Metronun “20 Yanvar” stansiyası ərazisindəki yolötürücüdə heç bir problem yoxdur

Bakı, 8 dekabr (AZƏRTAC). Paytaxt metrosunun “20 Yanvar” stansiyası ərazisindəki (Şamaxinka adlanan ərazi) yolötürücü ilə bağlı heç bir problem yoxdur. 

“Azəryolservis” ASC-nin mətbuat xidmətindən AZƏRTAC-a bildirmişlər ki, beton dayaqlarda və tunelin üzərində heç bir çat və dağıntı yoxdur. Bu, bir çox nəqliyyat infrastrukturu obyektlərində olan deformasiya tikişləridir. Onlar temperatur dəyişikliyi zamanı dəyişirlər.

Hazırda isə yolötürücü üzərində genişləndirilmə işləri aparılır ki, bu işlərə də xeyli müddətdir başlanılmışdır.

Qeyd edilmişdir ki, yolötürücüdə, həmçinin heç bir çökmə müşahidə edilmir. Sürücülər hər hansı problem və narahatlıq olmadan yolötürücüdən istifadə edə biləcəklər.