İQTİSADİYYAT


Metropolitençilər peşə bayramını qeyd edib

Bakı, 8 noyabr, Elvin Camalov, AZƏRTAC

Azərbaycan Respublikasının Prezidenti İlham Əliyevin 2006-cı il 28 oktyabr tarixli Fərmanı ilə noyabrın 8-i Metropoliten işçilərinin peşə bayramı günü kimi təsdiq olunub.

AZƏRTAC xəbər verir ki, bu münasibətlə noyabrın 8-də “Bakı Metropoliteni” QSC-nin kollektivi Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, məzarı önünə əklil və gül dəstələri qoyub. Daha sonra görkəmli oftalmoloq-alim, akademik Zərifə xanım Əliyevanın da xatirəsi yad edilib, məzarı üzərinə tər çiçəklər düzülüb.

Sonra Şəhidlər xiyabanına gələn metropolitençilər ölkəmizin azadlığı və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini də ehtiramla yad ediblər, onların, o cümlədən “20 Yanvar” faciəsinin metropolitençi şəhidləri İlqar Qarayevin və Əflatun Kazımovun məzarları önünə güllər düzüblər.

Daha sonra Metropolitenin 51 illiyi və metropolitençilərin peşə bayramı münasibətilə “Bakı Metropoliteni” QSC-də təntənəli tədbir keçirilib. “Bakı Metropoliteni” QSC-nin sədri Zaur Hüseynov yeraltı yolların inşaatçılarını, istismarçıları bayram münasibətilə təbrik edib. Dövlət himninin səsləndirilməsindən sonra, QSC sədri Zaur Hüseynov tədbir iştirakçılarını Azərbaycan Respublikası Prezidentinin Sərəncamları ilə tanış edib.

Metropolitenin tarixi, hazırkı inkişaf dövrünün yeni texnologiyaları sonrakı çıxışçı “Bakı Metropoliteni” QSC-nin istismar üzrə baş mühəndisi Əlixan Osmanovun məruzəsinin əsas mövzusunu təşkil edib. Çıxışda cari ildə metropolitenin vaqon parkının yeniləşdirilməsi, xüsusən də Bakı Metropoliteninin tarixində ilk dəfə olaraq, vaqonların əsaslı təmirinin yerli şəraitdə həyata keçirilməsi barədə, yeraltı yollarda hərəkətin təşkili, idarəolunması, elektrik enerjisi ilə davamlı təmin olunma üzrə görülən işlərdən danışıb.

Metronun gələcək inkişafı, tikinti sahələrində işlərin vəziyyəti “Bakı Metropoliteni” QSC sədrinin tikinti üzrə müşaviri Məzahir Nəbiyevin çıxışında öz əksini tapıb. Tədbir iştirakçılarına “Bənövşəyi xətt”in üçüncü stansiyası “B-3” stansiyasında işlərin vəziyyəti, “Bakmil”, “Xətai” stansiyasında eləcə də bu stansiyaya bitişik 2-ci tuneldə və digər sahələrdə aparılan təmir işləri barədə məlumat verilib.

Mətbuat xidməti və ictimaiyyətlə əlaqələr şöbəsinin rəisi Bəxtiyar Məmmədovun çıxışı dövlətin gənclər siyasətinin metropolitendə tətbiqi, metropolitençi gənclərin inkişaf perspektivləri, gənc kadrların yetişdirilməsi və tərbiyəsi mövzusuna həsr olunub.

Metropoliten İşçiləri Həmkarlar İttifaqının (MİHİ) sədri Arif Mərdanov müəssisə əməkçilərinin sosial problemlərinin həlli istiqamətində, asudə vaxtlarının, məzuniyyət dövrünün səmərəliyinin daha da yüksəldilməsində müəssisə rəhbərliyi və həmkarlar təşkilatının son bir ildə həyata keçirdiyi tədbirlər, metropolitendə təşkil edilən sosial layihələr barədə danışıb.

Sonra metropolitendə “İlin maşinisti” devizi altında keçirilən müsabiqənin yekunu barədə məlumat verilib. Bu il müsabiqənin qalibi sərnişin qatarının sürücüsü Vüqar Həbibov olub və ilin maşinisti mükafatı ona verilib.

“Fəxri metropolitençi” adına layiq görülənlər barədə müəssisə rəhbərinin əmri ilə tədbir iştirakçılarını sədr Zaur Hüseynovun özü tanış edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.