İQTİSADİYYAT


Mərkəzi Bank pilot layihə kimi ibtidai sinif müəllimlərinə təlim keçirib

Bakı, 7 yanvar, AZƏRTAC

2018-ci ilin noyabr-dekabr ayları ərzində Bakı şəhəri üzrə Təhsil İdarəsinin təşkilatçılığı ilə ibtidai siniflərdə Həyat Bilgisi fənnini tədris edən müəllimlərə təlimlər keçirilib.

Mərkəzi Bankdan AZƏRTAC-a bildiriblər ki, pilot layihə kimi keçirilən bu təlimlərdə Bakı şəhərinin ümumtəhsil məktəblərinin 100-dən artıq ibtidai sinif müəlliminə maliyyə savadlılığı portalı (bizimpullar.az) haqqında məlumat verilib, Həyat Bilgisi və maliyyə savadlılığı, pul nişanları və onların mühafizə elementləri, büdcə planlaşdırması, mövcud resurslardan qənaətlə istifadə, vergi və dövlət büdcəsi, sığorta və digər mövzular tədris olunub.

Təlimlərin yekununda iştirakçıların sualları cavablandırılıb, onlara öyrədici vəsaitlər paylanılıb. İştirakçıların təlim haqqında rəyləri öyrənilib və yekun qiymətləndirilmə aparılıb. Təlimin sonunda keçirilmiş imtahan nəticələrinə müvafiq olaraq müəllimlər sertifikat əldə etmək hüququ qazanıblar.

Mərkəzi Bank təlim iştirakçılarının rəylərini nəzərə alaraq ibtidai sinif müəllimlərinə yönəlmiş bu pilot layihəni davam etdirməyi, eləcə də maliyyə maarifləndirilməsi istiqamətində ümumtəhsil məktəblərinin digər müəllim heyəti üçün gələcəkdə də müxtəlif tədbirlər keçirməyi nəzərdə tutur.

Qeyd edək ki, Azərbaycan Respublikasının Mərkəzi Bankı "Azərbaycan Respublikasında maliyyə xidmətlərinin inkişafına dair Strateji Yol Xəritəsi"ndə prioritet istiqamət kimi müəyyənləşdirilmiş "Maliyyə bazarı iştirakçılarının bilik və bacarıqlarının artırılması" hədəfinin tədbirlərinin icrasını davam etdirir. Bu strateji tədbirlərin icrası çərçivəsində Mərkəzi Bank tərəfindən ölkənin ümumtəhsil məktəblərinin müəllimlərinə maliyyə savadlılığının kurikuluma inteqrasiya edilmiş elementlərinə dair peşəkar təlimlər keçirilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.