Bakı, 16 iyun, AZƏRTAC

İyunun 16-da Fövqəladə Hallar Nazirliyinin (FHN) Akademiyasında Şərq Tərəfdaşlığı ölkələrində həyata keçirilən Avropa İttifaqının “Təbii və texnogen xarakterli fəlakətlərin qarşısının alınması, hazırlıq və cavab tədbirləri” üzrə Şərq proqramının üçüncü fazası çərçivəsində “Fövqəladə Hallar Nazirliyinin təşkilatçılığı və İsveçin Fövqəladə Hallar Agentliyinin (MSB) və İtaliyanın Mülki Müdafiə Departamentinin Beynəlxalq Ətraf Mühitin Monitorinqi Mərkəzinin (CİMA) birgə tərəfdaşlığı ilə təlim keçirilib.

AZƏRTAC xəbər verir ki, “Meşə yanğınlarına birgə operativ cavab tədbirlərinin qiymətləndirilməsi” mövzusunda təlimdə müvafiq dövlət orqanlarının və Azərbaycan Qızıl Aypara Cəmiyyətinin nümayəndələri iştirak ediblər.

Tədbirdə çıxış edən fövqəladə hallar nazirinin müavini Etibar Mirzəyev bildirib ki, son zamanlar, dünya miqyasında qlobal iqlim dəyişmələri fonunda təbii və texnogen fəlakətlərin baş vermə tempindəki artım fövqəladə hallara hazırlıq və cavab tədbirləri üzrə imkanların və bacarıqların bir daha nəzərdən keçirilməsini, xüsusilə də fəlakət risklərinin vaxtında müəyyənləşdirilməsi və qiymətləndirilməsini ön plana çıxardıb.

Eyni zamanda, son dövrlər baş vermiş meşə yanğınları risklərin idarəedilməsinə sistemli yanaşmanın və qabaqlayıcı tədbirlərin görülməsi məqsədilə erkən xəbərdarlıq sistemlərinin və digər zəruri texnologiyaların tətbiqinin gücləndirilməsini tələb edir: “Bu baxımdan hazırda keçirilən təlimin əsas məqsədi fəlakət risklərinin idarəedilməsi və cavab tədbirləri sahələrində müvafiq qurumlar arasında qərarvermə, məlumat mübadiləsi və əlaqələndirmə mexanizmlərinin, o cümlədən qabaqlayıcı tədbirlər üçün erkən xəbərdarlıq sistemləri vasitəsilə xəbərdaredici məlumatların və siqnalların qəbul edilməsi və ötürülməsi imkanlarının sınaqdan keçirilməsidir. Həmçinin təlim zamanı qabaqcadan hazırlanmış ssenari üzrə fövqəladə hallarda, xüsusilə də meşə yanğınları zamanı cavab tədbirləri planlarına uyğun olaraq müvafiq qurumlar arasında əlaqələndirmə imkanlarının və birgə fəaliyyətin bir daha nəzərdən keçirilməsi planlaşdırılır. Təlimdən sonra öyrənilmiş dərslərin tərkib hissəsi olaraq strateji, taktiki və əməliyyat səviyyələrində müvafiq qaydaların standart əməliyyat prosedurlarının və təlim ehtiyaclarının qiymətləndirilməsi nəzərdə tutulur”.

Nazir müavini, həmçinin vurğulayıb ki, təlim zamanı ictimaiyyətlə və media ilə əlaqələndirilmiş kommunikasiyanın, o cümlədən böhran kommunikasiyasının funksionallığı və qurulması imkanları və bacarıqları sınaqdan keçirilir. Fəlakətlərin qarşısının alınması və cavab tədbirləri sahəsində birgə əməkdaşlığın daha da genişləndirilməsi, təcrübə mübadiləsinin aparılması və ölkələrin həmin sahələrdə səylərinin birləşdirilməsi çox vacibdir. Bu baxımdan, Avropa İttifaqı ilə ikitərəfli, o cümlədən Şərq Tərəfdaşlığı ölkələrində həyata keçirilən “Təbii və texnogen xarakterli fəlakətlərin qarşısının alınması, hazırlıq və cavab tədbirləri” üzrə şərq proqramı çərçivəsində əməkdaşlığı xüsusilə vurğulamaq lazımdır.

E.Mirzəyev əlavə edib ki, Fövqəladə Hallar Nazirliyinin iştirak etdiyi Şərq proqramı çərçivəsində müxtəlif fəaliyyət istiqamətləri üzrə tədbirlər həyata keçirilib və Avropa İttifaqının Mülki Müdafiə Mexanizmi ilə, eyni zamanda, Fövqəladə Hallara Cavab Tədbirlərinin Əlaqələndirilməsi Mərkəzi ilə əməkdaşlıq əlaqələri formalaşmışdır. Proqramın fəlakət risklərinin idarəedilməsi, cavab tədbirləri və mülki müdafiə təlimləri sahəsində növbəti illər ərzində nəzərdə tutduğu fəaliyyətlərin əhəmiyyətli və faydalı olduğunu da qeyd etmək lazımdır.

Gələcəkdə görüləcək işlərin ölkəmizdə mülki müdafiə imkanlarının gücləndirilməsinə töhfə verəcəyinə inandığını deyən nazir müavini Fövqəladə Hallar Nazirliyi adından dəstəyə görə Avropa İttifaqının Mülki Müdafiə və Humanitar Yardım Əməliyyatları Baş İdarəsinə, o cümlədən Şərq proqramının qrup rəhbəri Peter Qleruma, həmçinin İsveçin Mülki Müdafiə Agentliyinə və ekspertlərə birgə fəaliyyətə verdikləri dəstəyə görə dərin minnətdarlığını ifadə edib.

Nazir müavini, eyni zamanda, Xarici İşlər, Səhiyyə, Daxili İşlər, Ekologiya və Təbii Sərvətlər nazirliklərinin, Dövlət Sərhəd Xidmətinin, Dövlət Gömrük Komitəsinin, Dövlət Miqrasiya Xidmətinin, TƏBİB-in, Azərbaycan Hava Yollarının və Azərbaycan Qızıl Aypara Cəmiyyətinin nümayəndələrinə təlimdə iştiraklarına görə təşəkkürümü bildirərək, təlimin işində uğurlar diləyib.

Tədbirdə “PPRD EAST 3” proqramı üzrə Avropa İttifaqının Mülki Müdafiə Mexanizmi ilə tanışlıqla bağlı proqramın qrup rəhbəri Peter Glerumun təqdimatı da maraqla qarşılanıb.