QAN YADDAŞI
Mərakeşdə Xocalı soyqırımının 29-cu ildönümünə həsr olunmuş simpozium keçirilib
Rabat, 1 mart, AZƏRTAC
Azərbaycan Respublikasının Mərakeş Krallığındakı səfirliyinin təşkilatçılığı ilə Mərakeş Krallığının Sabiq Müqavimətçilər və Azadlıq Ordusunun Sabiq Üzvləri Ali Komissarlığının mənzıl-qərargahında Xocalı soyqırımının 29-cu ildönümünə həsr olunmuş simpozium və fotosərgi keçirilib.
AZƏRTAC xəbər verir ki, tədbirdə Mərakeşin Sabiq Müqavimətçilər Hərəkatının Ali Komissarı Mustafa Əl-Kəsiri, Türkiyə və Qambiyanın Mərakeşdəki səfirləri Əhməd Aydın Doğan və Saffie Lui Çesey, Türkiyənin Hərbi-attaşesi, Tunis, Mavritaniya və Malinin Rabatdakı səfirliklərinin nümayəndələri, Mərakeş-Azərbaycan Dostluq qrupunun üzvləri, yerli ictimai-siyasi xadimlər, jurnalistlər, V Məhəmməd Universitetinin professorları, tarixçilər iştirak ediblər.
Əvvəlcə, Xocalıda qətlə yetirilmiş insanların xatirəsi bir dəqiqəlik sükutla yad edilib.
1992-ci ilin fevralın 25-dən 26-na keçən gecə Xocalıda Ermənistan silahlı qüvvələri keçmiş SSRİ-nin 366-cı motoatıcı alayının köməyi ilə bir gecədə 613 dinc sakinin amansızcasına qətlə yetirilməsindən, ölkəmizə və xalqımıza qarşı yürüdülən işğalçılıq və etnik təmizləmə siyasətindən danışan səfir Oktay Qurbanov XX əsrin sonunda ermənilərin Xocalıda törədikləri soyqırımı indiyədək bəşəriyyətə qarşı yönəldilmiş ən ağır cinayətlərdən biri kimi qiymətləndirildiyini bildirib.
Oktay Qurbanov ümummilli lider Heydər Əliyevin 1993-cü ildə siyasi hakimiyyətə qayıdışından sonra Xocalı soyqırımına siyasi-hüquqi qiymət verildiyini bildirib, dünyanın gözü qarşısında törədilmiş vəhşiliklərin, bu cür cinayətlərin təkrarlanmaması üçün Xocalı soyqırımının dünyada tanımasının xüsusi əhəmiyyət kəsb etdiyini vurğulayıb.
Azərbaycan Prezidenti İlham Əliyevin Xocalı soyqırımının 20-ci ildönümü haqqında imzaladığı Sərəncama istinad edərək səfir azərbaycanlılara qarşı erməni şovinist dairələrinin XIX-XX əsrlərdə mərhələlərlə həyata keçirdiyi etnik təmizləmə siyasətinin tərkib hissəsi olan Xocalı soyqırımı haqqında həqiqətlərin dünya ictimaiyyətinə çatdırılmasının, insanlıq əleyhinə yönəldilmiş bu ağır hərbi cinayətin beynəlxalq miqyasda öz hüquqi-siyasi qiymətini almasının vacibliyini diqqətə çatdırıb.
Xocalı soyqırımının beynəlxalq səviyyədə tanınması məsələsinə toxunan Azərbaycan səfiri hazırda Xocalı soyqırımının dünyanın bir sıra ölkələrinin parlament səviyyəsində, ABŞ-ın 24 ştatının parlament səviyyəsində, İslam Əməkdaşlıq Təşkilatı tərəfindən tanındığını qeyd edib, 2017-ci ildə Kot Divuarın paytaxtı Abican şəhərində keçirilmiş İƏT-ə üzv ölkələrin Xarici İşlər Nazirləri Şurasının 44-cü sessiyasında Azərbaycanla bağlı bir sıra mühüm qətnamələrlə yanaşı, Təşkilata üzv dövlətlər tərəfindən Xocalı soyqırımının qurbanları ilə həmrəyliyini ifadə edən qətnamənin də qəbul edildiyini vurğulayıb.
Mülki əhaliyə qarşı törədilmiş kütləvi vəhşilikləri qəti şəkildə pisləyən “Xocalı qırğınının qurbanları ilə həmrəylik” adlı qətnamədə Azərbaycanın Xocalı şəhəri və işğal edilmiş digər ərazilərində törədilmiş cinayətlərin müharibə cinayətləri, insanlıq əleyhinə cinayətlər və soyqırımı kimi yerli və beynəlxalq səviyyədə tanınması istiqamətində lazımi səy göstərməyə çağırış ifadə edilib. Qətnamədə, həmçinin 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq təşviqat kampaniyasının fəaliyyəti yüksək qiymətləndirilir və üzv dövlətlər kampaniyanı dəstəkləməyə və onun fəaliyyətində yaxından iştirak etməyə dəvət edilir.
Sonra O.Qurbanov 2020-ci ildə İkinci Qarabağ müharibəsində də Ermənistan tərəfindən məqsədyönlü şəkildə Azərbaycanın mülki əhalisinə qarşı insanlığa qarşı cinayət əməllərini törədildiyini diqqətə çatdırıb, döyüş bölgəsindən uzaqda yerləşən Gəncə, Bərdə, Tərtər və digər şəhərlərimizə raket zərbələri endirildiyini, nəticədə 12 uşaq və 27 qadın daxil olmaqla 100 mülki şəxsin öldürüldüyünü və 423 mülki şəxsin isə yaralandığını qeyd edib.
Daha sonra səfir Azərbaycan Respublikasının Xarici İşlər Nazirliyinin Xocalı soyqırımının 29-cu ildönümü ilə əlaqədar bəyanatını tədbir iştirakçılarının diqqətinə çatdırıb.
Sonra Türkiyənin Mərakeşdəki səfiri Ahmet Aydın Doğan çıxış edərək, Türkiyə ilə Azərbaycan arasında “bir millət, iki dövlət ” kəlamına əsaslanan həmrəylik və qardaşlıq əlaqələrini qeyd edib, Xocalıda törədilmiş vəhşi təcavüz və soyqırımı ilə bağlı qardaş Azərbaycan xalqının kədərini səmimi hissləri ilə bölüşdüyünü ifadə edib.
Daha sonra Azərbaycan-Mərakeş Dostluq qrupunun üzvləri tanınmış politoloq, Əhməd Nurəddin və Azərbaycan Tibb Universitetinin məzunu Məhəmməd Reçu çıxış edərək 29 il öncə törədilmiş cinayətin gələcəkdə təkrarlanmaması üçün Xocalı soyqırımının anılmasının hər bir insanın mənəvi-əxlaqi borcu olduğunu bildiriblər.
Sonda tədbir iştirakçilarına Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası barədə məlumat verilib, Xocalı soyqırımının dəhşətlərini özündə əks etdirən foto və kitab sərgisinə baxış keçirib.
Qeyd edilməlidir ki, Azərbaycanın Mərakeşdəki səfirliyinin dəstəyi ilə Mavritaniyanın http://elhourriya.net/102035/, http://initiativesnews.com/, Seneqalın https://www.nettali.com ərəb və fransız dilində olan elektron media portallarında Xocalı soyqırımı barədə məqalələr yer alıb.
Nigar Cəfərli
AZƏRTAC-ın xüsusi müxbiri
Rabat