CÜMHURİYYƏT - 100
Mexiko parlamentinin binasında Azərbaycan Xalq Cümhuriyyətinin 100 illiyinə həsr olunan sərgi və seminar keçirilib
Vaşinqton, 4 iyun, AZƏRTAC
Azərbaycanın Meksikadakı səfirliyinin təşkilatçılığı və Mexiko şəhəri Qanunverici Assambleyasının dəstəyi ilə parlamentin binasında Azərbaycan Xalq Cümhuriyyətinin 100 illiyinə həsr olunmuş sərgi və seminar keçirilib.
Tədbirlərin çoxsaylı qonaqları arasında Mexiko şəhəri parlamentinin üzvləri, senator və deputatlar ofislərinin rəhbərləri və təmsilçiləri, kütləvi informasiya vasitələrinin, diplomatik korpusun nümayəndələri və başqaları iştirak ediblər. Sərginin açılış mərasiminə Qanunverici Assambleyanın deputatı Sokorro Meza Martinez, deputat Leonel Luna Estradanın ofisinin təmsilçisi, Meksika senatoru Lizbet Hernandez Likonanın ofisinin rəhbəri, Azərbaycanın müvəqqəti işlər vəkili Məmməd Talıbov və digər rəsmilər də qatılıblar.
Azərbaycan diplomatı açılışdan sonra ölkəmizin mədəniyyətinə və tarixinə aid şəkil və eksponatları qonaqlara nümayiş etdirərək geniş məlumat verib, çoxsaylı sualları cavablandırıb.
Parlamentin binasında təşkil olunmuş seminar zamanı çıxış edən müvəqqəti işlər vəkili Şərqin ilk demokratik respublikası olan Azərbaycan Xalq Cümhuriyyətinin yaranmasının xalqımız üçün və ümumiyyətlə, dünya tarixində önəmli bir hadisə olduğunu deyib. O bildirib ki, Azərbaycan xalqı 1918-ci ildə mütərəqqi və qabaqcıl düşüncə nümayiş etdirərək öz seçimini edib və bütün vətəndaşların, o cümlədən qadınların bərabər hüquqlarının təmin edildiyi müstəqil, demokratik və dünyəvi dövlət qurub. Diplomat AXC-nin yaranmasının ilk günlərindən üzləşdiyi çətinliklərə baxmayaraq, qısa zaman ərzində dövlət quruculuğu, demokratik institutlarının yaradılması və digər sahələrdə böyük nailiyyətlər əldə etdiyini deyib.
1991-ci ildə müstəqilliyini bərpa etmiş Azərbaycan Respublikasının Ermənistanın hərbi təcavüzü ilə və mürəkkəb sosial-iqtisadi vəziyyətlə üzləşdiyinə baxmayaraq, Azərbaycan xalqının ümummilli lideri Heydər Əliyevin ardıcıl, uzaqgörən və müdrik siyasəti nəticəsində Azərbaycan Respublikasının yenidən dirçələrək qüdrətləndiyini deyib. Bu gün müstəqil Azərbaycan Respublikasının Prezident İlham Əliyevin rəhbərliyi altında böyük uğurlara imza atdığı, regionun liderinə çevrildiyi və dünyada layiqli yerini tutduğu vurğulanıb.
Azərbaycanın təşəbbüsü ilə uğurla reallığa çevrilmiş qlobal miqyaslı iqtisadi layihələr barədə söz açan diplomat Bakı-Tbilisi-Ceyhan, Bakı-Tbilisi-Ərzurum boru xətləri və Bakı-Tbilisi-Qars dəmir yolu, həmçinin Cənub Qaz Dəhlizi barədə danışıb, bu layihələrin regionun enerji və nəqliyyat xəritəsini dəyişdirdiyini bildirib.
Ölkəmizin müxtəlif mədəniyyətlərin və dinlərin nümayəndələrinin bir yerdə heç bir ayrı-seçkiliyə məruz qalmadan yaşadığı bir məkan olduğunu qeyd edən diplomat ölkə rəhbərliyinin bu sahəyə ayırdığı xüsusi qayğı nəticəsində Azərbaycan Respublikasının multikulturalizm və mədəniyyətlərarası dialoqun dünya miqyaslı mərkəzlərindən birinə çevrildiyini deyib.
Azərbaycan ilə Meksika arasında münasibətlər barədə danışan müvəqqəti işlər vəkili bu münasibətlərin daim dostluq və əməkdaşlıq ruhunda olduğunu qeyd edib. O, Qanunverici Assambleyanın Mexiko şəhəri-Azərbaycan Dostluq Qrupunun yaradılması təşəbbüsünün iki ölkə arasında münasibətlərə müsbət təkan verəcəyinə inandığını qeyd edib.
Deputat Sokorro Meza Martinez Azərbaycan Xalq Cümhuriyyətinin yaranması tarixinin demokratiya dəyərlərinə sadiq bir xalqın müstəqilliyə doğru ilhamverici yolunu nümayiş etdirdiyini bildirib. O, Azərbaycan Xalq Cümhuriyyətində hələ yüz il öncə bütün vətəndaşların bərabər hüquqlarının təmin edilməsini heyrətləndirici fakt adlandırıb.
Sokorro Meza Martinez 28 may 2018-ci il tarixinin Meksikanın paytaxtı Mexiko şəhərində Azərbaycan Milli Günü elan edildiyini bildirərək bu barədə sənədi səfirliyimizin nümayəndəsinə təqdim edib. Deputat, həmçinin Mexiko şəhəri-Azərbaycan Dostluq Qrupunun ölkələrimiz arasında dostluq və əməkdaşlıq münasibətlərinin daha da genişlənməsi və inkişafına öz töhfəsini verməyə hazırlığını vurğulayıb.
Tədbirin qonaqlarına Azərbaycan milli mətbəxinin şirniyyatlarından ibarət süfrə təqdim olunub, ölkəmiz haqqında videomateriallar nümayiş etdirilib, nəşrlər paylanılıb.
Yusif Babanlı
AZƏRTAC-ın xüsusi müxbiri
Vaşinqton