İQTİSADİYYAT
Mərkəzi və yerli icra hakimiyyəti orqanlarının nümayəndələri dövlət satınalmaları sahəsindəki islahatlara dair məlumatlandırılıb
Bakı, 25 yanvar, AZƏRTAC
Mərkəzi və yerli icra hakimiyyəti orqanlarının nümayəndələri İqtisadi islahatların Təhlili və Kommunikasiya Mərkəzində (İİTKM) Antiinhisar və İstehlak Bazarına Nəzarət Dövlət Agentliyi ilə birgə dövlət satınalmaları sahəsində aparılan iqtisadi islahatlar barədə məlumatlandırılıb.
Mərkəzdən AZƏRTAC-a bildirilib ki, İİTKM-in icraçı direktoru Vüsal Qasımlı dövlət satınalmalarının effektiv planlaşdırılması və icrası, həmçinin rəqabətli satınalma metodlarında istifadə imkanlarının yaradılması məqsədilə Prezident İlham Əliyevin Fərmanına əsasən "Dövlət satınalmaları haqqında" Azərbaycan Respublikasının Qanununda dəyişiklik edildiyini deyib: "Bu dəyişikliyə əsasən dövlət satınalmalarının vahid internet portalının yaradılması ilə ölkədə elektron satınalma modelinə keçid təmin ediləcək. Nəticə etibarı ilə isə, dövlət satınalmalarının planlaşdırılması, tender təklifinin qəbul olunması, eyni zamanda, iddiaçıların hüquqlarının qorunması üzrə təkmilləşdirilmiş nəzarət mexanizmi formalaşdırılacaq".
Diqqətə çatdırılıb ki, vahid internet portalı vasitəsilə hökumətin satınalma planları, tenderdə iştirak imkanları, müqavilələrin bağlanması ilə bağlı bütün məlumatlar cəmiyyətin bütün üzvləri üçün əlçatan olacaq. Eyni zamanda, satınalma üzrə bütün prosedurlar və məlumat mübadiləsi onlayn olaraq həyata keçirilməklə, vahid internet portalı tender üzrə iştirak haqqı və tender təklifinin təqdim edilməsi imkanı yaradacaq.
İİTKM-in Antiinhisar və İstehlak Bazarına Nəzarət Dövlət Agentliyi ilə birgə hazırladığı infoqrafik təqdimatla mərkəzi və yerli icra hakimiyyəti orqanlarının nümayəndələrinin diqqətinə çatdırılıb ki, dövlət satınalmaları üzrə həyata keçirilən islahat tədbirləri nəticəsində satınalan təşkilatın tender təklifinin təminatını tender təklifinin ümumi qiymətinin 1 faizinədək məbləğdə müəyyənləşdirməsi imkanının yaradılması, malgöndərənlərin şikayətlərinə baxılması müddətinin 20 bank günündən 10 bank gününədək, qəbul olunmuş qərarın isə elektron qaydada təqdim edilməsi ilə 3 bank günündən bir bank gününədək azaldılıb.
Dövlət satınalmaları üzrə aparılan islahat tədbirləri Prezident İlham Əliyev tərəfindən həyata keçirilən kompleks biznes islahatı tədbirlərinin tərkib hissəsi olmaqla, dövlət satınalmalarının vahid internet portalı vasitəsilə dövlət vəsaitlərindən səmərəli və effektiv istifadə imkanının, həmçinin ölkənin beynəlxalq reytinq qiymətləndirmələrində mövqeyinin irəliləməsinə şərait yaradılacağı gözlənilir.