ELM VƏ TƏHSİL
Mərkəzi Elmi Kitabxanada “Anarın Dədə Qorqud yaradıcılığı” kitabının təqdimatı olub
Bakı, 12 mart, AZƏRTAC
Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) professor Yeganə İsmayılovanın Azərbaycan Yazıçılar Birliyinin sədri, Xalq yazıçısı Anara həsr olunmuş “Anarın Dədə Qorqud yaradıcılığı” kitabının təqdimatı olub.
MEK-dən AZƏRTAC-a bildirilib ki, AMEA-nın vitse-prezidenti, akademik İsa Həbibbəyli yazıçının yaradıcılığından, onun ədəbiyyatımıza, mədəniyyətimizə, eləcə də kinomuza gətirdiyi yeniliklərdən danışıb. Bildirib ki, xalq şairləri Rəsul Rza və Nigar Rəfibəylinin ailəsində dünyaya göz açan Anar ədəbiyyatımızın inkişafında yüksək əməyi olan yazıçı, ziyalı və dəyərli insandır. Onun əsərləri təkcə Azərbaycanda deyil, dünyanın bir çox ölkələrində sevilir.
İsa Həbibbəyli deyib: “Anar yalnız yazıçı deyil, həm də ssenaristdir. Onun ədəbiyyatımıza bəxş etdiyi bir çox dəyərli əsərləri əsasında məşhur filmlərimiz ərsəyə gəlib. Bütün bunlar Anar yaradıcılığının yüksək dəyərindən xəbər verir”.
Akademik yazıçının yaradıcılığını, şəxsiyyətini Cəlil Məmmədquluzadə, Əbdürrəhim bəy Haqverdiyev yaradıcılığı ilə eyni sırada gördüyünü bildirib.
İsa Həbibbəyli kitabın məziyyətlərini diqqətə çatdırıb və məhz Anar haqqında belə bir dəyərli əsər yazdığına görə Yeganə İsmayılovaya təşəkkür edib.
Yunus Əmrə İnstitutu Bakı Türk Mədəniyyət Mərkəzinin müdiri Cihan Özdemir deyib: “Anar təkcə Azərbaycanın deyil, bütün türk dünyasının önəmli yazıçısıdır. O, Türkiyədə də tanınır, sevilir və əsərləri həvəslə oxunur”.
BDU-nun professoru Cahangir Məmmədli Anar haqqında bu cür dəyərli kitabın ərsəyə gəlməsini yüksək dəyərləndirib. O, Anarın Mirzə Cəlilə həsr etdiyi “Anlamaq dərdi” əsərindən söz açıb. Qeyd edib ki, bu, XX əsrin böyük dramaturqu Cəlil Məmmədquluzadə haqqında yazılmış ən sanballı əsərdir.
Azərbaycan Dövlət Pedaqoji Universitetinin kafedra müdiri, professor Himalay Qasımov, Azərbaycan Yazıçılar Birliyinin üzvü, filologiya elmləri doktoru Salidə Şərifova, Bakı Dövlət Universitetinin (BDU) professoru Anar İsgəndərov, filologiya elmləri doktoru Əlizadə Əsgərli və digər çıxış edənlər ədəbiyyatımızda xüsusi mövqeyə malik Anar yaradıcılığının böyüklüyündən söz açıblar.
BDU-nun professoru, kitabın müəllifi Yeganə İsmayılova Anarın Dədə Qorqud yaradıcılığı haqqında geniş məlumat verib, kitabın nəşr edilməsində əməyi olanlara təşəkkürünü bildirib.
Sonda çıxış edən Xalq yazıçısı Anar iştirakçılara və tədbirin təşkilatçısı olan MEK-ə təşəkkürünü bildirib. Qeyd edib ki, Dədə Qorqudun bizim üçün əhəmiyyəti onun bütün türk dünyasının abidəsi olmasıdır. Yazıçı Dədə Qorqud dastanını folklor nümunəsi kimi deyil, Azərbaycanın yazılı ədəbiyyat nümunəsi kimi qiymətləndirmək təklifi ilə AMEA Ədəbiyyat İnstitutunun rəhbərliyinə müraciət edib. O, həmçinin milləti olduğu kimi göstərən və qüsurlarını aradan qaldırmağa çalışan Mirzə Cəlilin, Sabirin Azərbaycan ədəbiyyatındakı önəmli yerindən söz açıb və onları “nadan” tənqidlərdən qorumağa çağırıb.