İQTİSADİYYAT


Mərkəzi Bankda "Elektron Xidmətlər Portalı"nın istismara verilməsi ilə bağlı təqdimat olub

Bakı, 1 oktyabr, AZƏRTAC

Mərkəzi Bankın "Elektron Xidmətlər Portalı" oktyabrın 1-dən real istismara verilib.

Bankın mətbuat xidmətindən AZƏRTAC-a bildiriblər ki, Azərbaycan Respublikası Mərkəzi Bankının mandatından irəli gələn vəzifə və funksiyaların həyata keçirilməsinin effektivliyinin yüksəldilməsi, o cümlədən Mərkəzi Bank tərəfindən dövlət qurumlarına, kredit təşkilatlarına və əhaliyə göstərilən xidmətlərin elektronlaşması yolu ilə əhatə dairəsinin genişləndirilməsi və istifadəçi məmnunluğunun artırılması bankın əsas hədəflərindəndir. Bu hədəfin realizasiyası məqsədilə Mərkəzi Bankda bir pəncərə prinsipinə əsaslanan mərkəzləşdirilmiş Elektron Xidmətlər Portalı (www.e-cbar.az) yaradılıb. Adıçəkilən Portal üzərindən elektron statistik məlumatların toplanılması və emalı, təkmil elektron imzaların əldə edilməsi və avtomatlaşdırılmış qaydada ödənişlərin aparılması, saxta pul nişanlarının monitorinqi, elektron müraciətlərin qəbulu və cavablandırılması, habelə maliyyə savadlılığının artırılması üzrə informasiya resursuna və Hökumət Ödəniş Portalına çıxış imkanları təmin edilib.

Sözügedən Portalın oktyabrın 1-dən real istismara verilməsini nəzərə alaraq, ölkədə fəaliyyət göstərən kredit təşkilatlarının əməkdaşlarının iştirakı ilə Mərkəzi Bankda müvafiq görüşlər keçirilib, xüsusilə "Saxta pul nişanlarının monitorinqi" və "Elektron statistik məlumat bazası və analitik hesabatlılıq" sistemləri daha geniş nümayiş etdirilib.

Saxta pul nişanlarının monitorinqi sistemi vasitəsilə saxtakarlığa qarşı mübarizə sahəsində müvafiq dövlət orqanları ilə koordinasiyanın aparılması, pul nişanlarının ekspertizası üzrə həyata keçirilən biznes proseslərin avtomatlaşdırılması, müvafiq hesabatlığın formalaşdırılması məqsədilə saxta pul nişanları üzrə ölkədə vahid məlumat bazasının yaradılması və bu məlumatlara real vaxt rejimində çıxış imkanının əldə olunması təmin edilib.

Belə ki, əhali köhnəlmiş və dövriyyəyə yararsız pul nişanlarının dəyişdirilməsi, eləcə də həqiqiliyi şübhə doğuran pul nişanlarının ekspertizaya təqdim etmək üçün qeyd olunan sistemdən istifadə edə biləcəklər. Bu məqsədlə vətəndaşlar sistemdə onlayn qeydiyyatdan keçərək Mərkəzi Bankın əsas inzibati binasında və ərazi idarələrində milli pul nişanlarının dəyişdirilməsi və ekspertizası üzrə təqdim edilən xidmətlərdən yararlana bilərlər.

Eyni zamanda, vahid statistik platformanın yaradılması və maliyyə sektoru üzrə statistik məlumatların toplanması, emalı və yayımlanması ilə bağlı Mərkəzi Bankda istismarda olan "Elektron statistik məlumat bazası və analitik hesabatlılıq sistemi"nə məlumatların yüklənməsi prosesinin daha effektiv təşkili məqsədilə mövcud informasiya sistemi yenilənmiş və fəaliyyəti Elektron Xidmətlər Portalı üzərindən təmin edilib. Funksional imkanları daha da genişləndirilmiş modul qurğu vasitəsilə statistik hesabatların toplanması prosesi əhəmiyyətli dərəcədə təkmilləşdirilib, məlumatların vaxtlılıq və keyfiyyətlilik parametrləri üzərində nəzarət sistemi gücləndirilib.

Ölkənin bank sektorunda təklif olunan xidmətlərin daha effektiv təşkili məqsədilə elektronlaşması və onların əhatə dairəsinin genişləndirilməsi ilə bağlı fəaliyyət davam etdiriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.