MƏDƏNİYYƏT


Milli Kitabxana “Rəqəmsal dövrdə kitab və mütaliə” mövzusunda II Beynəlxalq Konfransda təmsil olunub

Bakı, 21 iyun, AZƏRTAC

İyunun 21-də Azərbaycan Milli Kitabxanası MDB-yə üzv Dövlətlərinin Dövlətlərarası Humanitar Əməkdaşlıq Fondunun, Qırğızıstan Respublikası Hökumətinin, Bölgələrarası Kitabxana Əməkdaşlıq Mərkəzinin, UNESCO-nun “İnformasiya Hamı üçün” Proqramının Rusiya Komitəsinin, A.Osmonov adına Qırğızıstan Respublikasının Milli Kitabxanasının və Qırğızıstan Respublikasının Kitabxanalar Birliyinin təşkil etdiyi “Rəqəmsal dövrdə kitab və mütaliə” mövzusunda Qırğızıstan Respublikasında keçirilən II Beynəlxalq Konfransda təmsil olunub.

AZƏRTAC xəbər verir ki, Qırğızıstan Respublikası Mədəniyyət, İnformasiya, İdman və Gənclər Siyasəti Nazirliyinin Mədəni İrsin Qorunması Departamentinin rəhbəri vəzifəsinin icraçısı Rinat Bakeyev, UNESCO-nun “İnformasiya hamı üçün” Proqramının Rusiya Komitəsinin sədr müavini, Bölgələrarası Kitabxana Əməkdaşlıq Mərkəzinin İcraçı direktoru Sergey Bakeykinin moderatorluğu ilə keçirilən beynəlxalq konfransı giriş sözü ilə Qırğızıstan Respublikası Nazirlər Kabinetinin sədr müavini Jıldız Bakaşova açaraq qonaqları salamlayıb və onlara uğurlar arzulayıb.

Sonra Qırğızıstanın mədəniyyət, informasiya, idman və gənclər siyasəti naziri Kairat İmanəliyev, Hökumətlərarası Şura sədrinin müavini və UNESCO-nun “İnformasiya hamı üçün” Proqramının Rusiya Komitəsinin sədri, Bölgələrarası Kitabxana Əməkdaşlıq Mərkəzinin prezidenti Yevgeni Kuzmin, Əlişir Nəvai adına Özbəkistan Milli Kitabxanasının direktoru Umida Teşabayeva, Belarus Milli Kitabxanasının direktoru, Avrasiya Kitabxana Assambleyasının prezidenti, professor Roman Motulski, Strateji Təşəbbüslər Agentliyinin “Gənc Mütəxəssislər” Layihələr Mərkəzinin direktoru Aleksey Blaginin, Moskva Dövlət Pedaqoji Universitetinin prorektoru, filologiya elmləri doktoru, professor Lyudmila Trubina, Qazaxıstan Respublikası Milli Akademik Kitabxanasının baş direktoru, pedaqoji elmlər doktoru, professor Umıtxan Munalbayeva, Tacikistan Milli Kitabxanasının direktoru, Tacikistan Respublikası Prezidenti yanında Dövlət İdarəçilik Akademiyasının professoru Jumaxon Fayzalizoda, Taras Şevçenko Milli Muzeyinin baş direktoru, filologiya elmləri doktoru Dmitri Stus və digərlərinin məruzələri dinlənilib.

Azərbaycan Milli Kitabxanasının direktor müavini Ədibə İsmayılova “Azərbaycan Milli Kitabxanası: pandemiya dönəmi və elektron-informasiya xidməti” mövzusunda məruzə ilə çıxış edib. Bildirib ki, Azərbaycan Milli Kitabxanası pandemiya şəraitində öz fəaliyyətini davam etdirərək oxuculara xidmət işini virtual rejimdə təşkil edib. Bu müddət ərzində çoxsaylı Elektron məlumat bazaları, virtual sərgilər, elektron nəşrlər hazırlayaraq geniş istifadəçi kütləsinə təqdim edib. Direktor müavini qeyd edib ki, məhz bu dövrdə Milli Kitabxananın virtual oxucularının sayı artaraq 3 milyona çatmışdır. Məruzəçi pandemiya şəraitində Milli Kitabxanada təşkil edilən elektron-informasiya xidmətini əks etdirən təqdimatı təqdim edib. O, Milli Kitabxananın hazırda fəaliyyətini virtual rejimdə davam etdirdiyini qeyd edib və qarşıda duran vəzifələrdən danışıb.

Daha sonra o, bu ilin ölkəmizdə dahi Azərbaycan şairi və mütəfəkkiri Nizami Gəncəvinin 880 illik yubileyi münasibətilə “Nizami Gəncəvi İli” elan olunmasını vurğulayaraq Milli Kitabxananın bu istiqamətdə gördüyü işlərdən danışıb.

Direktor müavini Milli Kitabxananın Ehtiyat mübadilə fonduna məxsus “Çingiz Aytmatov. Seçilmiş əsərləri: I-II cild” və “Mehman Həsənli. Çingiz Aytmatov fenomeni və Azərbaycan” kitablarını Qırğızıstan Milli Kitabxanasının fonduna bağışlayıb.

Konfrans iyunun 23-dək davam edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.