MƏDƏNİYYƏT
Milli Kitabxanada "Azər Paşa Nemətov-75" sərgisi açılıb
Bakı, 15 avqust, AZƏRTAC
M.F.Axundzadə adına Azərbaycan Milli Kitabxanasında Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, Xalq artisti Azər Paşa Nemətovun 75 illik yubileyi münasibətilə sərgi açılıb.
Kitabxanadan AZƏRTAC-a bildirilib ki, sərgidə görkəmli sənətkarlar Zəfər Nemətov və Azər Paşa Nemətovun həyat və yaradıcılığına həsr olunan kitablar, rejissorun müxtəlif vaxtlarda mətbuata verdiyi müsahibələr nümayiş olunur. Sərgi avqustun sonunadək açıq olacaq.
Azər Paşa Nemətov 1947-ci il avqustun 13-də Bakıda, görkəmli teatr rejissoru, Əməkdar incəsənət xadimi Zəfər Nemətovun ailəsində anadan olub. 1970-ci ildə M.Əliyev adına Azərbaycan Dövlət İncəsənət İnstitutunun “Teatr rejissoru” fakültəsini, SSRİ Xalq artisti Mehdi Məmmədovun kursunu bitirib.
Yaradıcılıq fəaliyyətinə 1972-ci ildə Azərbaycan Dövlət Gənc Tamaşaçılar Teatrından başlayan rejissor həmin teatrda müxtəlif illər ərzində rejissor assistenti, quruluşçu rejissor, baş rejissor, bədii rəhbər vəzifələrində çalışıb, teatrın inkişafında böyük xidmətlər göstərib.
A.Nemətov 1974-76-cı illərdə Leninqrad (indiki Sankt-Peterburq) şəhərində Leninqrad Dövlət Gənc Tamaşaçılar Teatrında çalışıb, daha sonra dəfələrlə Yunanıstan, Türkiyə, Rusiya, Gürcüstan kimi ölkələrdə teatr festivallarında, konfranslarda və digər teatr forumlarında iştirak edib. Azər Paşa Nemətov öz yaradıcılığında müasir dünya avanqard teatrının və Azərbaycan milli teatrının xüsusiyyətlərini ustalıqla birləşdirib. Teatr sənəti sahəsində xidmətlərinə görə ona 1987-ci ildə “Əməkdar incəsənət xadimi”, 2002-ci ildə “Xalq artisti” fəxri adları verilib. 1997-ci ildə “Humay” milli ictimai mükafatına, 1998-ci və 2003-cü illərdə “Qızıl Dərviş” mükafatına, 2007-ci ildə “Şöhrət ordeni”nə, 2015-ci ildə “Haldun Taner”, 2018-ci ildə Azərbaycan Xalq Cümhuriyyətinin 100 illik medalına layiq görülüb. 2005-ci ildən Azərbaycan Respublikası Prezidentinin fərdi təqüdçüsüdür. 2017-ci ildə 2-ci dərəcəli “Vətənə xidmətə görə” ordeni ilə təltif olunub.
Qeyd edək ki, avqustun 12-də Prezident İlham Əliyev Xalq artisti Azər Paşa Nemətovun "Şərəf" ordeni ilə təltif olunması haqqında Sərəncam imzalayıb.