

İşğaldan azad edilən Kəlbəcər rayonuna səfəri çərçivəsində əməliyyat komando hərbi hissəsinə Döyüş Bayrağı təqdim edərkən Müzəffər Ali Baş Komandan birmənalı olaraq demişdir: “Vətən müharibəsində qazanılan Qələbənin başlıca amili milli ruh, ləyaqət və Vətənə sevgi idi”.

Hər bir Vətən əsgərində milli ruhun, ləyaqət və Vətən sevgisinin aşılanmasında ədəbiyyat və incəsənət xadimlərinin müstəsna xidmətləri vardır.

AZƏRTAC xəbər verir ki, bu barədə Azərbaycan Ordusunun Təlim və Tədris Mərkəzində keçirilən “Mənim də silahım nəğmələr idi” adlı vətənpərvərlik tədbirində ətraflı söhbət açılıb, Zəfər nəğmələri və Qələbəyə ruhlandıran şeirlər səsləndirilib.

Tədbir klassik musiqimizin korifey sənətkarlarından olan dünyaşöhrətli bəstəkar Qara Qarayev kimi bir sənət dahisindən dərs almış Azad Zahidin 65 illik yubileyinə təsadüf etdiyindən bu vətənpərvərlik mərasimi onun yaradıcılığına həsr olunub.

Tədbir ulu öndər Heydər Əliyevin və şəhadətləri ilə tarix yazan, adları tarixə yazılan şəhidlərimizin xatirəsinin bir dəqiqəlik sükutla yad edilməsi və Dövlət Himninin ifası ilə başlanıb.

Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani bəstəkarla iş birliyindən danışıb. Azad Zahidin xalqımız və Ordumuzun şəxsi heyəti tərəfindən rəğbətlə qarşılanan və dillər əzbəri olan vətənpərvərlik nəğmələrinin, hərbi marşlar və qəhrəmanlıq balladalarının ordu gənclərinin döyüş ruhunun yüksəldilməsində mühüm əhəmiyyət kəsb etdiyini nəzərə çatdırıb.

Qeyd olunub ki, hələ tələbəlik illərindən musiqi yaradıcılığı ilə nəinki respublikamızda, eləcə də sovet musiqiçiləri arasında seçilən Azad Zahid neçə-neçə irihəcmli simfonik, vokal əsərin, fortepiano və simli kvartet üçün konsertlərin, Azərbaycanda, Moskvada və Dağıstanda yayımlanan 200-dən çox radioverilişin müəllifidir. Bu əsərlərin içərisində bəstəkarın yaradıcılığının əsas istiqamətini vətənpərvərlik mövzusunda yazdığı musiqi əsərləri təşkil edir. O, hər zaman dövlətinə, xalqına sədaqətlə xidmət edən musiqiçidir. “Xocalı yol gözləyir” rekviem-kompozisiyası, “Kül altından boy atacaq Xocalı” televiziya tamaşası, “İlhamlı günləri Azərbaycanın”, “Həzilər yetirən Vətən torpağı”, “Azərbaycan əsgəri”, “Biz gəlirik, Qarabağ”, “Lələtəpə fatehləri”, “Aprel Zəfəri”, “Qəhrəman Tərtərim”, “Bayraqtəpə qartalları”, “Qələbəyə gedən yollar”, “Qalib sərkərdəsi Azərbaycanın”, “Vətən, sənin şəhidlərin”, “Günnüt Zəfəri”, “Horadiz halayı”, “Zəfər nəğməsi”, “Müzəffər Ordumuz” kimi vətənpərvərlik mahnıları, hərbi marşlar və qəhrəmanlıq balladaları həm xalqımız, həm də Ordumuzun şəxsi heyəti tərəfindən sevilir və hər dəfə dövlət tədbirlərində, konsertlərdə, efir və ekranlarda ifa edilərkən böyük maraqla qarşılanır.

Nəzərə çatdırılıb ki, Azad Zahid 20 ildən çoxdur Müdafiə Nazirliyi ilə əməkdaşlıq edir, təmənnasız yazdığı musiqi əsərləri ilə Azərbaycan əsgərinin döyüş ruhunun, Vətən sevgisinin daha da yüksəldilməsi üçün səylərini əsirgəmir.

