Bakı, 27 sentyabr, AZƏRTAC

Məscidlərimizdə 27 sentyabr - Anım Günündə şəhidlərimizin xatirəsi anılıb.

AZƏRTAC xəbər verir ki, Təzəpir məscidində əvvəlcə Vətən müharibəsində canını qurban verən şəhidlərimizin ruhuna dualar oxunub.

Qafqaz Müsəlmanları İdarəsinin (QMİ) sədri şeyxülislam Allahşükür Paşazadə çıxış edərək bildirib ki, xalqımız bu gün öz tarixində möhtəşəm gün – Zəfər yolunun başlanğıcı sayılan 27 sentyabr - Anım gününü qeyd edir. Azərbaycan torpaqlarının 30 illik erməni işğalına son qoyan Vətən müharibəsinin başlanmasından bir il ötür. Uca Allahın köməyi, Prezident, Müzəffər Ali Baş Komandanımız İlham Əliyevin rəhbərliyi ilə rəşadətli Azərbaycan Ordusu müqəddəs Vətən torpaqlarımızı işğaldan azad etmək üçün ayağa qalxdı, beynəlxalq hüququn təmin edə bilmədiyi ərazi bütövlüyümüzü bərpa etmək kimi şərəfli vəzifəni həyata keçirdi. Azərbaycanın ərazi bütövlüyünün bərpası uğrunda qəhrəmanlıqla vuruşan ordumuz Müzəffər Liderimizin siyasi iradəsi və qalib sərkərdəliyilə dünya hərb tarixinə Şuşa qalasının alınması kimi şanlı səhifə yazdı, Azərbaycan Bayrağını əzəli torpaqlarımızda ucaltdı.

Şeyxülislam Allahşükür Paşazadə deyib ki, tarixi ədalətin bərpası yolunda Haqq savaşımızın mübarək tarixi hər bir azərbaycanlının şərəf günü, qürur mənbəyidir. Bu tarixin milli-mənəvi dirçəlişimizin, dövlətçilik qüdrətimizin, Vətən sevgisinin, iman gücünün zirvəsi olaraq xalqımızın yaddaşında önəmi olduqca böyükdür. Azərbaycan xalqı 27 sentyabrda illərlə həsrətində olduğu əzəli torpaqlarını işğalçıdan, öz milli, dini, mədəni abidələrini əsarətdən azad etmək yolunda, bərbad edilmiş şəhər, kəndlərimizə, yaşayış məskənlərimizə sahib çıxmaq üçün haqq mübarizəsinə başladı. Müqəddəs Qurani-Kərimdə buyurulduğu kimi: "Düşmən hücumuna məruz qalanlara (möminlərə) zülmə uğradıqları üçün (döyüşməyə) izn verilmişdir. Şübhəsiz ki, Allah onlara yardım etməyə qadirdir" (Həcc, 39)

Qələbəmiz naminə qurbanlar verdik, dini və milli mənsubiyyətindən asılı olmayaraq Azərbaycan vətəndaşları Vətən yolunda canlarını fəda etdilər. Onların hər birinin boynumuzda haqları vardır. Bu gün biz Vətən uğrunda şəhid olanlarımızı rəhmət dualarıyla yad edir, ailələrinə, yaxınlarına başsağlığı veririk. Vətən müharibəsində şücaət göstərərək şəhidlik məqamına yüksəlmiş Azərbaycan Ordusunun qəhrəman əsgər və zabitlərinə Allahdan rəhmət, qazilərimizə şəfalar diləyirik!

QMİ sədri deyib ki, Azərbaycan tarixinə Böyük Fateh, tarixi ədalətin bərpası yönündə şanlı qələbələri ilə əbədi həkk olunan dövlət rəhbərimizin misilsiz səyləri ilə dünya azərbaycanlılarının 30 illik Qarabağ həsrətinə, həmçinin insanlıq tarixində böyük ədalətsizliyə, vandalizmə, bəşəri cinayətlərə son qoyuldu, məscidlərimiz, ziyarətgahlarımız əsl sahiblərinə qaytarıldı. Möhtərəm dövlət başçımız dağıdılmış, lakin milli ruhumuz, tarixi kimliyimiz üçün mənəvi əzəmətini qoruyub saxlayan məscidlərə, xristian məbədlərinə yeni nəfəs verəcəyini bəyan etdi. Bu gün Azərbaycan xalqının əbədi, əzəli torpaqlara Böyük Qayıdışını təmin etmək, erməni faşistləri tərəfindən vəhşicəsinə viran qoyulmuş şəhər və kəndləri dirçəltmək, Qarabağda müasir, yüksək səviyyədə həyat şəraiti təmin etmək istiqamətində dövlətimiz fövqəladə tədbirlər reallaşdırır. Din xadimlərinin unudulmaz Ağdam, Şuşa səfərləri zamanı viran qoyulmuş məscidlərimizi, xristian məbədlərini görmək nə qədər kədərli idisə, Şuşada əsası qoyulmuş yeni, möhtəşəm məscid binasının təməlini, bərpa və yenidən qurulan məscid və məbədləri görmək bir o qədər fərəhvericidir. Füzulidə fəaliyyətə başlamış Beynəlxalq hava limanı, Şuşaya aparan Zəfər yolu qalib Azərbaycan dövlətinin iqtisadi qüdrətinin təcəssümüdür. Uca Allahın köməyi ilə, müdrik dövlət rəhbərimiz Zati-aliləri İlham Əliyevin və ölkəmizin Birinci vitse-prezidenti Mehriban xanım Əliyevanın misilsiz səyləri ilə, əminik ki, ən qısa zamanda Azərbaycanın Qarabağ torpaqları öz yeni, gözəl görkəmi ilə hər birimizi sevindirəcəkdir.

