MƏDƏNİYYƏT
Milli Kitabxanada kitabxanaşünas-alim Rasim Kazımovun anadan olmasının 90 illiyi qeyd edilib
Bakı, 18 may, AZƏRTAC
Mayın 18-də Mədəniyyət Nazirliyi və Milli Kitabxananın birgə təşkilatçılığı ilə kitabxanaşünas-alim Rasim Kazımovun 90 illik yubileyinə həsr olunan tədbir keçirilib.
AZƏRTAC xəbər verir ki, Milli Kitabxanada təşkil edilən tədbir çərçivəsində “Rasim Kazımov – 90” adlı ənənəvi kitab sərgisi açılıb və “Kitabxanaşünas-alim Rasim Kazımov” adlı Elektron məlumat bazasının təqdimatı olub.
Tədbiri Milli Kitabxananın direktoru professor Kərim Tahirov açaraq qonaqları salamlayıb. Bildirib ki, bu gün çox əlamətdar bir tədbirə –Azərbaycanda milli kitabxanaşünaslığın, kitabxana-biblioqrafiya sahəsinin görkəmli nümayəndələrindən biri, tanınmış kitabxana nəzəriyyəçisi, alim və pedaqoq Rasim Kazımovun işığına toplaşmışıq. Bu gün Rasim Kazımovun 90 illik yubileyi tamam olur. Rasim Kazımov Azərbaycan kitabxanaşünaslığının patriarxı sayılan Abuzər Xələfovdan sonra kitabxanaşünaslıq sahəsində ən görkəmli alim olub. Çox qürurvericidir ki, Rasim Kazımov əmək fəaliyyətinə məhz Milli Kitabxanada başlayıb. Daha sonra o, AMEA Mərkəzi Elmi Kitabxanasına direktor təyin edilib. Bu gün R.Kazımovun ruhu şaddır, çünki bu gün ailəsi, tələbələri, yaxınları onun əziz xatirəsini anır. Neçə on illər keçsə də, gənc kitabxanaşünaslar Rasim müəllimin qələmə aldığı kitablardan bəhrələnəcək, ona istinad edəcəklər.
Tədbir zamanı Milli Kitabxananın hazırladığı “Kitabxanaşünas-alim Rasim Kazımov” (http://anl.az/el/emb/R.Kazimov/index.html) adlı Elektron məlumat bazası iştirakçılara təqdim edilib. Bildirilib ki, Elektron məlumat bazası “Rasim Əhməd oğlu Kazımovun həyatı, elmi-pedaqoji və təşkilati fəaliyyəti haqqında qısa oçerk”, “Həyat və fəaliyyətinin əsas tarixləri”, “Görkəmli şəxslər Rasim Kazımov haqqında”, “Əsərləri” və “Fotoqalereya” bölmələrindən ibarətdir.
Sonra BDU-nun “Kitabxana resursları və informasiya axtarış sistemləri" kafedrasının professoru Xəlil İsmayılov çıxış edərək alimlə bağlı xatirələri – onun keşməkeşli həyatı, insanpərvərliyi, tələbələrinə qayğısı barədə danışıb. Belə bir tədbiri təşkil etdiyinə görə Milli Kitabxananın rəhbərliyinə öz təşəkkürünü bildirib.
BDU-nun Kitabxanaçılıq-informasiya fakültəsinin dekanı, filologiya üzrə fəlsəfə doktoru, dosent Ələmdar Cabbarlı çıxış edərək görkəmli alim Rasim Kazımovun kitabxana işi sahəsindəki xidmətlərindən bəhs edərək bildirib ki, o, öz əsərlərində kitabxanaşünaslığa fəlsəfi baxımdan yanaşırdı. Bu isə onun ziyalı ailəsində böyüməsindən irəli gəlirdi. Rasim müəllim ilə bağlı xatirələrindən bəhs edən Ə.Cabbarlı bildirib ki, o həmişə Səməd Mənsurun “Həpsi rəngdir” şeirini deyirdi.
AMEA Mərkəzi Elmi Kitabxanasının direktoru, professor Məmməd Əliyev qeyd edib ki, Rasim Kazımov daima ən gözəl sözlərlə yad edilir. Qeyd edib ki, bütünlükdə kitabxana, kitabxanaşünaslıq sahəsi multikultural cəmiyyətin bir hissəsidir. Bu sahədə çalışan görkəmli şəxslərin dəyərləndirilməsi, belə tədbirlərin keçirilməsi, ümumilikdə Azərbaycan mədəniyyətinə, elminə verdiyi dəyərə görə Milli Kitabxanaya, onun rəhbərliyinə öz təşəkkürünü bildirib. Çıxışının sonunda M.Əliyev mayın 24-də Mərkəzi Elmi Kitabxanada görkəmli alim Rasim Kazımov haqqında dəyirmi masanın keçiriləcəyini iştirakçıların diqqətinə çatdırıb.
Tədbirin davamında BDU-nun Biblioqrafiyaşünaslıq kafedrasının müdiri, pedaqogika üzrə fəlsəfə doktoru, dosent Nadir İsmayılov, Firidun bəy Köçərli adına Respublika Uşaq Kitabxanasının direktoru Şəhla Qəmbərova, BDU-nun Kitabxanaşünaslıq kafedrasının müdiri, pedaqogika üzrə fəlsəfə doktoru, dosent Elçin Əhmədov, BDU-nun Elmi Kitabxanasının direktoru Nigar İsmayılova, Firidun bəy Köçərli adına Respublika Uşaq Kitabxanasının müavini, Əməkdar mədəniyyət işçisi Zahirə Dadaşova və digər çıxışçılar Rasim Kazımovun elmi və pedaqoji fəaliyyətindən danışıblar.
Daha sonra ailə üzvləri adından Rasim Kazımovun qızı, Firidun bəy Köçərli adına Respublika Uşaq Kitabxanasının şöbə müdiri Leyla İbrahimova çıxış edərək bütün iştiraklılara minnətdarlığını bildirib və atası haqqında xatirələrini bölüşüb.
Sonda iştirakçılar Milli Kitabxananın fondunda mühafizə olunan Rasim Kazımovun həyat və yaradıcılığını əhatə edən ənənəvi kitab sərgisi ilə tanış olublar.