Tədbirdə Şəxsi Heyət Baş İdarəsi rəisinin müavini – Kadrlar İdarəsinin rəisi general-mayor Elçin Xəlilov çıxış edərək Azad Zahidi Müdafiə Nazirliyinin rəhbərliyi adından 65 illik yubileyi münasibətilə təbrik edib və onun Azərbaycan Respublikasının Prezidenti adından müdafiə nazirinin əmri ilə “Hərbi əməkdaşlıqda fərqlənməyə görə” Azərbaycan Respublikasının medalını bəstəkara təqdim edib.

Sonra müdafiə naziri general-polkovnik Zakir Həsənovun Azərbaycan Ordusunun yaxın dostu, vətənpərvər musiqiçi Azad Zahidə ünvanlanan təbrik məktubu oxunub.

Təbrik məktubunda qeyd edilir ki, Azad Zahidin gündən-günə tərəqqi edən Vətənimizə, müstəqil dövlətimizə, Müzəffər Ali Baş Komandana, eləcə də qüdrətli Azərbaycan Ordusuna, unudulmaz şəhidlərimizə, mübariz əsgər və qazilərimizə həsr etdiyi musiqi əsərləri hərbi qulluqçularımızın döyüş ruhunun, mənəvi-psixoloji hazırlığının, vətənpərvərlik duyğularının daha da yüksəldilməsində mühüm əhəmiyyət kəsb edir.

Müdafiə naziri əmin olduğunu bildirir ki, bundan sonra da bəstəkarın yaradacağı yeni-yeni vətənpərvərlik mahnıları və hərbi marşlar Azərbaycan əsgərini zəfərdən-zəfərlərə, zirvədən- zirvələrə gedən yollarda daha da ruhlandıracaq.

Bəstəkar Azad Zahid göstərilən diqqətə, səmimi münasibətə görə Müzəffər Ali Baş Komandan İlham Əliyevə və Müdafiə Nazirliyinin rəhbərliyinə minnətdarlığını bildirərək deyib: “Vətən müharibəsində qazanılan Qələbə xalqımızın birliyinin, həmrəyliyinin, dövlətimizin iqtisadi gücünün, ulu öndər Heydər Əliyevin azərbaycançılıq məfkurəsinin, rəşadətli Azərbaycan Ordusunun əsgər və zabitlərinin, qətiyyətli sərkərdəmizin hücum diplomatiyasının, dəmir yumruğunun qələbəsidir. Müharibə başlanan ilk gündən mənim də silahım nəğmələrim oldu. Fəxr edirəm ki, bu möhtəşəm Qələbənin qazanılmasında az da olsa, mənim də xidmətim olub. Bu, mənim vətəndaşlıq borcumdur. Bu gündən sonra da Müzəffər Ali Baş Komandanın əsgəri olaraq öz yaradıcılığımla xalqıma, dövlətimə və qalib Azərbaycan Ordusunun igid əsgərlərinə xidmət edəcəyəm”.

Əməkdar jurnalist Rəşid Faxralının yubilyara həsr etdiyi şeir bəstəkara duyğulu və qürurverici anlar yaşadıb.

Tədbirdə bəstəkarın Abdulla Qurbaninin sözlərinə yazdığı ondan çox vətənpərvərlik mahnısı ifa edilib. Tamaşaçılar Xalq artisti Gülyaz Məmmədovanın, Əməkdar artistlər Cahangir Qurbanovun, Ehtiram Hüseynovun və başqalarının çıxışlarını, o cümlədən Azərbaycan Ordusu Sənədli və Tədris Filmləri Mərkəzinin, Gəncə Qarnizonu İdeoloji və Mədəniyyət Mərkəzinin hazırladıqları videoçarxları maraqla izləyiblər.

Şəhid mayor Toğrul Bərxudarovun həyat yoldaşı Zəhra xanım və oğlu Əli çıxış edərək hər dəfə Azad Zahidin şəhidlərimizin xatirəsinə, qazi və xidmətdə olan qəhrəman döyüşçülərimizin şərəfinə yazdığı əsərləri dinlədikcə həm təsəlli tapdıqlarını, həm də böyük qürur hissi keçirdiklərini bildirib və bəstəkara yeni-yeni yaradıcılıq uğurları arzulayıblar.