Bizim Vətən müharibəmiz, qələbəmiz qlobal əhəmiyyətli, dünya siyasətinin gedişatına təsir edən, yeni düzən yaradan bir zəfərdir — haqqın, ədalətin şər üzərində qələbəsidir. Bu, İslam ümməti adına böyük qələbədir. Qardaş Türkiyə dövlətinin siyasi-mənəvi dəstəyi, dost yardımı, birgə imzalanan Şuşa Bəyannaməsi tarixdə qalacaq əsl qardaşlıq örnəyidir. Fürsətdən istifadə edərək, Vətən mücadiləmizdə bizə dəstək verən, haqqımızı müdafiə edən istər müsəlman, istər xristian dövlətlərinə, dost, qardaş ölkələrə bir daha minnətdarlığımızı ifadə etmək istərdim.

Dindarlarımız, xüsusən, din xadimlərimiz həmin mübarək, taleyüklü günlərdə gecəli-gündüzlü xalqın yanında oldular, əsgərlərimizə, onların ailə və yaxınlarına dini-mənəvi xidmət göstərdilər. Bu, bizim din xadimi olaraq mənəvi vəzifəmiz, vətəndaşlıq borcumuzdur və biz bu vəzifəmizi hər zamankı kimi layiqli şəkildə həyata keçirdik. Din xadimlərimiz sırasında öz vəzifə borcunu yerinə yetirərkən şəhid olanlar oldular. Fəxarətdoğurucu haldır ki, möhtərəm dövlət başçımız İlham Əliyev cənabları mədəniyyət mərkəzimiz Şuşanın Cıdır düzündə etdiyi tarixi çıxış zamanı Azərbaycan dindarlarının Vətən müharibəsində qazanılan Zəfərdə töhfəsini xüsusi qeyd etdi.

QMİ sədri deyib ki, bu gün İslam tarixində böyük önəmi olan bir gün - şəhidlik məktəbinin ali nümayəndəsi Həzrəti Hüseyn əleyhissəlamın şəhadətinin 40-cı günü - Ərbəin qeyd olunur. Bu günün özəlliyi və əhəmiyyəti 1400 ilə yaxın müddət ərzində ümmətin yaddaşında qorunub saxlanılan, iman və ədalət uğrunda şəhidliyə hazır olmağın rəmzi kimi yad edilməsindədir. Bu fəlsəfəni gözəl dərk edən və ona dəyər verən xalqımız bu ilki Ərbəini tarixinin möhtəşəm ildönümü günündə qeyd edir. Vətən şəhidlərimizin Anım gününün məhz bu tarixə təsadüf etməsinin özündə də bir ilahi hikmət vardır. Zəfəri bizə bəxş edən şərafətli şəhidlərimizin anaları başlarını dik tutsunlar, Vətən onların Allahın cənnətinə ucalmış övladları ilə fəxr edir, qürur duyur. Müqəddəs Kitabımızda buyurulduğu kimi: “Allah yolunda şəhid olanları əsla ölü zənn etməyin! Əksinə, onlar diridirlər və onlara Rəbbinin cənnət ruzilərindən əta olunur” (Ali-İmran, 169).

Bu gün Vətən müharibəmizin Anım gününü - birinci ildönümünü və Ərbəini yüksək ehtiramla qeyd edən xalqımıza Allah əcr versin! Kərbəla şəhidlərinə, Vətən şəhidlərinə Allah-Təala rəhmət eləsin! Uca Allah hər zaman xalqımıza yardımçı olsun, müdrik dövlət rəhbərimizi və Azərbaycanımızı qorusun, qəhrəman Ordumuzu və dövlətimizi müzəffər qərar versin! Amin!